ZKIZ Archives

財經評論 ：樓市一啲都唔淡靜

1 : GS(14)@2016-08-09 07:31:13

過去三個月，上車新盤首日銷售率通通超過八成，有三個新盤首日銷售率甚至達到94%至99%，你可以話首日啫，但追縱住呢啲新盤，啲貨尾逐啲逐啲咁去貨喎。訪問過買家，真係至理名言，「定價貼近二手，點解要買又殘又舊嘅二手樓」。係呢度，但願你沒遇上天賦海灣，三年前我直擊1,300萬元豪宅，天花敲一敲，3吋長批盪成塊剝落。仲想提吓啲新盤管理費，每呎近4元，400呎單位，個個月交1,600元，好似交陀地。比較番二手樓，好似嘉湖山莊，兩房每月交唔夠900元，小數怕長計，月慳700元，成年慳返8,400元。有人會話新樓有會所又點同，但又要小心，一旦遇上九龍城The Avery341呎嘅會所，連健身單車都無，到時你想向發展商還以一記納爾遜式鎖。或許一名新盤買家受訪的sound bite最能道破二手樓死穴，「怕買入化妝樓」、「怕遇上屋苑大維修」。所以本人與同事幾次遇到抽極新樓都抽唔到，仍然堅持要買新樓嘅case。唔好用二手成交量去評定樓市旺與淡，政府辣招，買樓鎖三年，造成二手長期缺盤，正如代理話齋，「賣一間少一間」。根本二手樓連搵間睇吓都無，早前想搵嘉湖山莊鎖匙盤，竟要出盡九牛二虎之力先搵得一個半個，屋苑有1.6萬伙㗎！二手徘徊3,000宗水平將會成常態。望都唔好望政府撤辣，唔太相信一個龜縮嘅執政者，係樓市好好地情況下會挑起牽連大波。最後一季，元朗Grand Yoho、南昌站呢啲矚目大盤，我相信市場將出現餓狗搶屎的盛況，呢兩件超正筍盤如果定價唔狼，一鋪沽清唔係天方夜譚，到時還有誰會再敢說樓市很淡！記者：陳家雄





來源: http://hk.apple.nextmedia.com/financeestate/art/20160809/19728334

---

財經評論：劏房越劏越細　肥啲都住唔到

1 : GS(14)@2016-10-10 00:42:23

以前買樓要睇size夠唔夠大，啱唔啱用；而家買樓都要睇size，不過就係掉番轉，睇吓自己個size夠唔夠細，塞唔塞得落呀。最近發展商開嘅則，已經唔係叫「奇則」，升level叫「神則」。有幾「神」？先講四叔嗰兩個盤，一個加多利軒，嗰個閂唔到門嘅廁所，真係隻腳長多兩吋，閂咗門都要頂住呀……人哋話個玻璃門係沖涼嗰陣先閂埋，平時去廁所係閂浴室道門，仲話參考好多酒店嘅設計㗎。嘩，真係唔該晒喎，以前買樓要有家的感覺，但而家發展商嘅設計話畀你知，買樓要有住酒店嘅感覺，酒店都唔只190呎啦（膠囊除外），又唔見你開大啲。另一個南昌一號595呎劏四間房，最細嗰間房得44呎，坐監嘅人均標準空間都49.5呎啦，瞓嗰間房真係仲慘過坐監囉。不過講到明係「神則」，最「神」嘅就梗係396呎劏三房，其中一間仲要得37呎，即係有幾大？都幾大㗎，最少我嗰個4.99呎高嘅同事瞓落去，都仲有少少位剩，不過同事想喺間房拉吓筋、做吓瑜伽就頂住晒囉。人哋個設計剩係畀你瞓，搞咁多嘢做咩啫。都話南昌一號幾有人性㗎啦，點有人性法？咪就係話你知，高過5呎唔好瞓嗰間房囉。其實啲新盤真係好鼓勵較肥嘅朋友減吓肥，就好似田少家族旗下嘅何文田The Argyle，其中一個三房單位，最細嗰間房得30呎，一拉張單人床出嚟，咩位都冇晒，撼贏晒四叔啲「神則」。佢仲有個「賣點」，就係套廁除咗有淋浴間，仲有個超大型洗手盤……係浴缸先啱，佢個size係2.3呎乘1.8呎，深2呎幾。簡單啲講，即係小朋友之外，其他人都唔使旨意浸晒全身。浸浴都係想放鬆吓啫，佢咁嘅size，浸又浸唔晒全身，伸腳又頂住晒，坐落去仲有侷促嘅感覺，肥多少少都未必坐得落，咁浸嚟做乜？所以話，而家買樓或租樓之前，除咗睇你有冇錢之外，仲要睇埋你個身型，又高又肥又大隻嗰啲，有錢又點，啲單位塞得落咩？記者：何紫恩




來源: http://hk.apple.nextmedia.com/financeestate/art/20161008/19794485

---

校委同被圍：一啲都唔驚

1 : GS(14)@2016-12-21 23:33:38

【本報訊】紀文鳳供稱被包圍時很害怕，生命受威脅，不過同時被圍的港大校委黃景強卻相當淡定。黃稱起碼幾十人包圍他和紀，其間紀顯得不適，「佢企唔到，挨向我度，用手扶住我」，他只想事情盡快完結。辯方問黃「驚唔驚」，黃表示「一啲都唔驚」，只是「紀文鳳好驚」。辯方指黃在紀身邊是為了令她安定，是紳士行為，黃笑指大狀道出了他心中所想，「多謝你嘅提示」。港大保安主任黃國章昨亦作供指，當晚沒人受傷已屬不錯的結果。辯方指沒人受傷是因學生不想打傷校委，並謂「要打容乜易箒」，黃同意這是原因之一：「我好相信港大嘅學生就算好verbally abusive（言語辱罵），但都唔會郁手郁腳。」辯方問他，在沒警察協助下安排校委離開大樓是否不理想，黃說：「我好proud of（自豪）我個決定。」■記者勞東來




來源: http://hk.apple.nextmedia.com/news/art/20161221/19872349

---