她擁有令人羨慕的背景，父母在內地有間千多名員工的眼鏡廠。一出世，如珠如寶，早年在英國讀書，被悉心栽培。大學畢業後，更被安排接手廠房。不過，這位二十五歲的太子女戴美兒（Emily），對大好前途斷然say no。 Emily想做的，是自己一手一腳建立的生意。自小見到爸媽每天為廠務奔波，日復日巡廠、傾訂單和公幹，失去了生活，令Emily怕怕。她不願接手，決定自立門戶做零售，開設Genic Eyewear，賣自家設計的眼鏡，目標是做「眼鏡界的小米」，又為客人度身訂造眼鏡，及開班教整眼鏡。 做廠出身的父母，雖然口裡說不，處處否定Emily的做法，但同時又接下女兒的訂單，從行動上支持。新舊兩代的感情，從來都是這麼矛盾。 原本可以管理過萬呎廠房，但Emily寧願瑟縮在幾十呎的銅鑼灣地帶小鋪之中。這裡是她自家製作眼鏡的零售點，也是她設計眼鏡的工作坊。在這裡賣的眼鏡，不單只有長青的黑框，亦有較浮誇的豹紋、間條和閃粉等款式；太陽眼鏡走鮮色路線，如以鮮黃及粉紅色做鏡架，配合夏天造型。Emily希望令眼鏡「時裝化」，設計時會參考英國時尚趨勢預測機構WGSN，以得知下季流行什麼衣飾。她的每一個設計，只會造三種色，每種色都只有四副，賣完即止，她說：「買衫都唔鍾意同人哋撞，所以產量都用呢個概念。」 除了款式，她亦注重設計，「歐洲人同亞洲人嘅面形好唔同，佢哋輪廓凸出，顴骨較窄，亞洲人的臉較扁平，顴骨較闊，眼鏡容易下滑。」Emily特意把鼻托加高及減低鏡框的弧度，使客人戴上眼鏡後，不易下滑。她把品牌名稱改作Genic，意思是「基因的」，Emily認為視力問題與基因有莫大關係。Emily的父母有深近視，她亦有八百多度近視，她笑指自己鼻扁扁，「副眼鏡成日跌落嚟，所以我好明白戴眼鏡嘅人的需要。」 要做眼鏡界小米 名牌眼鏡貴至數千元一副，即使不太出名的品牌，只要質素較好、外形美觀，亦要千元以上，在眼鏡廠長大的Emily不屑地說：「啲眼鏡咁貴只係賣品牌，其實成本好低，食水好深。我要整一啲價錢大眾化而有質素嘅鏡架，等普通人都買得起。」Emily的眼鏡售價在三百多元至六百多元之間，每副成本只是百多元至二百多元，即毛利率約五、六成，比坊間八、九成為低。而她使用的材料，是質素較好的Acetate板材（醋酸纖維），她邊說邊用雙手擠壓她的出品，「你睇，因為隻料夠彈性，壓落去都唔易斷。」她希望她的品牌，能夠成為「眼鏡界小米」，「手工一樣靚但唔貴。」今年二十六歲的客人Yale，半年內已經在Genic買了四副眼鏡，「我好鍾意佢嘅鼻托夠高，可以定住唔會跌落嚟，顏色選擇多又唔貴。雖然外面都有二、三百蚊嘅眼鏡套餐，但啲質料同款式參差，幾平都唔想買。」 單靠賣自家設計，每月銷售額三萬元。為了增加收入渠道，她代理兩個日本眼鏡品牌，其中一個出自日本設計師手筆，叫Mydeary，她說：「有次去日本參觀眼鏡展，見到呢個品牌，佢設計一樣係高鼻托，適合亞洲人。」不過這品牌並沒有放在她鋪頭出售，Emily解釋：「好多眼鏡店嘅老闆入唔入貨，係睇向佢推銷嘅人年資深唔深，所以我代理咗個品牌，都要搵另一個資深代理人，推銷去大店。如果放喺自己門市賣，店太細，其他店見到唔會同我入。」現時，代理眼鏡生意佔其整體生意額約四成。 Emily認為香港人喜歡送獨一無二的東西予另一半，為了方便為客人度身訂造眼鏡，亦開設手造眼鏡班，親自教客人製造自己的眼鏡架。眼鏡班以小組教學形式，收費每人約一千二百元，每月開約五至十班。上堂前，Emily按客人的要求畫好設計圖，學員在工作室學習製作眼鏡架的組件，包括眼鏡框和鏡臂，餘下加鼻托和接駁組件等工序，就要留待工廠處理。 開鋪只用三十萬 替Emily生產眼鏡的工廠，就是家人的祖業。她的公公婆婆經營眼鏡廠，那時只是一家幾十人的小工廠，後來父母接手，廠房規模愈來愈大，有千多名員工，估計每月營業額以千萬計，她媽媽戴曹綺梅是香港中華眼鏡製造廠商會會長。不過，父母已年屆五十，兩人只有她一粒女，故一心希望培育Emily做眼鏡廠的接班人，但Emily卻有自己的盤算，「做廠真係好悶，每日做嘅嘢都好機械，都係巡廠、檢查入貨傾訂單。好似我媽媽咁，每日要七點起身，凌晨先返屋企，每個月最少有七日要出外公幹，高峰期要去二十多日，呢種生活唔係我想要嗰種。」她亦認為眼鏡廠已經開始萎縮，「好似Prada、Miu Miu和Gucci呢啲大品牌，已經有自己的廠房。二、三線品牌則產量細，我相信廠房嘅客會愈來愈少。」在英國讀鞋具設計的Emily，畢業回港後，曾到鞋業龍頭百麗（1880）打工，「但上司要求我哋學習其他大品牌嘅設計，根本冇乜發揮。」Emily想想自己只是抗拒做廠，對眼鏡還是感興趣的，於是決定開零售鋪。見女兒有自己夢想，父母只好支持，但只願給她三十萬元打天下，「我阿媽話當初接手間廠時，生意都好細，係一步一步發展起嚟，佢都想我經歷吓。」資金有限，Emily選擇租金較平的銅鑼灣地帶，已無錢請視光師駐場，她發現：「好多年輕人都接受到鏡架鏡片分開買嘅模式，如果我請視光師，就好難做到而家嘅價。」 兩代的分歧 不過開鋪後，父母「睇唔順眼」，令她感到失落，「爸爸媽媽初時聽我話要開門市，以為我會好似傳統眼鏡鋪，放好多好多眼鏡。開鋪後見到咁嘅？其實佢哋唔知年輕人諗乜，多眼鏡係無用，裝修潮啲靚啲，先吸引到年輕人入來o架嘛。佢哋成日用做廠啲思維來睇我，話我唔得。」Emily設計的眼鏡造型突出，不是一般的淨色鏡框，「佢哋話我設計好誇，有邊個會買？我都想反問，唔做潮啲，有邊個會買？」賣得平，又被父母質疑，「佢哋成日都話要加價，因為同樣嘅質素，外面賣六、七百元起，要我加價四成。」 雖然與父母有分歧，但她仍很感謝父母的支持，「如果唔係家人幫手，我可能要打十年工先有得開店。」加上每款眼鏡只造小量，相信只有她父母才願意接單，「佢哋按市價收我生產費，不過出面啲廠起碼一個款要做三百副先肯接單，我始終都感激父母嘅支持。」Emily亦知道，父母雖然經常挑剔她，但其實背後卻為她感到自豪，「好似你哋訪問我，佢一方面話我，『不如用多啲時間來睇鋪仲好啦 』，但另一方面又同親朋戚友講『《壹週刊》訪問我個女。』又着緊問我訪問幾時出，哈哈！」 開業資料（07/12） 租金^$120,000裝修$80,000器材$30,000雜費$40,000人工$30,000總投資$300,000^二按一上，曾在葵涌工廈租用辦公室 營業資料（04/14） 營業額$150,000租金$25,000人工#$40,000雜費$3,000貨物$40,000盈利$42,000#包括老闆及兩名員工 一點意見 ●只賣鏡架的模式很好，但每個款式的供應量只有四副，太少，有不少客係見到其他人戴上好睇，就自己都想要同一款。而且市面的款式繁多，就算再賣多些，客人也很難撞款。 ●現時度身訂造的定價較低。因為這是成本較高的生產方式，而且是較有消費能力的人才會選擇，所以可以向上調整價格至二千元的水平。 ●手造眼鏡的材料，可以選用更高級的賽璐珞（celluloid），爭取把自己定位為高端產品。 | 