📖 ZKIZ Archives

免費早餐夠爽 左丁山

http://hk.apple.nextmedia.com/template/apple_sub/art_main.php?&iss_id=20110925&sec_id=12187389&art_id=15644373&cat_id=255&coln_id=22

「爽報」在 9月 19日出版，公關 T揸住張「爽報」向左丁山漾幾下，左丁山問佢：「乜晨咁早就攞到份爽報？」公關 T話：「我今早在沙田第一城搭 88R嚟中環，巴士站頭有得派；攞咗上車就免費坐巴士，我梗係醒目去搶番一份啦！」
沙田第一城城巴車站每早都有人企定定等免費報紙，公關 T攞到一份「爽報」啫，就慳番一程車費二十元，何樂而不為，難怪佢話搞到上車都要排長龍，因人人有「爽報」在手也！
肥 佬黎搞推廣，最多噱頭，第二日（九月二十日）竟然送早餐。張老總知道左丁山人在中環，九點幾就打電話嚟：「喂，食早餐呀，爽報送嘅，快啲嚟翠河茶餐廳，陸 羽對面呀！」唉吔，請我食早餐，好心去陸羽啦，竟然去陸羽對面？一落到皇后大道中，就見到攔路英雌猛咁派報紙，「爽報」、「晴報」、「頭條」、「虎報」任 攞唔嬲，既然話「爽報」送早餐，自不然攞份「爽報」，走上士丹利街翠河，張老總已在座。在中環去翠華就去得多，嚟翠河，都係第一次啫，只見全間餐廳滿座， 人人揸住份「爽報」，幾好生意噃，記得有幾次早上行過呢間茶餐廳，好似係幾靜吓嘅，冇呢日咁多人，呢日有「爽報」送早餐吖嘛。
四張免費報紙在街上廝殺，最後鹿死誰手，未可預料，傳統智慧係有領先優勢者佔先機。但傳媒呢行高難度，講到最收尾都係講邊個有更多銀紙去燒嘅啫，有錢就有人有噱頭，可打持久戰，缺錢而不時縮窒縮窒者，最後會成為犧牲品。

 

傳媒如此難做，都唔明點解咁多叻仔叻女要報讀新聞系，讀完出嚟，以傳媒為終身職業者，可能 只係少數。最近有人被盲目吹捧為傳媒良心，點知當事人一去到立法會啫，說話內容就與前不同，原來並非受到上司壓力，只係受到「消息人士」嘅催促而將錯誤新 聞出街！此乃 2011年傳媒大笑話，一位咁有經驗嘅總編輯/總監會頂唔住消息人士「壓力」？簡直係聞所未聞，唔怪得好多記者行家對左丁山講，佢地睇電視直播簡直不相信 如此言論出自資深人士之口，為何如此，只能講句人在江湖，身不由己。

PermaLink: https://articles.zkiz.com/?id=27947
Next Page
ZKIZ Archives @ 2019