📖 ZKIZ Archives

鞋王三奶四卡鑽戒閃爆法庭

1 : GS(14)@2012-04-18 00:16:41

http://hk.apple.nextmedia.com/te ... 104&art_id=16254785
【本報訊】年近七旬的「鞋王」鄧劍群 10年前情傾年輕 27載的李姿霆，將她收為三奶，但因「三奶」不敵七年之癢搭上港男黃長發，成為全城熱話，更觸發鄧入稟向她討回三個由他獨資購入的物業及售樓得益，涉及逾 2,500萬元。案件昨於高院開審，由「鞋王」首先細說他當年如何瞞住大婆照顧「三奶」，他初時對忘年戀有所保留，擔心「三奶」為錢而接近他，發展至送錢送珠寶 700多萬元。記者：陳佩明


李姿霆戴上四卡鑽戒出庭，非常搶眼。
黃建通攝

http://hk.apple.nextmedia.com/te ... 867&art_id=16254786
「三奶」李姿霆於 09年初被揭發疑一腳踏兩船，一方面與「鞋王」鄧劍群發展忘年戀，同時暗交較自己年輕 16年的港男黃長發，爆煲後令鄧高調公開要斬纜。鄧在供詞中坦言，傳媒廣泛報道令他很尷尬，更指當年讓李聯名持有匡湖居物業，其中的條件是李須忠心，不會搭上其他男人。
鄧聲言，因樓價貴，從沒想過送樓給李，李名下三個物業，所有買樓資金全來自他，李僅以受託人身份持有。
03年，他購入港灣豪庭讓李入住；李懷孕後「身價」即提升，鄧斥資購入西貢匡湖居獨立屋。李在 04年誕下一女後，兩母女便以匡湖居為家。隨後鄧再購入紅磡半島豪庭一單位，及尖沙嘴卓能中心一寫字樓，寫字樓的租金收入用作補助兩母女生活費。除匡湖居物業屬兩人聯名持有，餘下物業均屬李名下。

爆粗質問與黃長發關係

李認為物業是鄧餽贈她，加上鄧曾向她提過投資買樓可賺大錢，當對方聽到她說無錢，便着她睇樓，並稱「幫你搞掂佢」。
代表鄧的大律師在庭上不止一次形容鄧是非常富裕及著名商人，李只是鄧的其中一名情婦。另鄧昨早前要求將一段電話錄音對話呈堂，但被法官以太遲申請駁回。錄音涉及鄧以粗口鬧爆李，質問她與黃長發的關係，李全程沒回應。
《蘋果》記者


鄧劍群作供時稱舊愛李姿霆為被告，沒有直呼其名。

---

2 : 肥B(18468)@2012-04-18 11:51:43

「鄧在供詞中坦言，傳媒廣泛報道令他很尷尬，更指當年讓李聯名持有匡湖居物業，其中的條件是李須忠心，不會搭上其他男人。」

梗係尷尬啦, 俾同儕笑到面黃啦一定......

俾人督穿左我有妾侍無野好講, 作為一個有錢佬, 有人埋我身, 又肯幫我生兒育女, 我俾返D家用, 佢做返個妻妾應盡的「本份」, 實屬「正常不過」的自家生活. 我估佢朋友群中基本上個個都有情婦在外, 咁樣俾個女人「背夫偷漢」, 仲要係用自己錢去慍仔, 唔火滾就奇....

仲要上報紙俾人唱通街, 第時無人記得你係邊個, 但一提你俾三奶玩過一次就知你係邊個的話, 你話幾無面?

---

3 : GS(14)@2012-04-18 20:50:57

佢仲要話請晒D妾室去飯真是放，我想他今次在朋友面前出晒位

---

4 : GS(14)@2012-04-18 23:12:51

http://hk.apple.nextmedia.com/te ... 104&art_id=16258271
前日庭上爆出曾安排二奶和三奶秘密參加兒子婚宴的鄧劍群，昨又在庭外自爆：「一直以來唔想老婆知我有情人、女朋友。」並補充：「老婆係生死之交，我幫佢捱一刀，佢幫我捱一刀，兩個人無計嘅，晚晚我都返屋企食飯。」至於大婆是否知情，鄧笑嘻嘻說：「邊有（二奶、三奶）吖，嗰啲係女朋友自己安嘅名。」

三奶曾稱鞋王像神打救她

他一直小心包養女人，故 03年斥資購入港灣豪庭的單位，選擇讓李做登記業主，而非使用名下公司，是為免留下蛛絲馬迹，給身為公司董事的兒子 Alex悉(識)破。
他供稱， 03年和李姿霆情到濃時達成買樓共識。「我幾十歲，同一個後生女一齊，我好願意將佢個名加入去，畀佢一半，但如果佢搵第二個男人，佢應該退番畀我！」
鄧引述李當時向他表明不會離開他：「我過去有咁悲慘的經歷，我點會離開你。」鄧則說：「一個男一個女喺一齊，特別係 age gap（年齡差距）咁大，我買間屋落你個名，你搵到第二個男人走咗去，咁我點？」李回應：「我唔會走，喺我最慘嘅時候，你好似 God咁 save me。」
話雖如此，當鄧知道李懷孕，未婚的李不願意大着肚在舊居出入，要求鄧買層「樓仔」，鄧對此口中說無所謂，但暗裏另有打算：「買樓唔係好多錢，我對佢有戒心，安排 30年期還款（最長的銀行按揭年期）。」鄧指戒心來自李的複雜家庭背景：「佢爸爸因販毒坐監，爸爸同細佬破產，佢自己亦冇嘢做。」
按婦科醫生記錄，李於 03年 4月往診所，驗尿發現懷孕，翌月卻不幸小產曾入住養和醫院，出院當日鄧現身陪伴兼支付費用。
鄧昨堅稱早於 02年 12月已知李懷孕，反指李就懷孕一事說謊：「佢唔止一次講大話。」究竟李當時是否確實懷孕，鄧沒有正面回答，只強調：「我哋相識時，我確實好鍾意佢，蒙蔽咗……點解要留意佢個肚？我唔係第一次有女人同我生仔……當時的確好鍾意被告，好多嘢冇考慮得咁清楚……當時信佢講嘅嘢。」
鄧在第二份供詞中強調，李是大話精、不可信。至於由最初的信任變成不信任，鄧在庭上解釋：「係超過六年幾內陸續發生嘅，蜜月期嗰幾個月，我眼盲盲地，耳係聾，其他人對我講點樣有懷疑，但鍾意一個人唔會考究咁多嘢。」
對於跟李姿霆相戀七年內，送給她總值逾 310萬元的珠寶手錶、清水灣鄉村俱樂部會籍，及另外提供至少 420萬元金錢，鄧劍群直言沒有打算討回珠寶手錶。
他還記得於 09年 1月對李發放最後一次生活費，當時更額外增撥五萬元予李以過農曆新年。鄧形容多年來「每次畀錢出嚟係有誘因，我唔係銀行提款機，你㩒幾多，我畀幾多」。
案件編號： HCA920/09

---

5 : GS(14)@2012-04-18 23:13:26

http://hk.apple.nextmedia.com/te ... 104&art_id=16258272
有九名兒孫，年近 70的「鞋王」鄧劍群，雖然之前飽嘗「三奶」疑偷食年輕港男之痛，但今次出庭以活得比你好的姿態現身，昨在庭外大談養生之道，自己如何食燕窩人參保養，表面讚三奶「係個好嘅盛女」，但又說「冇男人會再黐埋身」，句句有骨。那邊廂三奶李姿霆雖然追求者眾，但沒有鄧這條大水喉，雖然周身名牌，但原來是舊款產品。
記者問鄧現時跟李的關係時，鄧抵死的說：「正如發仔（黃長發）話齋，再見不是朋友。」鄧還說，要感謝黃：「佢救我一命，係我苦海明燈，早啲睇穿呢個人（李）。」在庭上說熱戀時跟李生好多性行為的鄧，對於李床上的表現，只笑笑口說：「 No comment。」

三奶追求者不斷

李姿霆在前日開審時戴上四卡鑽戒閃爆法庭，鄧昨主動踢爆：「係五卡，色澤唔知係 I定 J，偏黃色，價值廿幾萬，好平，冇證書。」李昨日依舊以富貴 look上庭，穿的高跟鞋是被譽為「紅底鞋王」的法國名牌 Christian Louboutin，織皮手袋來自意國名牌 Bottega Veneta，但原來紅底鞋不是當季款式，上季類似款式約價 8,000元；手袋則是兩三年前款式，已停產，當年約價 2萬元。
不過李並不愁寂寞，據悉去年有次她搭港鐵，有一名中年男子主動向她搭訕，要求跟她發展，還可以每月給她一些生活費，但這段情發展了很短時間就告終。雖然不斷有追求者，但條件難與鄧劍群相比，目前她都未能找到合適的新對象。而黃長發最近則戀上一金髮外籍女子。鄧雖然女人緣甚佳，他卻斬釘截鐵說：「見到女人要行開，越靚越彈開。」，身邊「無飯腳」，又稱：「如果我冇錢，着條牛仔褲企係你身邊，梗喺你贏，咁我有錢，咪黐埋嚟囉，我又唔係太醜樣。」
事實上鄧外表絕不似長者，他亦毫不掩飾自己貪靚，又問上鏡後「似唔似阿伯，靚唔靚仔」。他跟孫兒外出時，當外人聽見孫兒稱他做爺爺，表現有點不能相信。鄧的養生之道絕不簡單，每周逢吃三天燕窩，另外每周服冬蟲夏草及長白山人參，每月吃兩次花膠，加上不煙不酒，每晚回家食住家飯，方可修成正果。
《蘋果》記者

---

6 : GS(14)@2012-04-19 22:44:25

http://hk.apple.nextmedia.com/te ... 104&art_id=16261876
【本報訊】遭「鞋王」鄧劍群追討物業的前三奶李姿霆，昨在高院作供進行反擊，形容鄧是個非特別成功亦非好有錢的雙非人，在她眼中「李嘉誠、劉鑾雄嗰啲就真係好 rich」。另邊廂，鄧繼續公開數臭舊情人，講明李雖替他生女亦不會獲送樓慶祝，有骨說話令李淚灑法庭。
洋名 Karen的李姿霆（ 41歲），於 2002年跟年齡相差 27載的鄧劍群發展忘年戀。當年一名任職保險的朋友介紹她認識鄧。「我 3月識佢， 4月已覺得佢追緊我，我哋 5月開始，我做佢女朋友， 5月中左右有親密關係」。
李成為鄧的女友後，每月獲得生活費，金額按年遞增；相戀數月後，更獲贈兩卡鑽戒連一對逾兩卡的鑽石耳環。李坦言自 2000年由法國返港至認識鄧之前，一直沒有工作，在鄧鼓勵下修讀有關寶石的 GIA文憑課程。隨後，她往珠寶公司應徵珠寶鑑證師，但因沒相關工作經驗，公司提議她到門市做銷售員，但她拒絕。李將事件告訴鄧，鄧回應：「你唔需要做嘢，你係我女人，（我）會照顧你所有需要，你唔需要去搵工。」李出於尊重鄧，自此沒有再求職。

按李的書面供詞，鄧於 03年初首次提及打算買物業給李做業主，「等你有啲嘢揸手，同埋用嚟收租」。李在庭上補充，鄧購入大角嘴港灣豪庭一單位後，「同我屋企人講送層樓畀我」。鄧支付訂金及首期，她感到好開心，認為物業屬於她，單位出租後所得租金，用作歸還按揭。
鄧的代表大律師質疑，鄧於講話中沒有使用「送」字，「揸手」一詞可意指「有東西在手中」。李反駁：「唔可能用手揸住層樓，中文嘅意思係送畀我，佢另外同我屋企人講係送畀我。」
鄧曾經供稱，買入港灣豪庭只屬熱身，隨後陸續有來，但一段時間過後，鄧、李才聯名購入西貢匡湖居獨立屋。大律師問李，會否對這等待期感到驚訝。李答：「唔覺得驚訝，買樓唔係求其食餐飯，我又唔係等住佢送樓畀我，佢想送咪送囉。」
此外，大律師指李於 02年底向鄧表示懷孕，但按醫生紀錄，李至 03年 3月才發現沒有來經。李強調肚皮不可能騙人，加上「我冇理由呃到佢三個幾月，我要同佢上床」，反指鄧「想抹黑我，話我講大話呃佢」。
相反，李姿霆記得 2002年尾一天，如常跟鄧劍群到酒樓午膳時，「我見到隔離枱 BB好得意，我望住佢，原告（鄧）問我『你好鍾意細路』，我話『係，我好鍾意』，佢話『你咁鍾意，我哋可以生一個，最緊要我有錢』」。
案件編號： HCA920/09
當日相關文章

---

7 : GS(14)@2012-04-19 22:44:35

http://hk.apple.nextmedia.com/te ... 867&art_id=16261877
鞋王鄧劍群昨在庭上主動提及三奶李姿霆搭上港男黃長發，指李為了掩飾自己偷食而講大話，但在紙包不住火下招認：「我係有同黃長發上床，吹咩！」終令他死心。他強調打官司非為爭啖氣，亦不是要報復令舊愛尷尬，「你冇辦法擰返轉頭，我仲要面對老婆，報復啲咩？...我要攞番應得嘅！」
按呈堂文件記錄，鄧、李暗交七年間，相戀時常以電話短訊傳情，互稱老婆、老公。 08年 9月，鄧給李的短訊中寫上「肯定愛你更甚於他人，你是最好的」。鄧昨補充：「呢個係不可置疑，我要求女人同我一齊，要畀足我。」
轉個頭他開始狂數李：「佢話唔飲酒、唔食煙、唔去夜街，但夜晚 11點走去蘭桂坊，掟低嗰女走咗去，佢同埋話好憎男人。」他提到李搭上黃長發，「佢（李）一路以嚟同我講，同黃長發只係朋友，冇上過床」。有次李跟黃由晚上 11時至翌日早上 6時，共處一間酒店房間，但李聲稱兩人純粹傾偈。

「今日 fall in love聽日 bye bye」

鄧自言：「我對佢（李）嘅感情係真嘅，佢所有講嘅嘢係大話。」鄧為挽救感情，應李父要求下，去信無綫電視高層樂易玲，提及李有三個物業，擔心被人欺騙，鄧更跟李父親身送信到樂的住所。
「佢（李）出面有好多男人，佢老竇都有同傳媒講……我真係好愛佢，但佢一直暪住我」。鄧續稱由始至終，對這段情有戒心，「但我畀愛情，畀忘年戀令我方向唔係好清晰」，「大家冇一紙婚書，今日 fall in love， make love，聽日 say bye bye，呢個係我 worry嘅 feeling」。
對於涉案的四個物業，鄧重申「冇話過送畀佢」，亦不會為慶祝女兒誕生而送樓，「點解生咗女要畀物業佢，唔成理由去慶祝，我唔會做囉！」《蘋果》記者

---

8 : GS(14)@2012-04-19 22:45:08

http://hk.apple.nextmedia.com/te ... 867&art_id=16261878

街頭籌款人士上前募捐，鄧劍群來者不拒塞入五百元和一千元。


自言身家過百億的鞋王鄧劍群昨日作供完畢，心情大好隨即往冲凉揼骨，席間不停調戲女記者，叫記者做他的秘書，還說：「我啲錢使唔晒，你要做第幾奶都得。」

幫記者改名叫「高比」

鄧的心情勁靚，指友人說他樣貌似國家主席胡錦濤和總理溫家寶。雖然大把身家，但鄧昨以長者八達通花兩元搭港鐵由金鐘到尖沙嘴，期間遇上有機構籌款，將五百元和一千元紙幣塞入籌款箱，大受籌款人士歡迎。他又聲稱，若打贏官司，會將款項用來興建觀音廟。
被大批記者包圍，他一再「好心」提女記者不要被攝入鏡，是擔心外人會以為她是「甘比」，還幫記者改名叫「高比」；又主動跟記者討論為何三奶小產後三個月便成功懷孕，跟記者說：「你不如試吓。」
他形容初次見三奶時，對方頭髮長長，狀甚斯文，又大讚她皮膚好，由他以無限量補品支援。提及兩人的性生活，鄧這樣回應：「有錢收，實愉快。」但他指三奶跟大婆根本無得比，「如果佢死我都會喊一兩日，唔會傷心一世」，但大婆有事，他聲稱會傷心至死。《蘋果》記者

---

9 : greatsoup38(830)@2012-04-20 23:29:20

http://hk.apple.nextmedia.com/te ... 104&art_id=16265929
【本報訊】「鞋王」鄧劍群向前三奶追討物業案，「三奶」李姿霆續在高院爆料，指鄧曾經要求她搬近飛鵝山方便他探訪，更趁大婆外出時，帶她及其家人到鄧宅睇樓睇裝修。自稱「啲錢一世使唔晒」的鄧當年着李往揀樓時，以 170萬元為樓價上限，令人嘖嘖稱奇。
記者：陳佩明

李姿霆（ Karen）於 2002年 5月成為三奶，翌年 5月以逾 170萬元購入大角嘴港灣豪庭一單位，在此之前，鄧已表明「畀層樓我揸手，用嚟收租」。李形容：「當時同原告感情好好，好信佢，佢好錫我，保證唔夠錢供樓會補貼我，我冇嘢要擔心。」
李在熟悉地產業務的胞弟協助下，向鄧推介黃埔花園及海逸豪園的心水樓盤，但全被鄧否決。李說：「原告畀個 budget只係 170萬……話（海逸豪園） budget over咗，黃埔花園好舊，裝修會好煩。」鄧終同意購入當時仍屬樓花的港灣豪庭。
2005年，李以 210萬元將單位出售獲利，鄧聲稱至 2009年向律師查詢始知情。李昨直指鄧講大話，他根本一早知情。
此外，兩人於 2003年購入西貢匡湖居獨立屋，兩人到律師樓簽署買賣合約時，李指鄧向職員講明：「梗係簽長命契，佢係我老婆。」李姿霆亦確認簽署時文件上明明註明「長命契」。
及至 2004年 8月，李從查冊紀錄發現物業變成各享一半業權，她遂致電律師行查詢，獲覆是應鄧要求修改。
李稱：「佢（鄧）真係呃咗我，佢話兩個係一樣，冇分別。」李相信「合約明顯有人改咗」，後要求鄧撥亂反正，聲稱終得償所願，變回長命契。

購入半島豪庭要寫欠單

李補充，鄧自言藉炒樓賺大錢，主動問她「點解唔炒埋一份」，提出「幫你搞掂佢」。李透露：「原告以為我同佢一齊就好有錢，我冇為意，佢可能想 show off佢幾有錢。」
至於鄧在 2004年購入紅磡半島豪庭物業時，着她簽署欠單給鄧名下一間公司，李坦言感到不快：「佢應承送畀我，轉頭畀張欠單我……如果無端端要我欠你公司錢，我寧願唔要囉。」
案件編號： HCA920/09

---

10 : Ar Yan(11362)@2012-04-28 03:59:58

聽人講，送豪宅俾女人，只送首期，再加30年供，落佢名，佢就係你有生之年，都飛唔出你手上

---

11 : greatsoup38(830)@2012-04-28 21:05:09

10樓提及

---

聽人講，送豪宅俾女人，只送首期，再加30年供，落佢名，佢就係你有生之年，都飛唔出你手上

他玩野就你玩野

---

12 : GS(14)@2012-05-03 23:44:22

http://hk.apple.nextmedia.com/te ... 462&art_id=16302197
鞋王鄧劍群早前與三奶李姿霆（ Karen）為物業問題打官司， Karen昨接受商台錄音訪問，談到與鞋王的關係：「當時佢同我講同老婆關係唔好，原來仲有二奶，好憎佢。」她稱曾向鞋王要大婆及二奶的電話：「決定離開鞋王時打過畀佢太太，我同佢道歉，我又打過畀二奶，佢答我係鞋王老婆，令我仲嬲。」
Karen又稱：「之前我患癌諗過唔醫，當時寫咗封遺書畀個女，叫佢一定唔可以做人第三者。」
採訪：李珮洳

---

13 : greatsoup38(830)@2012-06-29 00:14:01

http://hk.apple.nextmedia.com/news/art/20120627/16463239



【本報訊】年近七旬的「鞋王」鄧劍群10年前戀上年輕27載的李姿霆，納她為「三奶」，但至09年揭發三奶搭上港男黃長發。被「戴綠帽」的鞋王興訟向三奶追討四個物業，法官昨判鞋王可以奪回其中一個已出售物業得益；至於價錢最貴接近2,000萬元的西貢匡湖居獨立屋，各人則佔一半業權。埋單計數，兩人算是打成平手，鞋王可取回1,200多萬元資產，三奶則可分得1,100萬元。　記者：黃幗慧

李姿霆昨以短訊回覆稱她不在港，需時與律師研究判詞。鄧劍群昨得悉判決後，心情輕鬆。他對於這個「有輸有贏」的判決尚算滿意，指「觀音顯靈」，而李又要花錢打官司，七除八扣「冇乜剩」。他認為案件具教育意義，「即係將層樓寫咗女人個名，都可以攞得返，幾好」。他又提醒：「想搵男人錢啲女仔睇吓點樣做，唔好到時得個桔囉；啲男人又要小心囉，唔好亂咁簽，唔好亂咁畀。」
[「鞋王」鄧劍群] 「鞋王」鄧劍群
「不再勾三搭四」

法官判決鄧可取回匡湖居獨立屋一半業權、半島豪庭單位全部業權、及李於05年出售了港灣豪庭單位所得的210萬元得益。鄧表示由於現在樓價理想，他計劃將匡湖居物業出售後與李分錢，「分開咗一定要計數」。
鄧表示每月都有付生活費給予李所生的八歲女兒，但沒打算與女兒見面。他斬釘截鐵說不會與李復合，「咪玩啦，同返我一齊？咁鬼肉酸，佢同咁多男人喺埋一齊」。他估計，只獲判得小部份物業得益的李會不滿判決，「佢係想盡擸吖嘛，個錢睇得好緊」。鄧聲稱已修心養性，不會再勾三搭四，「發神經咩，仲搵女朋友？講吓笑就得，真嘅就唔好制，70（歲）啦」。他說與李的一段情已過去，不用向太太交代事件。
法官指鄧假慷慨

現年69歲的鄧劍群，在02年遇上現年41歲的李姿霆，二人火速戀上，相識10天便發生親密關係。鄧向李送贈過多項貴重禮物，包括每月最高達五萬元的生活費及珠寶。直至09年，李承認戀上港男黃長發，導致鄧與李維持了六年的關係終結，跟着發生鄧向李討回在03至04年間、跟李有關而買下的四項物業。
法院暫委法官 Houghton認為鄧利用物業深化與李的關係，他經常在人前吹噓自己對李慷慨，但其實部份物業並非真的當禮物贈予李。
雖然鄧聲稱購買匡湖居獨立屋的條件，是李必須對他忠心，不會搭上其他男人，但法官認為這只是要求，而非一項條件，故判匡湖居的一半業權是他對李的餽贈。
案件編號： HCA920/09

---

14 : greatsoup38(830)@2012-06-29 00:14:18

http://hk.apple.nextmedia.com/news/art/20120627/16463240


涉案的匡湖居獨立屋，是案中價值最高的物業。物業在03年11月以鄧劍群及李姿霆「聯權擁有」形式購入，即是俗稱的「長命契」。鄧後來一度將物業由「聯權擁有」（ joint tenants）改為「分權擁有」（ tenants in common），但被李發現，再改回「聯權擁有」。
在生一方可繼承業權

律師謝連豐解釋，「聯權擁有」不會列明業權分佈的百分比，由持有的業主共同擁有業權；若其中一名業主離世，在生一方可以繼承死者的業權，哪一方長命，便享有最終業權，故俗稱「長命契」。一般情況下，若物業出售，收益由持有業主平均分配；假如其中一方不肯出售物業，其他業主可要求法庭下令將物業出售。
至於「分權擁有」，會列明各業主持有業權的比例，即使其中一方離世，其業權歸遺產所有，其他業主不會自動繼承業權。

---

15 : hh0610(1603)@2012-06-29 00:21:24

11樓提及

---

10樓提及

---

聽人講，送豪宅俾女人，只送首期，再加30年供，落佢名，佢就係你有生之年，都飛唔出你手上

他玩野就你玩野

是, 想當年. 港佬真係咁O係深圳包二奶, 但估唔到深圳樓會咁升法.

---