摸魚手札：做人不要太葉劉
1 :
GS(14)@2016-12-18 10:53:47葉劉宣佈參選特首，公佈了政綱，內容太冗長沉悶。唔好話一般市民，連葉劉找來站台的親朋好友、家臣黨員，都一致打呵欠、玩手機，漫不經心的樣子，你就知道葉劉平時幾得人歡心，幾得人支持，相對之下，大家還是關心「亡口」的公關設計多一點。一般的social choice theory慣性用上了中間選民理論的假設，沉默的大多數唔會把政綱、理念睇得太仔細，反而候選人的性格、動態、形象、氣質、嘴臉更主導投票意向。我自己也是這樣玩社交媒體，與其評論葉劉一二、倒不如貼葉劉的美照，讓網民看清楚其氣質和嘴臉好過，代價是不少好友投訴問候，聖誕節收到這些問候，我倍感窩心。首先，葉劉第一件事不應該寸記者問佢關於23條的問題，因為這是正常採訪，並無不當。既然你姿態咁高，咁唔尊重媒體，記者朋友一定會好好招呼你的，甚或連當年跟葉家成親的不風光舊史都挖出，這又何苦呢？評論員常常笑葉劉為「葡萄乘淑儀」，因為她常常暗寸另一位「潛在」候選人薯片叔叔，的確，風度有欠，酸味十足。薯片叔叔的功過難以蓋棺定論，但有一些批評係駁唔到的，例如薯片叔叔每年對庫房的盈虧估算往往落差甚大，如果葉劉從這兒入手，那是合理攻擊，大家無話可說。不過，點都唔會批評薯片叔叔「量入為出」的理財態度有問題囉，因為咁樣不但反映自己經濟水平極低，甚至反映自己的終極無知。根據《基本法》第107條：「香港特別行政區的財政預算以量入為出為原則，力求收支平衡，避免赤字，並與本地生產總值的增長率相適應。」，薯片叔叔佢「量入為出」，係因為這是基本法寫到明要特區的理財方針要咁做，唔係單憑薯片叔叔的個人意志決定。如果薯片叔叔真係做到量入為出，咁係證明佢恰如其分，盡忠職守，按足本子辦事。真係枉葉劉仲話自己係愛國愛港，連《基本法》都未讀熟就走去獻世出醜，攻擊對手，你叫北京點信你啊（一笑）？第二，我個人真係覺得活到幾廿歲人仲要炫耀學歷去建立自己真係好可悲（二笑）。好像數年前選區議員，建制派的符傳富同樣都係走不出這個包袱，一樣係sell自己會計師、會考8A尖子、男拔乜乜乜，結果被網民恥笑。而家叫你選議員、選特首，係為了服務社會，當然係把自己的公職、社會貢獻羅列出來，去到這個年紀仲要sell學歷真係好可憐，而家叫你選dean嗎？難道除了學歷之外，就無其他長處嗎？慘被葉劉抽水的Stanford經濟系其實人才輩出，好像2001年的諾獎得主A. Michael Spence和Joseph E. Stiglitz係研究資訊不對稱的大師。特首選戰同樣面對資訊不對稱，因為無人可以揣測到北京的心意，推測到派系內鬥等的均衡結果，甚至薯片叔叔的請辭能否被中央接納也是問題，若拖他十個八個月也不接納，只怕叔叔跟選戰無緣。面對資訊不對稱，大家都是盲估估。Come on！葉劉身為薯片叔叔、奶媽的前輩，不是更應拿出功架和風度來嗎？至於跟stanford有緣，講產權、講契約的新制度學派諾獎大師Douglass North（已過身），若知道葉劉的任內，制度、法治、產權如何被破壞，仲要慘被抽水。泉下有知，也不知他作何感想了。渾水
http://www.facebook.com/muddydirtywater來源:
http://hk.apple.nextmedia.com/financeestate/art/20161218/19868644