ZKIZ Archives


合約糾紛未完 被貼街招連累父母江若琳精神受折磨 月跑逾10萬填數

1 : GS(14)@2017-01-18 08:04:26

■江若琳孭着合約官司,更試過被貼街招連累父母,精神飽受折磨曾患上抑鬱。攝影:沈健程



【《蘋果》專訪】一個少女追夢入娛樂圈的故事,05年江若琳陪朋友參加電視劇選角招募,結果自己幸運地入行,但簽了十年死約零收入,兩年多前為回復自由身跟公司打官司,合約糾紛仍未完,孭下一筆龐大律師費,更被貼街招連累父母,結果江若琳離鄉別井北上賺人仔,每月要跑數逾10萬應付開支,曾飽受精神折磨患抑鬱,她說:「感覺好孤獨,食同住冇屋企好!」



現年29歲的江若琳歌影視三線發展,由冇背景冇家底的少女,捱到13年憑電影《高舉.愛》角逐第32屆香港電影金像獎影后,雖然輸給了楊千嬅,但卻打響名號不再是花瓶,惟翌年爆出與前經理人公司寰宇有合約糾紛,江若琳自爆過去十年死約零收入,寰宇老闆林小明指她簽了15年合約沒權解約,雙方對簿公堂,至今兩年多仍未解決。孭下大筆律師費的江若琳北上賺人仔,今年為紀念入行十年決意回歸。



■江若琳與林小明旗下寰宇的合約糾紛,兩年多仍未解決。資料圖片

■寰宇前老闆娘趙雪英,一手提攜江若琳入行,最終反面收場。資料圖片

■江若琳經常離鄉別井工作,沒有家人在身邊的她直言感覺孤獨。


「我唔可以認輸」

日前江若琳於西環接受本報專訪,當日離寰宇時孑然一身的她,最難過是連累了父母:「我被人貼街招,媽咪爹哋趁我出街時去街搣咗,我之後先知呢件事,但被冤枉同侮辱係最難受。試過去食麵,俾店員兜口兜面批評,我到?家唔放棄,堅持留低,我要用自己努力證明大家係睇錯,向不公平低頭,就代表我默認一切,我唔可以認輸,父母當日搣街招都好委屈。」為了賺錢,江若琳決定返內地尋出路,慶幸有閨蜜不離不棄,兩個女人北上打江山:「我間公司好龐大,得兩個人,我冇後台冇勢力,社會上工作講勢力講關係,有啲導演會話其實好想用我,但其他人公司較優勝。今時今日仲有嘢做,嗰啲人真係欣賞我。」至於跟寰宇的合約糾紛,纏繞兩年多仍未解決。這場持久戰,曾令江若琳飽受精神折磨,一度患上抑鬱症:「我計過條數,每月一定要跑6位數字,我先可以正常生活,我要畀龐大律師費同養家。一收工搭幾個鐘機再搭車,去到唱兩首歌,唱完又搭車同轉機返劇組,冇瞓過再埋位。」



■過去兩年江若琳北上拍劇,更擔正《巾幗大將軍》,每月跑逾十萬元才能填數。劇照

■江若琳曾憑電影《高舉.愛》角逐香港金像獎影后,雖然輸了,但演技被肯定。劇照


離鄉別井好孤獨

離鄉別井的江若琳經常想起家人:「感覺好孤獨,食同住冇屋企好,有時去到每個城市,唔知自己喺邊度,拍戲收工返去對住四面牆,收工冇人傾偈。不過只要有工開,人就有安全感,壓力低好多,好過喺香港瞓覺愁呢個月費用。我?家變得睇每件事都雲淡風輕,好懂得去快樂,十年經歷變成我嘅正能量。」爭氣的江若琳兩年來拍了十部電影,她形容過去十年刺激似坐過山車:「未望到高處,我就落咗低谷,我要多謝畀我唔同故事嘅人,佢哋成就到今日嘅我。」換句話說江若琳都要多謝林小明:「呢十年佢畀我好多機會,對佢唔會有任何仇恨,我哋只係合約同金錢糾紛。」



■也許是江若琳天生倔強性格,令她可以一直堅持下去,再捲土重來。

■江若琳笑言有時工作辛苦,都想身邊有人可以傾訴。

■江若琳表示有工作便有安全感。


■江若琳北上搵食並非一帆風順,全靠一點一點累積聲譽。

■江若琳稱每月要有六位數字收入,才可以過正常生活。

■出道十年,江若琳決定今年以歌手身份回歸樂壇。

採訪:陳杰、吉吉場地:Bistronomique髮型:Kel Fung of HH Hair




來源: http://hk.apple.nextmedia.com/entertainment/art/20170117/19898923
PermaLink: https://articles.zkiz.com/?id=322930

Next Page

ZKIZ Archives @ 2019