ZKIZ Archives


唔讀就罷 左丁山

2011-4-26  AD
   


食家L位公子原 來在大大大名校讀小學,最近正為教科書價錢問題,有人問起佢平時有冇關注,食家L話佢個仔間學校用啲課本幾深吓,除本港標準教科書外,亦用大陸內地用規範 漢語寫成嘅中文教本,學生要讀,水準幾高噃。就因為咁,曾有家長投訴內容過深,搞到學校要開「聽證會」,由校長親自主持。呢間學校嘅家長唔係律師、醫生、 高級公僕、會計師、賓架,就係成功生意人、作家等等,人人不畏權貴,踴躍發言,為子女請命。食家L話:「我都未見過學生家長可以咁威猛嘅!」然則學校飽受 批評之餘,豈非要檢討、改進?食家L話:「非也,我更加未見過校長有咁權威嘅。校長聽完之後,答得簡單直接,指出本校嘅教學要求就係咁咁咁,必須培養學生 之中文能力有如內地學生,故此用內地中文課本,各位家長請確保貴子弟能夠追得上,否則……」一講完,家長靜晒喎。
嗱,大大大名校就威得起嘞,貴子弟讀唔掂呀,搵補習先生囉,再唔掂呀,可以去中文中學,請便,講完。大狀L聽完食家L講古仔,哈哈笑,問食家L:「你有冇請三個補習先生跟住你位公子呀?」
前 一排,有人放過風話不排除引入內地教科書,特別係中文與數學方面,呢啲消息係用嚟嚇本地教科書出版商嘅,但聽食家L咁講,平民子弟在平民地區讀中文中學 嘅,根本難以適應內地教科書嘅程度,內地高幾皮,香港學生會讀壞,除非引入小四課本俾小六及中一學生讀(中文與數學);但才女W係學校家長教師會主席,佢 話根本都冇可能,因為香港教學課程有一項要求叫做「後設認知能力」,教科書要以相關習作(exercise)配合,內地教科書唔掂噃。
吓? 咩嘢呀?立即拿出iPhone上網,查吓乜東東係「後設認知」,查到英文係認知cognition,後設認知係metacognition,主要意義係 「認知的認知」(cognition about cognition),也就是指一個人對自己的認知思考或記憶等的內在心理歷程進行理解……唉,睇到暈得陣,香港啲教科書設計全部係教育局專家嘅傑作,書 商以高昂成本去執行兼食死貓。

PermaLink: https://articles.zkiz.com/?id=24545

Next Page

ZKIZ Archives @ 2019