李家鼎教落同女仔「發生咗某啲嘢」男人要負全責
1 :
GS(14)@2017-01-02 01:05:44鼎爺李家鼎，表面好惡，但其實好風趣，多年前試過著背心牛仔褲加白襪仔一身「第一代板仔」為本報影專訪，仲要chok個港女二式，玩得，亦玩得好認真。書少讀嘅鼎爺，18歲拜師習武，20歲做埋龍虎武師，以前係做四哥謝賢嘅替身！大家都鍾意着白色老西！除低件老西，鼎爺一身肌肉非常噴血，早於88年已經喺西片《搏擊之王》（Kickboxer）兜口兜面掌摑大隻佬尚格雲頓，後嚟做埋無綫武術指導，又參加過多個國際騎術大賽，贏過超過200個獎項。硬橋硬馬，但鼎爺都有溫柔一面，73年拍《大除害》認識施明，有傳當時施明俾幾個龍虎武師抽水，鼎爺怒髮衝冠同班武師打起上嚟，結果贏得芳心，77年步入教堂，一直好恩愛，係圈中模範夫妻，不過後來有傳鼎爺牛精火爆，89年已經亮起紅燈，最後拖到94年先正式離婚。離婚多年，鼎爺接受昨日出版嘅周刊訪問都話，咁多年喇，如果要拈花惹草，其實唔難，但佢一直都冇咁做。咁有冇女仔「吼」？當然有，鼎爺都話，教騎馬咁多年，好多人仰慕佢，但佢一直定力夠，因為唔想負人。鼎爺於訪問中謂，做男人，最重要係做一個負責任嘅男人，如果同女仔發生咗「某啲事」，做男人嘅就識得負責任，要一個人擔起晒，唔可以「一人一半」卸咗啲責任佢。就算教仔，鼎爺都係咁樣講嘅。鼎爺仲話，寧人負我，我不負人。呢個，亦係佢尋尋覓覓多年，近呢幾年先至再戀愛嘅原因。
來源:
http://hk.apple.nextmedia.com/entertainment/art/20170101/19883389