ZKIZ Archives


中環在線:方卓如唔撈CEO選議員 李華華

2008-07-25  AppleDaily



財 經專欄作家、以筆名方卓如行走江湖嘅龔耀輝(Ronald),由於要競逐今年立法會選舉會計界功能界別議席,噚日辭去中國金融租賃集團(2312)行政總 裁兼執行董事,專心為嚟緊立法會選舉拉票,公司通告指佢嘅職務仲未搵到人接手,暫時由執董陳志鴻做住署理行政總裁先。Ronald辭職唔難理解,事關04 年佢亦有參選會計界功能界別議席,對手同樣係今年有參選嘅譚香文同陳茂波,當年Ronald輸個馬鼻得第三,今次捲土重來,不容有失,佢出書自揭方卓如身 份都係為咗提高知名度。

棄15.3萬月薪

會計出身嘅Ronald舊年先放棄做咗十幾年嘅老本行,辭去均富會計職務,轉去中國 金融租賃做CEO,華華記得當時佢出席公司記者會時,對新工作雄心勃勃,將公司轉名(前稱金豐21投資),業務亦由證券投資,轉型主攻中國金融租賃市場, 估唔到家陣做唔夠1年就唔撈。華華睇番中國金融租賃07年年報,由於Ronald 10月先過檔,做得3個月,以月薪計袍金連薪津,1個月約15.3萬銀,同立法會出年嘅6.5萬蚊人工相比,真係差一大截,雖然話立法會議員有153.4 萬銀實報實銷津貼,但都只係用嚟畀議員請助理同租辦事處,今次Ronald放棄一切擁抱立法會,仲未必得緊,佢都算好大勇氣,睇嚟政治真係有莫大嘅魔力。 電郵:[email protected]
PermaLink: https://articles.zkiz.com/?id=1490

中環在線:核數師唔撈聯康多嘢講 李華華

2008-08-29  AppleDaily

上 市公司更換核數師並唔係新聞,唔少公司隔三、四年就換一換,就算會計師對公司嘅財務報表有保留意見,甚至辭去公司核數師一職,一般都只喺通告上簡單交代就 算。噚日華華睇到聯康生物科技(690)更換核數師嘅通告,竟然水蛇春咁長,用幾段嚟解釋更換核數師嘅原因,都算少見。

已採取積極合理措施

通 告話,陳葉馮會計師事務所辭任集團核數師,原因係「在編製及審核末期業績之過程中,董事會已盡最大努力配合陳葉馮要求,以期盡快完成對末期業績之審核。」 既然董事會盡咗最大努力配合,咁應該好順利o格!不過,通告話,雙方「未能就陳葉馮就完成對末期業績之審核所要求之額外核數費用,同業績審核時限達成共 識。」聯康生物科技喺今個月1號已停牌,要等搵到新嘅核數師,出咗末期業績先復牌。你急我唔急,想急要加錢,唔加咪搵另一個幫手囉!
PermaLink: https://articles.zkiz.com/?id=1931

中環在線:周凱旋契仔唔撈TOM 李華華

2008-09-04  AppleDaily



TOM 集團(2383)王雷雷唔撈傳聞,噚日終於變成事實。TOM集團出通告話,王雷雷一次過辭去副主席同執董、TOM在線首席執行官兼董事,仲有唐碼易趣中國 董事等職務,原因通告冇講明,只係話為咗個人事業發展。華華搵TOM仔問吓,回應只係話王雷雷係為咗「實踐個人抱負,再創事業另一高峯」。

人事又變散戶擔心

TOM 仔起初由張承勷揸fit,到最新話事人楊國猛,過去幾年,數度易帥。次次都引起市場唔少揣測。遠嘅唔講,先講新鮮滾熱辣呢單,王雷雷係超人紅顏知己周凱旋 嘅契仔,呢次劈炮,究竟係契媽叫嘅,定係契仔意思,華華要收吓風。不過,王雷雷一向負責集團最搵錢嗰瓣業務──TOM在線。據電訊界嘅朋友講,TOM在線 曾經喺mobile彩信上,同新浪、搜狐、QQ等,爭市場佔有率。佢一走,對TOM都唔可以話冇影響。睇番呢幾年TOM集團嘅人事變動,都唔到投資者唔擔 心,首先負責做刁、投資銀行家出身嘅王兟先走,跟住,最叻管數嘅湯美娟又話要湊仔唔做,家陣連銀嘅王雷雷都唔撈,咁TOM仔仲有乜搞作呢?

曾戲稱大股東做老頭

講 番王雷雷,佢長駐北京,好少落嚟香港。前年佢接受《北京晨報》嘅一篇訪問,可以反映王雷雷都幾快人快語,當時篇報道係有關盛傳TOM在線買起新浪,王雷雷 被問到TOM董事會有乜建議時,佢居然答:「大股東都是老頭兒老太太們,不知道TOM做的彩信彩鈴是甚麼玩意,他們只跟我聊些做人道理。」佢講嘅大股東係 邊個?大家心照。李華華電郵:[email protected]
PermaLink: https://articles.zkiz.com/?id=2037

中環在線:黃奕鑑唔撈路訊通 李華華

2008-11-24  AppleDaily


 

路 訊通(888)又有人事變動。繼上月尾,一手湊路訊通上市嘅伍穎梅由執董轉任非執董後,代表最終控股公司新鴻基地產(016)嘅老臣子黃奕鑑亦唔撈。上個 禮拜五,路訊通發出通告,公司副主席兼非執董黃奕鑑因為有其他工作需要,已辭去路訊通副主席兼非執董,職位由容永忠補上。黃奕鑑喺路訊通做咗8年董事,算 係開國功臣,睇住路訊通上市發展。今次接替黃奕鑑入局嘅容永忠,都係新地人。容生今年61歲,係新地嘅顧問,同時亦擔任數碼通(315)非執董,佢亦係路 訊通阿媽載通(062)嘅代行董事。容永忠95年加入新地,之前喺美資銀行打工多年,今次佢出任路訊通非執董,每年可5.5萬銀董事袍金。
PermaLink: https://articles.zkiz.com/?id=4107

中環在線:陸恭蕙搞環保唔撈港交所 李華華


2009-03-05  AppleDaily





 

港 交所(388)董事會今年將會大換班,最意外係06年同「股壇長毛」David Webb雙雙入局、思匯政策研究所行政總裁陸恭蕙(Christine)忽然話唔再爭取連任。佢同華華講,唔係因為Webb舊年5月辭職覺得冇癮,而係董 事任期3年屆滿,自己原本只想玩一屆,適逢今明兩年又要搞環保大業,有好多時間唔喺香港,況且當初入港交所要實現嘅目標,已初步達到,好似今年會推嘅碳排 放期貨交易,就算未見產品「出世」,離開都冇乜遺憾。

戰友Webb轟管治跌watt

「恩人」Webb就唔評論 Christine點解棄權,但佢批評港交所嘅企業管治,喺前年9月政府增持股份後就開始勁跌watt,佢今年唔會再鼓勵好友競逐董事咁話。 Christine嘅空缺,提名委員會推薦東亞銀行(023)顧問、曾任花旗香港行長嘅陳子政出選。至於政府委任嘅3名董事張建東、范鴻齡同方俠,按例必 須退席,但實際只得做滿6年嘅方俠必須鬆人,而范生怕且亦因中信泰富(267)被調查而要講拜拜。Webb就「貼」行政會議新丁胡紅玉會補上、張建東會冧 莊,結果4月23日揭曉。

周文耀花紅佔人工一半

董事薪酬方面,港交所就話今年要凍薪,但初級僱員會發多半個月人工,紓緩08年通脹壓力喎,認真和味。雖然港股成交舊年江河日下,但行政總裁周文耀照390萬花紅,仍佔人工一半,整份年薪就跌10%至1273萬元。李華華



PermaLink: https://articles.zkiz.com/?id=6392

中環在線:主席唔撈嘆世界正興大插14%


2010-7-14  AD





 

子係咪一定要承 父業?似乎未必。好似原先做開製衣嘅正興(692)咁,噚日無啦啦出咗張公告,宣佈現年七十有四嘅主席姚正安,決定退休唔撈嘆世界。至於繼任人選?公司話 仲未搵到喎!不過就委任咗陳耀輝先生做執董,話佢有「20年扎實的投資背景」,但咩背景統統無講。

姚主席位公子、行年48歲嘅姚國銘,一直 係公司副主席兼董事總經理,點解唔搵佢接手坐老竇個位?係太子爺未夠班?定係公司之後會有後着?華華唔識估,不過呢隻變咗身做礦股嘅正興,股價就喺谷底再 插水,埋單跌14%,得番一仙二,睇怕好快連仙都唔仙吓o架嘞,陰功!

李華華



PermaLink: https://articles.zkiz.com/?id=16704

中環在線:恒隆大掌櫃吳士元唔撈 李華華

2010-7-22  AD






 

恒隆集團 (010)同恒隆地產(101)又有人事變動,噚日宣佈01年加盟嘅執行董事吳士元(圖)辭職唔撈,噚日起生效,原因係要「從事其私人事宜」,話同董事會 冇分歧。被視為恒隆掌櫃嘅吳士元鬆人,可算有迹可尋。首先係恒隆4月17日高薪請咗國泰(293)前任生招牌陳南祿,接替就嚟退休嘅董事總經理袁偉良。6 月初,吳士元沽咗啲恒隆股份,套現成億銀,當時已有人估佢走硬。唔通真係「一山不能藏二虎」?

李華華



PermaLink: https://articles.zkiz.com/?id=16884

中環在線:陳振聰軍師劈炮唔撈 李華華


2010-10-05  AD





 

陳振聰(圖)年 頭輸咗官司,仲因為涉嫌偽造文件,被警方商罪科扣查,之後就無晒消息,原來最近宏霸數碼(802)管理層出現咗微妙變化。宏霸噚日宣佈,陳振聰嘅軍師,宏 霸主席朱偉民已經辭咗職,仲由執行董事調咗做非執行董事;陳振聰嘅另一愛將周白瑾連非執行董事都辭埋,即日生效。

查實朱氏今年二月已經辭去 行政總裁一職,只留任執行主席,上個月22日仲以平均價每股4個9賣咗500萬股宏霸畀一名機構投資者,持股量跌到得番4.77%,家陣連主席都唔做;朱 偉民09年薪金同花紅加咗4成,有4589萬,o依家放棄高薪厚祿,有乜啟示?唔使講得咁清楚吓嘩!

李華華


PermaLink: https://articles.zkiz.com/?id=18438

蘇慧恩唔撈亞視做歌手

1 : GS(14)@2016-02-15 02:20:13

樂壇新人蘇慧恩昨日在深水埗舉行新歌《愛到跌至谷底》MV發佈會,獲兩位同門師姐何晞兒及陳若嵐現身撐場。蘇慧恩自爆曾參加《超級巨聲》、《香港小姐》及《工展小姐》,並獲得工展小姐冠軍,現年29歲的她說:「之前參加《巨聲》輸咗係衰緊張,但學到好多嘢,入行係我嘅目標,希望30歲前達成呢個願望。」而蘇慧恩終於達成心願任職亞視,她說:「九個月前喺ATV報娛樂新聞,不過當時識嘅朋友,而家都差唔多走晒。屋企人都好支持我入行,爹哋、媽咪、細佬都有嚟捧場。」採訪、攝影:曹家誠





來源: http://hk.apple.nextmedia.com/entertainment/art/20160214/19490114
PermaLink: https://articles.zkiz.com/?id=295912

【一年之計在於...】慶祝689被唔撈 2017目標:化悲憤為食好西

1 : GS(14)@2017-01-02 01:05:49

梁振英喺年尾宣佈不爭取連任特首,相信為唔少人帶來一刻歡愉。(資料圖片)



2016年經已落幕,有評選就以「亂」字為今年作總結,對於香港人嚟講又係點嘅一年?動主播表妹去到旺角街頭,同街坊齊齊回顧2016年。



唔少受訪者覺得梁頌恆、游蕙禎被DQ事件係個遺憾。(資料圖片)

2017年特首選戰你又點睇?(資料圖片)

黃先生話唔撐葉劉就梗。

先講喜事,唔少市民都因為689唔撈最開心,陳先生話:「佢落台點都值得慶祝嘅!」真係要多謝梁特首喺年尾為香港人送上苦中一點甜呀!另一邊廂,唔少受訪者對梁頌恆、游蕙禎被取消立法會議員資格一事覺得失望,好似Christian就話:「少咗兩個議員為香港出力。」邱小姐講到咬牙切齒:「畀人哋剝奪咗佢哋嘅議席,其實我覺得好憤怒!」既然咁多怒氣,一於喺新一年化悲憤為食......「好西」?問到2017年新願望,李先生諗都唔諗就答:「新一年食多啲好西!」咪心邪,人哋講緊嘢食咋。至於下屆特首選戰,唔知大家又有咩心水人選?自己香港自己講,即刻去片啦!



連小姐最希望下屆特首係一個「真」香港人呀!

問到2017年願望,李先生即刻話想食多啲「好西」......嗱,佢講緊嘢食咋,咪諗錯隔離!

邱小姐同陳先生鼓勵港人喺新一年多啲關心社會,遇到唔公義嘅事一定要企出嚟。

採訪:何宛珊(表妹)攝影:馮峰後期:Roy編審:仙




來源: http://hk.apple.nextmedia.com/entertainment/art/20170101/19883373
PermaLink: https://articles.zkiz.com/?id=320939

Next Page

ZKIZ Archives @ 2019