ZKIZ Archives


虎報壓南早 左丁山

http://hk.apple.nextmedia.com/template/apple_sub/art_main.php?&iss_id=20120407&sec_id=12187389&art_id=16225958&cat_id=255&coln_id=22

有老友打電話嚟邀請參加報業公會主辦之「 2011香港最佳新聞獎」頒獎午宴,於四月二十三日中午舉行,此乃香港報界之「奧斯卡」,左丁山雖然已退出報壇,但身為傳媒一分子,好多年前又做過報業公會理事,自不然應承出席。
可惜嘅係,「蘋果日報」不參加比賽,老友寄來之比賽得獎名單,不見「蘋果」之名。中文新聞得獎者,似乎係「星島日報」略為佔優,「明報」其次,有趣的是,過往「星島」挺曾挺唐,有不少消息靈通、經常可靠之新聞報道,但今次挺唐失敗,反為「明報」挺梁有功,以後消息靈通嘅地位,唔知會唔會調轉呢?不過攞獎嘅新聞,涉及多方面,獨家爆料新聞未必就一定得到評審委員青睞,得獎呢回事,要報館全面配合先至得嘅,譬如老闆訂下得獎目標,責成總編輯叮囑下屬每年做大做好幾單大新聞、爆料新聞,攝影、美術、版面各樣嘢都全力做到最好,咁就比較容易起眼,捕捉到評審眼光。
英文報紙方面,只得三張爭奪獎項,過往係「南華早報」橫掃嘅,「英文虎報」只會得番個「最佳標題獎」,今年竟然爆冷門,「南華早報」在英文獎項,輸得幾慘吓。嗱,最佳英文新聞獎冠軍係「中國日報」 China Daily香港版,亞軍與季軍都係「英文虎報」;最佳英文經濟新聞寫作獎,「虎報」得冠軍,季軍,「南早」得亞軍;最佳標題獎,「虎報」囊括冠亞季軍。呢啲賽果,左丁山幾乎不敢相信,「南華早報」究竟搞邊科,竟然俾一張免費派發嘅「虎報」壓下去?有咁啱得咁蹺,「虎報」與「星島」同系,競選時挺唐,而「南華早報」總編副總編今年換上新人,總編係內地人,競選時傾向挺梁,充份突顯練乙錚教授所講之「板塊之爭」,七月一日後,「南早」有望取回九七前「政府英文消息報」嘅地位。之不過,「南早」去年嘅新聞在英文新聞比賽輸到冇晒威風,兩位新人老總副老總今年要出真功夫咯。睇過啲結果,忍唔住打電話俾虎報老總T恭喜佢兩句,老總T話:「唔好以為我地係免費英文報,質素就會差一啲,我地會繼續努力㗎!」

PermaLink: https://articles.zkiz.com/?id=32653

Next Page

ZKIZ Archives @ 2019