ZKIZ Archives


殼王撐腰吳啟華《On Call II》宣傳扭計


2013-10-31  NM  
 

 

同無線關係本來極之一般的吳啟華,在無線新主陳國強拉攏下,事隔七年回歸接拍台慶劇《On Call 36小時II》。擔正做男主角,幫手宣傳責無旁貸,但有「殼王」背後撐腰,即使監製潘嘉德親自開聲,吳啟華依然有本事企硬,拒度期返港,甚至講明會隨時甩底,缺席本週四(十月三十一日)的首播記者會,劇集播映宣傳期間,亦未必會配合現身,令一早度曬穀劇策略的《On Call II》大失預算,又投訴無門。一味拖住

無線慣性收視不再,作為台慶劇的《On Call 36小時II》為保優勢,早在個多月前,已逐一跟劇中演員度期出席宣傳活動。身為男主角的吳啟華,一直以忙於拍新劇《M Club》無暇處理,一味拖拒配合。直到上週一(十月二十一日),吳啟華與《On Call II》部分演員上《超級無敵獎門人終極篇》,劇集監製潘嘉德把握機會,親自踩落化妝間,面對面搵吳啟華講數,可惜一樣無功而還。「德哥(監製)親自落去搵啟華confirm 三十一號去QE(伊利莎伯醫院)宣傳,點知佢話大陸劇組未必肯放人,隨時唔到,仲話明套劇上緊都要喺大陸開工,唔會有時間做宣傳。」一名《On CallII》的幕後人員說。

主角無影,監製唯有將宣傳重心放回馬國明同楊怡身上,而聲稱內地劇組唔放人,無法配合宣傳的吳啟華,最終因為《M Club》要補戲,才肯落實回港,出席本週四的首播宣傳活動。

有牙齒印

過去吳啟華於無線拍過不少叫好叫座劇集,《妙手仁心》系列中的程至美一角,更助他開創事業高峰,直至○四年,吳啟華因為接拍同樣以醫生為題材、由恩師鄧特希為亞視包拍製作的劇集《上海灘之俠醫傳奇》,因而觸動了無線的神經,雙方關係不再。「因為趕完呢套劇(《俠醫傳奇》)之後先返去無線拍《妙手仁心III》,結果公司就將我嘅戲份減到好少!」吳啟華說。去年王維基的香港電視展開挖角潮,承認「有傾過」的吳啟華,亦句句有骨,表明無意返無線拍劇。「唔會返TVB喇!大家都知,外人返去唔會有特別角色做,時間又唔好、又長,酬勞又唔係特別好。」問他如果波友「殼王」陳國強開口會否有轉機?吳啟華立刻變調:「咁如果佢開聲又唔同!」

老細波友

十多年前開始轉打高爾夫球的吳啟華,與洪金寶分屬波友,亦因此與「殼王」陳國強結緣。「殼王」入主無線加上親自斟洽傾回巢,吳啟華才答應返無線拍台慶劇《On CallII》,更令在首輯憑「一件頭」角色彈出的馬國明要坐歪,戲份被大幅削減。有老細好友關照,年近五十的吳啟華,除獲安排港姐季軍朱千雪做拍檔,據瞭解,為遷就新年要搵錢的吳啟華,《On CallII》要由一月改後到二月底才開工。簽部頭約的吳啟華,雖然緊接再拍無線另一新劇《M Club》,卻可以分身到內蒙拍另一部大陸劇,純粹朝中有人好辦事!「殼王」賣賬,事隔一年,吳啟華已改口,表示有意同無線簽經理人合約,做親生仔!

自己友

陳國強接手TVB後,「殼王」身邊好友個個受惠,就連四大唱片公司的恩怨,亦由他親身出馬,令事件得以化解。

左麟右李

克勤與無線關係一直良好,但在四大唱片和無線交惡事件上,卻是第一個受害者!如今正式破冰,加上與老闆陳國強是好友,形勢立即大轉。「殼王」為力谷阿倫克勤12月舉行的演唱會,早前在《星夢》一連兩晚的決賽,安排「左麟右李」獻唱娛賓,更為他們拍攝演唱會特輯。

謝賢

波友之一的謝賢,獲安排同胡楓、Joe Junior,拍新旅遊節目《三個小生去旅行》,免費遊埠。

曾志偉

同TVB關係友好的曾志偉,是無線大騷司儀必選,自「殼王」上任後,志偉連幕後都做埋,親自埋班兼監製重頭劇《M Club》。

陳百祥

「殼王」坐正,阿叻旗下藝人如狄易達、蔚雨芯、楊焉等均不停亮相無線。由阿叻公司包拍的《叻哥遊世界》節目,無線亦花錢買下轉播。

PermaLink: https://articles.zkiz.com/?id=80253

吳啟華冇約

1 : GS(14)@2016-03-05 01:12:15

監製鄧特希開拍的電視劇《隱世者們》,找來多位十幾年前拍《壹號皇庭》的演員,前晚陶大宇、吳啟華、蘇永康、駱應鈞和呂晶晶在灣仔拍外景,眾人不時提起當年拍《壹》劇的趣事,吳啟華說:「日日都傾偈好開心,乜嘢都傾一餐。」他透露沒有與無綫簽死約,所以不排除與其他免費電視台合作。問到電視界的轉變,鄧特希說:「拍真人騷係比較聰明選擇。」他慨嘆香港電視界冇進步:「大台要睇老闆buy,心態上考慮某人喜好決定。」採訪:王連連攝影:仇志德





來源: http://hk.apple.nextmedia.com/entertainment/art/20160303/19513597
PermaLink: https://articles.zkiz.com/?id=296732

吳啟華新濠賭輸愁爆

1 : GS(14)@2016-03-17 14:52:53

【爆相爆片】失婚的吳啟華寄情工作,早前拍完鄧特希新劇《隱世者們》,昨日到澳門新濠影匯賭錢,被本報讀者朱先生捕獲,並透過「爆相爆片」透露:「1點半左右,見到吳啟華喺度賭百家樂,每鋪二千蚊上落,有贏有輸,個樣愁晒。」昨日記者致電吳啟華了解,他承認:「係呀,啱啱拍完戲同朋友嚟玩吓。」問到是否輸錢了?他笑說:「輸唔緊要,賭錢嘅嘢玩吓啫,有贏有輸有和,幾多錢唔好講啦,唔會影響生活質素。成年人,總之唔好出事控制唔住,小賭怡情。」啟華還說:「去澳門唔係只去賭場,都可以有健康活動,唔好只係登我去賭場賭錢又話我爛賭啦,度假玩吓就係咁簡單,跟住仲會去沖繩、澳洲、歐洲踩單車自駕遊。」採訪:皓騫





來源: http://hk.apple.nextmedia.com/entertainment/art/20160317/19532382
PermaLink: https://articles.zkiz.com/?id=298295

【爆相爆片】吳啟華陪前妻 蜜遊東京浸溫泉

1 : GS(14)@2016-10-14 06:52:19

【雙語廣播】■吳啟華和前妻石洋子日前遊東京,在服務台以英語詢問tour資料,之後又用普通話與前妻溝通。讀者提供圖片



現年52歲吳啟華和31歲前妻石洋子掟煲唔掟蓋,上月兩人才孖趙碩之、周美欣同遊沖繩,怎知短短一個月後,日前這對離婚夫婦又再蜜遊日本,今次更是二人世界去東京。讀者林先生透過本報「爆相爆片」,分享他捕獲二人的相片,林先生在電話表示:「見到佢哋喺Hilton酒店嘅服務台問資料,打開本旅行書想book tour,仲叫職員一定要confirm畀佢哋。」當時吳啟華用英語跟職員溝通,石洋子不停叫他問職員攞資料,吳啟華忙於用英語、普通話雙語廣播,大約搞了10分鐘左右,職員幫他們搵到一個地方,不過因為沒聯絡電話號碼,吳啟華又叫職員查附近店舖的電話。



【細心查閱】■吳啟華坦言二人世界去東京浸溫泉,但否認與石洋子復合。讀者提供圖片

■吳啟華表示經常一家團聚,前妻始終是女兒的媽咪。資料圖片


「只係家人感覺」

吳啟華對於被踢爆孖前妻蜜遊東京,昨日他在電話不耐煩地說:「有乜嘢出奇箒,去到邊都有中國人,影到咪影到囉,都話會同佢去囉,一直都有去,以後都會去。」問到今次二人世界旅行,玩得開心嗎?他說:「浸吓溫泉囉。」其實大多數人很難與前度再見亦是朋友,問到如果將來復合會否公開?啟華坦言:「不過萬一呀,萬分之一啦,真係復合嘅話,都會話畀你知,不過喺我角度,起碼暫時就一定唔會嘞。」記者祝福他們將來一家團聚,啟華說:「我哋成日都一家團聚,就算唔復合,佢永遠都係我屋企人,佢係我個女嘅媽咪,如果等復合消息,真係有排等,慢慢等吓啦!不過其實同佢單獨旅行唔係第一次,之前冇人影到啫。」離婚後仍二人世界去旅行,不怕前妻誤會想翻撻?他說:「大家冇嗰種感覺,只係一種家人感覺囉,唔係嗰啲男女關係。」採訪:皓騫、唐琛悠




來源: http://hk.apple.nextmedia.com/entertainment/art/20161014/19799838
PermaLink: https://articles.zkiz.com/?id=312008

唔拍就賠2,000萬吳啟華被呃接拍三級片

1 : GS(14)@2016-10-14 06:52:19

現年52歲嘅吳啟華,83年簽約無綫後,首次擔正嘅角色就係同劉德華、趙雅芝合作嘅《魔域桃源》,劇中吳啟華第一次做反派角色,由於演技奸到出汁,所以之後嘅劇集好似《大運河》同《流氓大亨》都係繼續做奸角,其中喺《流》劇中,做萬梓良失散多年細佬嘅吳啟華,用盡陰招陷害大佬,睇到一眾師奶觀眾咬牙切齒。87年,吳啟華同無綫鬧反,繼而轉戰拍電影,不過吳啓華所拍電影,令人最深刻嘅,必定係兩套三級片,首先係91年同「波霸」葉子楣拍嘅《玉蒲團之偷情寶鑑》,同埋94年同翁虹拍嘅《滿清十大酷刑》,吳啟華嘅三級男星形象從此定型。雖然自己有份拍嘅《玉》片,當年票房收近$2,000萬,創下三級片紀錄。但對於自己拍過三級片,吳啟華曾經喺訪問中,話好後悔接拍,仲話當時係俾人呃去拍,如果唔拍,就要賠$2,000萬,為咗呢件事,吳啟華想過退出娛圈。好彩到98年,吳啟華重返娘家,終於接到好籌,接拍《妙手仁心》,做情深款款程至美,入屋兼加分,之後再拍第二、三集,成功轉型。




來源: http://hk.apple.nextmedia.com/entertainment/art/20161014/19800149
PermaLink: https://articles.zkiz.com/?id=312012

吳啟華改邪歸正做醫生溫兆倫推女友落火車

1 : GS(14)@2017-04-08 20:44:27

駱達華以前喺大台奸到出汁,正宗係嗰種見佢前面,會憎埋佢後面嘅人。唔好誤會,唔係鬧佢個人,而係想讚佢演技出色,飾演壞人出神入化。一套劇好唔好睇,奸角真係佔好多重比例:溫兆倫最出名一定《義不容情》嘅丁有康,為咗榮華富貴,用盡手段上位,推埋女友邵美琪落火車,睇到人咬牙切齒。不過「黑社會也有愛國的」,溫兆倫好快返咗大陸發展,每逢大時大節,都會展示下佢嘅愛國心。吳啟華成為程至美醫生之前,吳啟華原先亦係一個大奸角,當年喺《流氓大亨》玩弄周海媚感情,之後為咗名同利,又想黐落鄭裕玲到,非常黑人憎。佢仲奸到拍過電影,喺《九品芝麻官》飾方唐鏡,同星爺周星馳有好多對手戲。不過近年嘅吳啟華已經改奸歸正,角色仲向上流階層爬升添。張松枝呢位綠葉,默默喺大台工作接近20年,角色有正有邪,都唔知點解,見到佢個樣都諗起佢做奸角,最嬲係佢喺《酒是故鄉醇》強姦佘詩曼。連過檔咗港視之後,喺《警界線》都係做幕後老大嘅副手。劉永健因為外型個粗獷,喺大台工作咗超過十年,幾乎每次都係做殺人兇手、二世祖、古惑仔。正面形象角色,係有嘅,只得一部,就係《雲海玉弓緣》當中嘅正派公子,唔怪得劉永健心淡,揀咗北上發展。何浩源肥牛鍋除咗可以醫肚,何浩源會話仲可以用嚟燒銀紙。早前有一段佢喺舊劇《天降財神》燒一千蚊紙嘅片俾人放咗上網,網友話佢演得夠離地。原來佢喺演藝學院畢業,不過加入大台後七成都係奸角,冇得其他機會發揮,決定離巢,演舞台劇,到最近返咗去藝訓班教學生。




來源: http://hk.apple.nextmedia.com/entertainment/art/20170408/19983942
PermaLink: https://articles.zkiz.com/?id=329699

吳啟華53歲生日 個樣邊似年過半百

1 : GS(14)@2017-05-21 00:59:13

剛度過53歲生日的吳啟華,日前在社交網站貼出蛋糕相:「感謝大家的祝福,願世界和平,沒有種族仇恨,沒有戰爭,大家都開開心心的生活。」睇番佢個樣又一啲都唔似年過半百,果然keep得夠好。




來源: http://hk.apple.nextmedia.com/entertainment/art/20170520/20027394
PermaLink: https://articles.zkiz.com/?id=333780

【三級後遺】吳啟華想息影

1 : GS(14)@2017-06-16 01:58:45

吳啟華



詹秉熙表示拍三級片,過程不享受,表面與肉彈纏綿,背後實有苦自己知。


吳啟華

1991年與葉子楣拍三級片《玉蒲團之偷情寶鑑》,他曾於訪問中透露,被導演呼喝「大力啲揸葉子楣個波」,感覺不好受,更萌生息影念頭。



吳岱融

於1994年與老婆鍾淑慧合演電影《替天行道之殺兄》,雖然對手是老婆,但他坦言有後悔,因大眾未能接受他的超激演出。



黃德斌

黃德斌於1995年經無綫接洽下拍攝三級片《聊齋三集之燈草和尚》,有露股及背部全裸鏡頭,他直言因片酬不少而無奈接拍。



林偉健

曾為香港體操代表隊成員,1998年接拍《滿清十大酷刑之赤裸凌遲》及《金瓶梅》系列,先後與日本艷星有激情演出,他指所謂的「艷福」實不足為外人道。




來源: http://hk.apple.nextmedia.com/entertainment/art/20170615/20055998
PermaLink: https://articles.zkiz.com/?id=335581

舉家旅行彌補單親缺憾吳啟華愧對女兒:冇同佢講父母離婚

1 : GS(14)@2017-06-18 22:07:08

■吳啟華未有向8歲女兒透露他與石洋子已離婚,亦因為沒有經常陪伴囡囡感慚愧。



【父親節嚟喇】現年53歲的吳啟華,與年輕21歲的內地太太石洋子在3前年離婚,二人的8歲囡囡吳熙兒現交由長春居住的外婆照顧。明日父親節,吳啟華為自己太少時間陪囡囡而覺得慚愧,他說:「作為一個爹哋,我覺得自己絕對唔及格!」並透露至今未有向女兒講解自己與石洋子離婚一事。



經歷過兩段失敗婚姻,令吳啟華對獨生女更加憐惜,有空就與前妻陪囡囡去旅行,又不時在社交網分享父女扮鬼臉相,甚至不時被影到兩父女sweet爆行街,令女兒感受到家庭溫暖。


「一年見幾次」


儘管處處為女兒着想,吳啟華接受本報電話訪問時卻自責說:「我根本唔係帶子洪郎,一年見得個女幾次,都係外母湊,作為一個爹哋,我覺得自己絕對唔及格!因為自己花喺囡囡身上時間太少,日日都要做嘢,唔得閒陪佢,多數都係佢放假同佢去旅行,或者佢嚟香港嗰幾次。」



■囡囡跟外婆在內地居住,一放假就來港與爸爸吳啟華團聚。資料圖片

■為給女兒完整家庭感覺,吳啟華與前妻石洋子會舉家去旅行。

8歲的吳熙兒越大越清秀,似足爸爸,問囡囡是否喜歡黐實爸爸時,吳啟華笑謂:「佢細個嘅時候就黐我,?家我見佢咁少,佢點黐我呢?由細到大都係外婆湊佢,佢就比較黐佢外婆,爹哋媽咪都唔喺佢身邊,外婆梗係特別錫佢。有時外婆搞佢唔掂,就要我做嚴厲嗰個,佢會比較怕我啲,我惡起上嚟好得人驚,哈哈!但當然唔會打佢,只會鬧佢。」稚子無辜,問到當初如何跟囡囡解釋父母要分開時,吳啟華坦言:「離婚嗰啲問題,我冇直接同佢講過,可能佢都唔知,亦唔明,因為放假我哋會一家人去旅行,我會帶埋外婆一齊去,每次幾乎都係四個人,除非洋子唔得閒,或者我要拍戲,就會三個人去,喺嗰個情況之下,佢唔係好明白分開係乜。」吳啟華希望盡力為囡囡維持完整家庭,他說:「雖然我哋住嘅城市唔同,但佢未必完全明白我哋離婚嘅嘢,我亦都唔想太過講得咁白畀佢聽,等佢慢慢大啲再了解,或者等佢問我先同佢解釋,反正我哋四個去旅行玩得好開心,畀佢保持一個好似完整家庭感覺,佢由細到大都未試過有爹哋媽咪一齊喺身邊住,由出世到?家,都係得外婆主要湊佢。」



■吳啟華女兒由外婆(左)照顧,四口子更會一起外遊。

■吳啟華於3年前與石洋子離婚,結束7年婚姻,甜蜜不再。資料圖片


只盼囡囡開心

問對囡囡有甚麼期望?吳啟華說:「其實主要係希望佢開心,譬如讀書寧願畀多啲錢,畀佢行國際學校呢條路,睇住朋友嘅細路讀傳統學校功課太多,小朋友太忙都唔係咁開心,囡囡?家都係忙,但佢會開心啲,因為有好多課外活動,好似學琴,運動又多,功課冇咁多,生活開心啲,我冇乜期望,只係希望佢開開心心成長。」採訪:皓騫




來源: http://hk.apple.nextmedia.com/entertainment/art/20170617/20058678
PermaLink: https://articles.zkiz.com/?id=335997

Next Page

ZKIZ Archives @ 2019