【馮仁昭四圍超】網民鬧爆炒作 RM話摺又唔摺
1 :
GS(14)@2017-01-26 18:08:27■《RM》上月宣佈將於下月尾摺埋，但噚日又轉軚話會繼續拍攝。
韓國SBS人氣綜藝節目《Running Man》（RM）上月爆出連串是非，以改組之名踢走宋智孝同金鐘國，結果遭全城粉絲狂插而宣佈摺埋，成員將攜手演出至下月26日。當粉絲以為節目即將結束、準備搶購《RM》喺3月嘅香港見面會門票之際，SBS噚日突然宣佈節目將原班人馬繼續拍攝，對於SBS突然轉軚，網民就指《RM》係真炒作假摺埋。噚日SBS方面發聲明：「因為《RM》節目嘅終映，聽到好多觀眾表示不捨，因此六名成員及節目組，跟SBS決定一齊繼續節目。因為改版所引起嘅不愉快事件，已經向成員致歉，成員要做出呢個決定並唔容易，再次對做出辛苦決定嘅成員表示感謝。」又強調係原班人馬，同唔會開第二季。
■Gary最近忙於喺內地發展，似乎無意重返《RM》。
粉絲賜死亡帖
雖然有粉絲好開心《RM》可以繼續，不過大部份網民就留言指「電視台太兒戲」、「節目組冇人性」、「給呢波炒作滿分」、「感覺被耍了」等。更有粉絲嬲爆，化身韓劇《鬼怪》嘅地獄使者，賜SBS「死亡帖」，仲寫上「SBS被觀眾的刀片刺死」。另外，有粉絲都趁機希望去年10月退出嘅前成員Gary可以回歸，不過Gary近日頻頻去內地，為當地發展試水溫，日前更為內地雜誌影新相，非常忙碌。撰文：梁雯迪
來源:
http://hk.apple.nextmedia.com/entertainment/art/20170125/19907483