四太14億大手筆買地做埋發展商起屋
1 :
GS(14)@2016-10-24 04:20:54四太梁安琪大手筆出資幫超盈、超欣置業，有咁好父母幫手做生涯規劃，真係好幸福！其實四太一向都有買賣物業嘅習慣，已經縱橫地產界廿幾年，絕對稱得上係老手，佢早期除咗投資信德中心、星光行呢類寫字樓，仲買入過好多豪宅同地舖。淨係計四太喺香港嘅單幢物業組合價值，就已經超過300億，如果加埋海外物業，資產價值就過千億，令好多人望塵莫及。上年初，四太仲成立咗私人投資公司尚嘉（L'Avenue），由前恒隆地產（101）執董吳士元擔任行政總裁，至今加加埋埋用咗成34億入貨，包括以5.48億元奪得元朗新潭路洋房地段，以及14.01億元投得屯門青霞里官地，由投資者變埋發展商自己起屋！但唔好以為四太起屋係新丁，佢12年嗰時就將山頂貝璐道6幢三層高獨立屋，改建成4幢洋房，升值約9億元。四太最犀利嘅投資，就係05年以27億收購中環娛樂行，持貨11年，現時娛樂行估值超過80億，淨係睇賬面都賺50億！
來源:
http://hk.apple.nextmedia.com/entertainment/art/20161023/19809817