ZKIZ Archives


林建名未分到身家

2014-08-21  NM
 
 

 

人稱「大少」嘅林建名,近期「爺孫戀」緋聞傳個不停,搞到唔多留意娛樂新聞嘅小宗,都知道大少被高登女神搞喊。好多人都想知大少今個月尾七十七歲生日,會同邊位美女過,但小宗最想知就係大少身家究竟有幾多個億。

大少伯爺林百欣仙遊都快將十年,但小宗睇過土地註冊處記錄,仲有好多資產仍然係林伯揸住,仲未轉手,即係至今遺產分配手續都仲未搞掂。好多嘢好似西貢濠湧亞視片廠幅地咁,批咗改建豪宅都只係得個等字,擺喺度唔郁得;大少就話,其實生意分工一早就分好曬,只係手續仲未搞好;佢同細佬岳少林建岳雖然都有搞娛樂事業,但就各有各做,唔係成日見面喎。兩兄弟感情有幾好?睇怕無同啲囡囡咁好。

小宗問過律師朋友,遺產承繼手續需時可長可短,尤其是好似林伯喺遺產稅取消前離世嘅,單係就生意、物業等資產作估價,要同稅局達成遺產稅徵收基準,已可以拖幾年,之後就要再經法庭一關,要所有遺產都釐清承繼者,才可以頒下遺產認證,若然有相關遺產有官司或爭拗,真係可以無了期咁拖落去。現時大少喺鱷魚恤、麗新製衣及麗豐控股坐主席或副主席位置,三間公司市值加埋超過五十億,仲有大名娛樂等其他私幫生意,未分到身家都仲可以慢慢搣嘅!

中環寸嘴

工廈大王楊耀松大仔,家族的收租物業,遍佈港九,屬正牌收租公。自認寸得起,謂「有我咁得閒,無我咁有錢;有我咁有錢,又無我咁得閒」,經常流連富豪飯堂品嚐美食,仲喜歡到新開食肆「踢竇」試新菜。

$300富豪飯堂食龍蝦

上週四晚,來到九福(九龍尖沙咀福臨門)醫肚,靜英英,雷雨交加,注定爛市;相熟侍應推介,話太子爺入咗十幾隻南非龍蝦,準備週末推新菜式——上湯芝士焗龍蝦,仲話超值,三嚿水一隻,叫我處男試菜俾啲意見。踏足福臨門,總有種To be or not to be的感覺;侍應梗問有冇去「對家」——家全七福食嚇,坐喺家全七福,又俾嗰邊問有冇去福臨門,搞到我好似無間道咁。估計老闆想收風,透過伙記探對家啲料;好啦,都唔想啲龍蝦游背泳變成伙記餐,即管試番隻,但就「滯」咗成晚,芝士太漏。翌日,殺去港福(灣仔福臨門)食晏,今次我精啦,同樣點隻南非龍蝦,不過要求廚房同我加乾蔥、芫荽同指天椒,同老友一隻兩份,我都忍唔住要讚嚇自己,咁煮法將龍蝦鮮味帶番出來,有時都要「醒」嚇啲廚房佬,唔係下下只識豉椒爆、芝士焗呢啲煮法。中秋將至,福臨門推$6,880六十五週年Hamper,咁嘅價錢梗係唔只五個月餅,仲有八隻三十頭吉品鮑、二兩燕窩加樽XO醬,俾佢捱到六十五年,咪捧嚇場,我都好識做,九福訂三個,港福訂兩個,皆大歡喜。四季酒店龍景軒都有訂月餅,嗱,貴嗰款先係自家餅房做,平嗰款外判o架。

長實多得馮小剛兩公婆

長實每個新盤入夥都充滿「驚喜」,令人滿有期待,好似上個月交樓嘅中半山君珀,就以全屋天花佈滿消防花灑頭聞名。呢個「驚喜」真係考起啲設計師,都唔知點裝修好,搞到不少租客卻步;到早幾日終於開齋,一個連花園兼後院嘅特色戶租出,呎租近八十蚊,算係開咗個好頭,單位業主原來係內地名導演馮小剛老婆徐帆。佢兩公婆真係好旺呢個盤,記得兩年前,長實賣呢個盤時猶如拉牛上樹,首兩個月只係賣走三間,就算加傭兼送獎金都無起色,之後有人放風話馮大導睇中呢個盤,仲同埋中國影帝陳道明齊齊掃貨,銷情就即刻唔同曬。根據土地註冊處記錄,緊接嘅兩個月賣出近廿件貨,當中包括內蒙古包頭富商馬永茂,一口氣用兩億六掃咗四間!啲本地豪客如霍英東兒子霍文芳、百老滙電器太子女李惠貞、資深大律師蔡源福等,亦緊接住出擊。哎!要幫馮大導同陳影帝澄清一句,雖然傳到似層層,但其實佢哋兩個都無買君珀。新盤點解要監管,唔使多解釋啦。

本週筍工

成日都話喺濠江打工好過留港,有幾筍?揸小巴都可以日做八粒鐘,人工高過本地一大截都不在話下,仲要有公積金、雙糧、醫療,係咪筍先!

本週廣告

中國移動開拓成人情趣用品新業務?業務真係無遠弗屆噃!

金牙大狀講嘢鬍鬚曾、689對著幹

鬍鬚曾喺網誌話:「抗爭、鬥爭恐怕無助凝聚必需的共識。」呢番說話似係同班後生講,實則更有可能係衝住某人嘅舉措而來。何以見得?鬍鬚曾發表此網誌之時,689唔顧身世、忘記咗自己係成個特區之首,去咗中總簽名反佔中。佢當選之時,信誓旦旦,話香港再冇唐營、何營或梁營,而只有香港營,寓意香港人要團結。唔計水分,即使真係有過百萬人簽名反佔中,但亦都有近八十萬人簽名支持佔中。身為特區之首,689擺明車馬同支持佔中班人對著幹,高調簽名反佔中;唔通咁叫做團結全香港?唔通咁就可以凝聚鬍鬚曾講之共識?鬍鬚曾何以唔直接面對面同689講呢?肯聽至得o架。三司之一嘅人馬搞到要靠網誌向上進言,家嚇政府入邊係個乜嘢局面,睇怕都唔使多講矣。

中環人語迷你版

侫我唔係福爾摩斯侫估中邊個中環人講呢句說話,送你 JWATCH J-37藍寶石鏡面限定版手錶一隻有意參加者,請於八月二十日(星期三)下午一時後,將答案、姓名及聯絡電話電郵至[email protected]小宗只接受電郵,郵寄免問。本刊員工及直系親屬不得參加。為求公平及杜絕偷步搶答起見,請於每個星期三下午一時後來電郵競猜答案;在此之前發出之電郵作廢。超過一位讀者估中,先到先得,恕不接受上訴。答案及中獎者姓名將於下期本欄揭曉。

PermaLink: https://articles.zkiz.com/?id=109505

Next Page

ZKIZ Archives @ 2019