ZKIZ Archives


搶地起樓 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20131031/18486273

「蘋果」財經版在星期一報導,火炭樂林路有一塊細地皮,約一萬三千平方呎不到,可作低密度發展,建成樓面面積約五千平方呎。在樂林路冇理由起四五百呎細單位嘅箒,要起碼千二呎先至夠睇頭,賣得起價錢,即係話將來可能只得四個單位落成,政府勞師動眾搶地皮起樓,得四層樓(一梯一伙共四層)四個住宅,值唔值得呀?除非賣地時再加限量或限呎條款,否則由一位億萬富翁買嚟興建一間獨立屋好過,唔會阻住後面樂林小築吖嗎。
樂林路幅細小地皮在榕翠苑後面,十分清靜,平時用途不多,估唔到政府都要徵用之,附近居民唔反對至奇。左丁山覺得特區政府真可憐,龐大新界東北土地開發有阻滯,就發茅搶塊小空地,冇厘氣魄,梁振英若想真有作為,夠膽嘅就宣佈將整個火炭工業區活化,業主可申請將工業大廈改作住宅用途,如此又可住多十萬八萬人,遠勝在樂林路搶幅地起樓俾十零人居住。
香港居民對住宅需求甚殷,與可建築地皮有限有關,本港有百分之七十土地因種種原因限制,不能用作起樓之用,居住人口只在剩餘之土地打轉,工廠、醫院、商廈、工廈、住宅、球場……乜都擠在一起,樓價有乜辦法唔長期看升。一位前輩在午飯時睇電視新聞,講起樓價,佢話:「我年紀與黃志祥爸爸黃庭芳差不多,睇住羅拔仔來香港買尖東土地(尖沙咀中心),記得當年在新加坡與黃庭芳傾偈,佢話新加坡土地有限,要到香港發展地產,我問佢點解唔去泰國、馬來西亞,佢話新加坡與香港同是小島城市發展金融業,地少人多,土地不足,經濟發展快,係最佳做地產生意嘅城市,唔想去其他地區嘥精神,現在諗番,佢真係眼光獨到,我唔做地產確係有啲笨!」咁又未必笨嘅,前輩發展其他生意,一樣搵到盤滿缽滿。同枱另一位前輩則細細聲同左丁山講:「人地發達各有前因,千祈唔好跟風呀,一位福建幫貿易商人見地產好搵,97前學人投資小西灣藍灣半島,你知後果如何啦!」

PermaLink: https://articles.zkiz.com/?id=80445

中資高價搶地起樓6大地產商市佔料跌至六成

1 : GS(14)@2016-11-16 05:08:16

【本報訊】啟德地皮早前由中資海航集團以天價88億元奪得,震撼市場之餘,更揭示本地地產界正醞釀洗牌。有分析員指,港資大型地產商如長實(1113)、新地(016)等,近年地皮招標時出價審慎,反而中資地產商卻因規避人民幣貶值,頻在港搶地,相信有關趨勢會持續,而高價搶地更可能損害本港樓市。


人幣貶值觸發走資

市場早有共識,人民幣貶值將加速中資企業到海外收購,重新分配資產,香港是首選地之一。星展唯高達研究部董事吳淑燕表示,假設人民幣未來每年貶值2%至3%,中資今天來港所購入的資產,三年後單計外滙損益而升值近10%,故此人民幣貶值成為他們搶貴地的主要理由,若將來樓盤建成,售價較成本升30%至40%,賬面上已可達到收支平衡。據本報統計過去數年住宅地皮的投標結果(見表一),中資2011年在港只投得一幅地皮,但今年截至上周止已投得六幅,比例增至30%。而近年中資出價明顯進取,他們投地金額佔比,更由2011年時的1.7%,升至目前的43%。而據團結香港基金研究顯示(見表二),估算2016年至2019年間,六大本港地產商所佔落成單位數目,將由79.8%降至62.1%。中資則由3.2%升至8.3%。但上述數據只反映過去三、四年間中資來港投地情况,過去他們較少涉足香港地產,但未來勢成本地一股新興力量。






「對樓市唔係好事」

有中資發展商前財務總監坦言,香港樓價會繼續「癲癲地」,中資明知樓市後市不明,但人民幣近月貶值加快,促使更多中資湧入本港收購資產,較易獲內地當局放行,變相滙出資金。「不止住宅地,商廈、工廠有啱嘅會成幢咁買,個泡沫越來越大」。吳淑燕表示,中資地產商不算了解香港市場,「可能計錯數都唔出奇」,但一旦地產商高價投地後,將來所推售樓盤亦相應調高售價,樓價居高不下,「對香港樓市唔係好事」。有美資行分析員稱,中資高價搶地,本港大地產商「一係不理風險跟追」,否則市佔率會一直跌。他估計本港6大地產商,以落成單位數量計算,將會由今年約70%,跌至2019年時近60%,中資佔比仍只約5%,其餘由中小型地產商奪得。記者:岑梽豪 方楚茵




來源: http://hk.apple.nextmedia.com/financeestate/art/20161114/19832935
PermaLink: https://articles.zkiz.com/?id=315615

綠化地起屋 團體質疑益發展商

1 : GS(14)@2017-01-22 01:56:54

【本報訊】特首梁振英企圖發展郊野公園邊陲大計已悄悄落實,發展局26幅新覓得具發展住宅潛力地皮,約10幅為綠化地帶土地,包括兩幅毗鄰馬鞍山郊野公園的綠化帶用地,將發展約3,000個公營及私營單位。長春社批評計劃不單為郊野公園帶來發展壓力,鄰近新鴻基地產豪宅項目地皮因交通問題一直未動工,質疑政府借發展以公帑建路益發展商。港府前年已被踢爆低調為馬鞍山郊野公園旁綠化帶建屋進行研究,在環團強烈批評下,政府堅持將相關位置納入建屋潛力用地。該地皮位處昔日馬鞍山礦場礦工聚居的信義新村附近,擬發展公營房屋;另一幅則位於馬鞍山下村附近,擬興建私樓。


受惠公帑建路


長春社助理公共事務經理吳希文指在郊野公園邊陲建屋必帶來道路擴闊等工程,擔心政府日後以區內已建配套為借口增加發展。他續指發展商新地早年已獲准在馬鞍山下村附近興建豪宅,礙於交通問題,需自資擴建道路惟一直未動工,今次隨時受惠政府發展,由公帑建路變相益發展商。沙田區議員容溟舟憂慮建屋位置接近前馬鞍山礦場的110礦洞,影響礦場建築群保育。另外,名單亦包括原劃作旅遊用途的馬灣南面地皮,擬改建私樓。早於2000年,新地曾協助「雪樂園」向港府申請批地,在有關地皮興建室內滑雪場及體育樂園,及後告吹。地皮改為公開招標,雪樂園再入標,長實亦入標擬建武俠小說角色主題樂園,均被否決,地皮丟空至今。■記者鄭啟源




來源: http://hk.apple.nextmedia.com/news/art/20170121/19904329
PermaLink: https://articles.zkiz.com/?id=323485

88歲外婆避霧霾林作媽蘇梅島買地起屋

1 : GS(14)@2017-02-12 15:44:00

2017-02-09 NM

剛過去的農曆年假期,林作媽(王莉妮)帶隊,一家十一人齊飛泰國蘇梅島度歲,其中包括88歲的外婆以及胞妹、姨甥等。經常香港、深圳兩邊住避霧霾的外婆,對空氣清新的蘇梅島極度喜愛,更有意得閒過去住吓。奉母至孝的林作媽即時動腦筋,在當地投資五百萬買地起屋,既可自住又可出租,加上有升值潛力,一舉數得。五百萬有交易

向來喜歡投資磚頭的林作媽,早前便以六千五百萬購入半山麥當奴道一個複式豪宅,農曆年間,舉家到蘇梅島享受陽光與海灘,入住日租要一萬元的豪華度假屋,竟又挑起她的生意筋,計劃沾手蘇梅島房地產。「其實主要原因係(林作)外婆好鍾意嗰邊環境,佢好多時香港、深圳兩邊住,就係要避開霧霾,今次响蘇梅島玩咗幾日,空氣好又成日見到陽光,佢老人家覺得好舒服,好想可以住耐啲;老人家出到聲,我咪即刻搵經紀問吓價,如果喺海邊買地起屋,就一百萬美金左右,山上嘅就平啲,大概五百萬港幣,真係唔算貴。其實近年好多內地人鍾意喺嗰度買屋,搭三個鐘飛機就到,所以有升值潛力。」林作媽說。唔怕隔山買牛的林作媽,把握時間,在當地度假期間,已睇中兩個地段,最後決定選擇在山上買地起屋。「我哋今次本來book咗間海邊度假屋,但因為怕落雨水浸,最後改咗住山上面。山上嘅度假屋比較穩陣,價錢又平成兩百幾萬,一樣有海景,比較化算。我打算起一幢連花園泳池嘅三層屋,面積大概有一萬六千呎。復活節會飛多一次,睇埋啲細節,到時就會落實所有嘢。」

林作投反對票

過去在深圳、北京以及香港都有投資磚頭,做環保生意的林作媽眼光有番咁上下,不過林作對她投資蘇梅島物業的決定,一度投反對票。「阿Joe而家成日都要捱夜睇文件預備官司,試過有啲客失驚無神朝早六點send啲資料俾佢,又要即刻覆人,佢話搵錢好辛苦,叫我諗清楚先投資。不過見外婆咁鍾意,佢都冇再反對,其實度假屋可以好似酒店公寓,出租俾人回報唔錯,係值得投資。「之前話我買麥當奴道間屋係買俾阿Joe,梗係唔係啦!其實係我自住同招呼朋友,去蘇梅島前一日,有個駐北京嘅貝寧國大使嚟同我拜年,我都喺新屋招呼佢。」林作媽說。交遊廣闊的林作媽,不單投資跨境,人脈亦跨國,早前更被委任為西非貝寧國駐北京大使館的經濟及文化顧問。

林作媽同八國總統開會

今年初,林作媽被邀擔任貝寧駐北京大使館經濟和文化顧問,她說:「係朋友介紹我哋認識,佢覺得我哋可以幫到忙,咪邀請我做顧問。遲啲我做會長嘅中貝西非友好促進會會舉行8+1峰會,到時會同埋領導人、西非八國總統一齊開會。」

撰文:歐陽慧芯
PermaLink: https://articles.zkiz.com/?id=326604

Next Page

ZKIZ Archives @ 2019