| ||||||
首富李嘉誠八十有六，仍有心有力，勇於投資新事物。由紅顏知己周凱旋打骰嘅私人投資旗艦——維港投資基金，先有人造蛋，又有複製動物皮。不過，除咗鬼佬嘅高端生物科技，誠哥對祖國傳統中藥療法都好有興趣。早於○五年，和黃（13）已同上市公司白雲山（874）合資，成立廣州白雲山和記黃埔中藥有限公司，至今開發超過一百四十種藥品，包括板藍根顆粒、六味地黃丸等。最近更有新突破，就係上月底，白雲山同和黃舉行發布會，宣布推出「中藥版偉哥」——「鐵瑪」！話係中藥，但內含嗎啡成分，仲有人參及黃精等藥材，講明男女通殺，主要針對三十歲以上、容易疲勞嘅男性，以及更年期女性，改善用家床上表現咁話。 同得誠哥合作，白雲山當然有咁上下來頭，大股東係國企廣藥集團，擁有十幾隻老字號中藥品牌，包括王老吉涼茶。近年白雲山紮行馬進軍抗陽痿藥物市場，除咗同誠哥合作搞鐵瑪，還自行研發大陸版偉哥「金戈」。按照白雲山嘅講法，呢兩款一中、一西嘅「偉哥」，可以令男士在床上表現猶如「金戈鐵馬」。講到咁把炮，上週五小宗即刻託朋友到深圳藥房搵貨，點知店員話最快要下個月先有得賣，「有心人」記得留意啦。 黃桂林隻揪三曲娛校友 國學大師錢穆等南下學人創辦之新亞學院六十五周年校慶，前個禮拜日喺會展擺六十五圍誌記其事。話就話由七點鐘開始，但到大家可以舉筷，已經係九點幾鐘矣。唔通文化學術機構都學得一般人搞婚宴咁，先來雀局？非也。只不過新亞辦學維艱，好多人都上台憶苦思甜一番；再加上熱情作各種宴前表演嘅校友眾多，咁就冇辦法唔搞出兩個幾鐘矣。呢，好似前美林猛人KL黃桂林咁，就隻揪唱咗三首歌。打你一首三分鐘，都成十分鐘啦！奉勸各位出席類似歷史性慶典盛宴嘅朋友，打定底就唔使怕個肚皮打鼓矣。 真正的黃金握手 689強辯，指收取澳洲UGL400萬英鎊嘅合約，屬「離職協議」。呢種協議，金融界俗稱「golden handshake」（黃金握手）。根據前BBC播音員Max Cryer撰寫嘅《Who Said That First》一書，「golden handshake」一詞最早出現於一九六五年，由英國《Daily Express》的編輯Frederick Ellis最早使用，意思是向離職員工提供優厚嘅一次性款項，換取對方承諾不會做對公司不利嘅事。為避免利益衝突，以689為例，佢任職嘅DTZ董事局，亦要知悉並同意協議內容。不過，時任DTZ主席嘅Tim Melville Ross，就話唔知有關協議，如果屬實，689真係水洗唔清。講番呢個金融俚語，由於廣受好評，衍生出其他詞語，包括「golden hello」（黃金問好），指公司在同行挖角時，向挖角對象提供一筆簽約款項作誘因。仲有「golden boot」（黃金靴），與香港嘅「肥雞餐」相近，目的係誘使年老嘅員工離職，而提供吸引嘅離職條件，包括現金、公司認股權等。最後有「golden parachute」（黃金降落傘），則是指在機構或公司嘅高層人員退休時，向佢哋提供生活費等津貼，咁退休後就如同有降落傘保護，唔會「一落千丈」咁話。 | ||||||