| ||||||
地溝油襲港，中產轉吃外國貨；包餅店陸續中招，索性買部麵包機自家製。錢可以換來一點安心。窮人卻無得揀，只能買來歷不明的散裝油、冒牌米、爛罐頭。周佩波說：「為了慳錢，基層真係搵命搏。」他知道窮滋味。初中時由廣西農村來港，一家五口住深水埗百呎劏房。貧困、家庭暴力、校園欺凌夾擊，加上新移民的適應困難，不足為外人道。「我叫阿波嘛，愈大力打我，我就要彈得更高。」掙扎着長大，畢業便去中環返銀行工，30歲前擁有自己的公關公司，每年收入過百萬。今日屋仔車仔老婆仔有齊，沒人再看不起他。「好多時歧視只係源於誤會。」既往不咎，還說要將在香港賺到的錢「十倍奉還」，回饋這城市。去年他放下公關業務，創辦社企「加油香港」，利用自己的經驗與人脈，跟大品牌合作，誓讓窮人都吃得起港產靚油、泰國香米。「我想佢哋知道，原來基層都可以有得揀。」 「有得揀」三個字深印周佩波的腦海中。他剛來港時，住在深水埗海壇街唐六樓的劏房，樓上僭建的天台屋住着三個阿婆，因為窮，總是買包裝破爛、甚至過期的減價貨，「最記得那些生晒穀牛的米。」婆婆吃到又屙又嘔，但仍繼續，「佢話，『我有得揀咩？』」周佩波對這句話念念不忘。「加油香港」顧名思義，由食油着手。他與生產獅球嘜的合興油廠洽談，「我們以為少油就健康，但基層未必經常買得起肉食，唔夠飽和脂肪，身體會出現好多問題。」合興特製「基層配方」大豆花生油和芥花籽油，以接近成本價賣出，比市面上的食油平三成。「基層本來就買不起獅球嘜。」賺不了錢，卻賺到market share，在公共屋邨的區議員辦事處或社福單位擺賣，亦有地區團體安排街坊團購。今年四月，他們賣出第一支油，預計年底可將服務擴展至十幾萬人。第二個合作品牌是Oral B，「想基層有健康自信的笑容，我們就諗起牙膏，同P&G傾。」他一副公關口吻。洽談中的還有白米和慳電膽；也在研究推出「待」用券，在大商場賣給中產，然後基層街坊可以憑券領物。「我哋傾親都係大品牌，因為要幫一百萬基層，產量一定要夠大。若證實個model work得掂，仲會發展其他亞洲地區。」 孤兒仔 很難想像，眼前這位躊躇滿志的CEO，當年是個自卑到話也不敢說、晚晚喊濕枕頭的憂鬱少年。十二歲來港，說是家庭團聚，其實沒有一個家在等他。自細父母關係未曾好過，「細路仔唔知道佢哋嘈咩。」只記得鬧得兇時，連斧頭和狼狗都出齊。父親先來香港，母親把他們遺棄，周佩波像人球，先後在外婆、祖父母和姑姐家寄住，孤兒般經常被鄉里嘲笑：「又話去香港？幾時去呀？你阿爸都係唔要你o架喇！」熬到中一那年，他與妹妹終於取得單程證。父親已有另一頭家，兩兄妹要與繼母和新添的弟弟同住百呎劏房。「初時我未覺得差的，因為我細個條村全都是泥屋平房。一嚟到我覺得，哇，香港真係唔錯喎，深水埗有九層嘅樓，好犀利！」沒多久他便發現實情。同學去麥當勞，一個餐十幾蚊，他吃不起。每日他只能用十蚊，包辦吃飯搭車書簿衣服，那是九十年代中。唯有吃學校門口車仔檔的六蚊飯，永遠是咖喱薯仔、番茄飯兩款；或趁麵包店臨關門，花三蚊買五個包，解決翌日三餐。升上大學，他方知道什麼是乾炒牛河。但欺凌和歧視比貧困更難捱。新移民中途插班，他入讀已結業的德仁中學，在美孚，「Top 10嚟o架，成日上港聞和法庭版。」Band 5學校裡，好人好姐都被欺侮，何況言語不通的鄉下仔。老師也不是個個體諒，那時周佩波不懂廣東話，極度無自信，老師問問題，他怕得縮作一團，推鄰座同學代答，結果被罰企罵足一整堂，「我都唔係好聽得明佢鬧咩。」父親不常回家，就算出現都是對他打打罵罵，與後母也相處不來，「曾經好多次企喺天台，真係諗，係咪跳落去一了百了呢？但妹妹同我講，你如果死的話我一定跟你死。為咗個妹，只好撐落去。」幸運是他遇到另一個「波」，中文老師波sir，「其實佢無教我嗰班，但有次做壁報，我寫咗首詩上壁報板，佢見到，就問我想唔想跟佢學作詩。」唐詩宋詞，用的是近似廣東話的中古音，周佩波為填得合韻律，在波sir教導下逐隻字查字典，靠拼音學廣東話，漸漸進步，鄉音雖難脫，但粵語九聲，他分得比很多香港人更清楚。「仲有錢添！」他參加青年詩歌創作比賽，拿過兩次全港冠軍，「一次獎金三千，一次五千，好犀利o架喇，寫廿八個字就有五千蚊，真係一字千金。」成為他的主要收入來源。 避風港 幸福家庭的小孩，攞獎可能為了擦亮履歷。但對周佩波來說，他需要的是安全感和認同感。「大陸人笑我係香港仔，香港人又笑我係大陸仔。」唯一稍感安慰，是站在羅湖橋中間時，「一隻腳企一邊，咁我咪兩樣都係囉？」好幾年都感到身份迷失，直至拿到「好公民獎」，雖然是「深水埗公民教育委員會」頒發的豆泥獎，「我其實完全唔care係好公民定壞公民，我care的是『公民』兩個字。佢話我係呢度嘅公民喎！從此我就認定，香港係我嘅家。」義工服務是他的避風港，「做義工的多數都係好人，或者做緊義工嗰吓，保證係好人，一定唔會歧視我。」少年警訊、社區探訪，各種比賽和社會服務，他參加了一大堆，又當選「香港傑出學生」。這些獎項和人脈，成為他的護身符。由於與家人相處不來，預科時周佩波在隔鄰通州街租了另一間劏房自住。後來考上科大電腦系，卻因為居港未滿七年、又不與家人同住，不獲學生貸款，無錢交學費。「以為已經捱到大學，開始有光明、有希望喇，結果都係捱唔到落去？」心灰意冷，執好包袱打算放棄學位去流浪，臨行前遇上做義工時識的社工，知道他的處境後很不忿，替他找慈善基金、找議員出頭、寫信給學生資助辦事處，「原本都係唔批的，我話，唔緊要，咁我開記者會宣布quit u吧，唔知報紙有無興趣寫呢？傑出學生因為政府唔肯批貸款而要放棄讀書。」對方欲息事寧人：「你做過咁多義工、攞咁多獎，對香港都貢獻好多。」貸款終於獲批。這次他再不是膽小怕事的少年，「唔堅強的話，根本過唔到活。」 獅子山 從前深水埗和西九龍沒那麼多高樓，周佩波失意時愛躲上天台透氣。看着獅子山與對岸中環的摩天巨廈，暗暗立志，「我將來要做好多嘢，去好多地方。三十歲前要賺到一百萬，喺對面海有間自己的公司。」他大學報電腦系，因為覺得將來一定是互聯網的天下；畢業後加入銀行的風險管理部門，因為做生意必須懂風險管理，後來再做公關、顧問，一步步鋪好人脈。與太太合辦的創藝傳訊，客戶不乏上市公司、家傳戶曉的大企業。去年卻毅然抽身，全副精神辦社企「加油香港」，「因為經歷了一些生死之事。」太太懷第二胎時，出現極罕見的妊娠病，「那病全港可能得兩三個醫生見過，做手術，流產風險都好高，儀器香港都無。」夫婦倆是基督徒，決定接受「神的安排」。最後手術沒做，細仔順利出生，精靈可愛。但周佩波愈發感到生命無常，「無人知我過唔過到今日，點解唔趁而家去做？」近年市面上可疑食品氾濫，「往日婆婆買的，雖然包裝爛咗，起碼都是獅球嘜。但而家，真的是來歷不明。個袋印住金鳳，煮出來都可以唔係金鳳嘅。」他不想再等，掏出數百萬積蓄投資社企。太太支持？「佢由本來唔使點做，變成要做嘢囉。但都支持，因為我哋係做義工識o架嘛。況且我哋不嬲都好慳，兩個人食餐飯三百蚊已覺得好貴，而家我哋自己都用『加油香港』的油。」 施與受 他比一般善長更了解窮人。入大學時，社工幫他申領了應急的學費補助，他到銀行提款，有報章採訪，攝記叫他攤開那幾張金牛對鏡頭笑，他不肯，對方苦着臉說：「唔咁影我交唔到差o架。」結果他用金牛遮着自己的臉讓他影。「幫助基層，有兩樣嘢一定唔可以拎走的。」一是自尊。「如果我俾錢幫一個人、或者要俾咩佢，一定要非常之敬重地，雙手遞俾佢。」二是他們的能力，「我們的油係賣，唔係送。我就要將高質素貨品的價錢拉到接近他們的距離。」自尊心與能力，其實二為一體。周佩波中學時補習、做兼職，每月還要寄一百幾十元返大陸，資助幾個比他更貧困的舊同學。他希望做到，讓基層都有能力幫人。「若我叫基層去捐嘢，可能《壹週刊》會寫衰我啦。但如果佢真係捐到呢？」用剩的油樽，只要入滿水，加一樽蓋漂白水，就可以透過太陽折射，產生大概等於55w燈膽的光，照亮第三世界國家的家庭。這個國際慈善項目叫「Liter of Light」，一公升的光，周佩波是香港區負責人。「當佢知道原來捐一個樽，係可以帶到光明同希望俾人，佢嘅感覺就好唔同。」他說：「基層要脫貧，唔係靠錢，而係心態。」 | ||||||