【問爆你阿媽1】你初吻幾時？ 假如我做咗人哋第三者...
1 :
GS(14)@2017-05-18 02:14:18母親節點慶祝好？最好梗係同媽咪情深對話！媽咪Yan好緊張追問囡囡Sissy幾時初吻，Sissy話發生喺亞馬遜......~
母親節點慶祝好？最好梗係同媽咪情深對話！三對母子母女，媽咪Estella+仔仔Jeff、媽咪Yan+囡囡Sissy，同埋媽咪Elaine+囡囡Sanke互相問問題，究竟仔女有幾了解阿媽，阿媽又有幾清楚自己仔女呢？第一回：愛情篇！第一條問題就令三位媽咪都好興奮：「你嘅初吻喺幾時？同邊個？」媽咪Estella話從來無問過仔仔Jeff呢條問題，Jeff就答得大路啲，話中學初戀咪Kiss過囉！媽咪Yan都好緊張咁追問囡囡Sissy，Sissy就交代得清清楚楚喇，話初吻發生喺亞馬遜......
講到初吻，仔仔Jeff話未成年就錫錫，媽咪Estella就關心問多句...
講到愛情，媽咪Elaine話有擔心囡囡Sanke嫁唔出...
假設題1，媽咪問爆仔女：「如果我同你另一半一齊跌落水，你會救邊個？」仔女都話睇下邊個唔識游水就救邊個，仲話會搵個識游水嘅另一半，咪唔使煩囉！不過媽咪Yan就話有另一個答法...至於仔女就問爆阿媽：「有冇擔心過我嫁唔出／娶唔到老婆？」、「如果我做咗人哋嘅第三者，你會點？」三位媽咪講出真心話，媽咪Yan聽到「第三者」直頭發火添，即刻去片！記者：鄒倩婷（阿仙）攝影：陳家文、峰剪接：Roy
來源:
http://hk.apple.nextmedia.com/entertainment/art/20170515/20021770
【問爆你阿媽2】有冇偷睇AV？偷睇日記咁恐怖？
1 :
GS(14)@2017-05-18 02:14:19問到有冇偷睇日記，媽咪Yan嘅答案最恐怖！
三對母子母女，媽咪Estella+仔仔Jeff、媽咪Yan+囡囡Sissy，同埋媽咪Elaine+囡囡Sanke互相問問題，究竟仔女有幾了解阿媽，阿媽又有幾清楚自己仔女呢？第二回：生活篇！敏感題，仔女問爆阿媽：「你有冇睇過AV？」三位媽咪一聽AV都窒一窒，諗一諗，有定無？佢哋都誠實回答。私隱題，仔女再問爆阿媽：「有冇試過偷睇我日記或電話？」媽咪Estella同媽咪Elaine都話一半半啦，「咁你手機擺枱面，行過咪望吓囉！」至於媽咪Yan就......囡囡Sissy聽完，大叫「好恐怖呀你！」你的第一次，仔女繼續問爆阿媽：「第一次飲醉酒係幾時？」三位媽咪都話無乜飲酒，不過媽咪Yan就大爆囡囡Sissy落蘭桂坊飲酒嘅趣事......
問到有冇離家出走，囡囡Sanke坦白話有，真係擔心死媽咪喇！
至於媽咪Estella同仔仔Jeff，對「離家出走」就有另一番經歷！
生活題，輸到阿媽問爆仔女：「我電話號碼幾多號？」三個孝順仔女都記得晒阿媽嘅電話號碼，不過，倒返轉問阿媽，佢哋各自都有兩至三個仔女，會唔會混亂咗阿哥、家姐、阿妹、細佬嘅電話號碼呢？阿媽再問爆你女：「你有冇諗過離家出走？」囡囡Sanke自爆初中反叛期試過，媽咪Elaine話嗰時擔心到死，後來先知Sanke係去咗同學屋企。至於囡囡Sissy就話唔會離家出走，就算鬧交鬧到癲咗，都一定唔會離開現場，因為離開便輸了！而仔仔Jeff無試過離家出走，只係大學住宿舍搬走過四年，媽媽Estella喊住話，當時個心竟然係想趕佢走......即刻去片！記者：鄒倩婷（阿仙）攝影：陳家文、峰剪接：Roy
來源:
http://hk.apple.nextmedia.com/entertainment/art/20170515/20021778
【問爆你阿媽3】假如送你去老人院...會唔會唔生我？
1 :
GS(14)@2017-05-18 02:14:19唔知媽咪Elaine嘅大仔同細女聽到，會唔會呷醋呢？
三對母子母女，媽咪Estella+仔仔Jeff、媽咪Yan+囡囡Sissy，同埋媽咪Elaine+囡囡Sanke互相問問題，究竟仔女有幾了解阿媽，阿媽又有幾清楚自己仔女呢？最終回：關係之最！最愛，仔女問爆阿媽：「最鍾意邊個仔女？」標準答案：「無分，一樣咁錫！」不過，啲仔女唔係咁睇喎......最嬲，阿媽問爆仔女：「最嬲我嘅一次？」話晒兩母女，邊有隔夜仇，講到嬲，Sanke同Sissy都話諗唔到。不過仔仔Jeff就大爆，有次真係堅嬲，連媽咪Estella都反問：「你真係有嬲過我o架？」無錯，事源係雨傘運動......
最啱timing，仔女問爆阿媽：「生我嗰時係咪最啱timing？如果再揀，你想幾歲生我？」媽咪Estella同媽咪Elaine都話計劃好生仔仔Jeff同囡囡Sanke，時間啱啱好，不過媽咪Yan就話：「太早生喇！」竟然仲話，如果再揀唔想生添！咁咪無咗Sissy囉！？最後，阿媽問爆仔女：「將來你會搬出去，定會同我住，定送我去老人院？」你以為一齊住係標準答案？No, No, No......即刻去片！
兩母子邊有隔夜仇，不過有一刻真係嬲...
媽咪Yan竟然話如果有得揀，唔想生！Sissy陰公豬...
深情後記：
Sissy給媽咪的話：「雖然你話想無生過我同哥哥，但係其實你都係40歲唧，都好後生嘅，可能你嘅青春就40幾歲先開始，你嘅人生係調返轉，所以唔使擔心，我會放你出去o架！」
Yan給囡囡的話：「唔需要搵好多錢，諗住要照顧屋企，總之你想做自己鍾意做嘅嘢，咁就無問題o架喇！」
Sanki給媽咪的話：「我聽到你好在乎老人院嘅話題，唔使擔心喎，我哋一定會照顧你！」
Elaine給囡囡的話：「希望你快啲搵到男朋友！」
Jeff給媽咪的話：「媽咪，教咗我同大佬廿幾年，我哋終於成長喇！希望喺豐收期嘅日子，同你，同埋天上嘅Daddy，一齊享受生活！」
Estella給仔仔的話：「努力！繼續展開你美好嘅人生，唔使成日擔心媽咪嘅身體，人生自自然然會老去，我哋享受目前大家美好嘅時光！」祝各位媽咪母親節快樂！記者：鄒倩婷（阿仙）攝影：陳家文、峰剪接：Roy
來源:
http://hk.apple.nextmedia.com/entertainment/art/20170515/20021787