ZKIZ Archives


你死我活 余詠珊攔截 阿叻失殼拖數60萬

2014-01-23  NM

最近有消息指阿叻陳百祥旗下的潮藝娛樂因拖欠得力助手兼公司行政總監簡文滌六十多萬,導致對方帶埋狄易達及蔚雨芯離職,另投新公司。據了解,原來阿叻一度打殼王主意,企圖撮合潮藝娛樂與無綫合作成立唱片部,可惜棋差一着,被余詠珊捷足先登,薦了自己的老公何哲圖做無綫唱片部話事人。阿叻衰咗,冇得認叻!墊支周轉

殼王陳國強入主無綫後,福祿壽(曾志偉、陳百祥、譚詠麟)一直從後做軍師,連帶阿叻旗下潮藝娛樂的藝人狄易達、JJ賈曉晨等曝光機會大增。當外間以為阿叻有殼王射住,近日卻爆出潮藝於過去一年多資金緊絀,搞到公司行政總監簡文滌長期為旗下藝人墊支,至今仍有超過六十萬未收得番。公司缺錢,文滌雖已決定帶埋約滿的狄易達和蔚雨芯一齊轉投有澳門資金的新公司,但仍出口力撐阿叻:「欠錢唔關佢事!」並強調阿叻是自己的大恩人。據了解,身為潮藝老闆之一的阿叻,一年前因為其他股東不肯再泵水投資,令公司周轉不靈,當時阿叻曾有意打老友殼王主意。「無綫一路想set up唱片部,阿叻同殼王傾過,話可以將潮藝娛樂同無綫合併成立一間星潮藝娛樂,仲薦埋文滌入去做行政總裁;但阿叻都未同殼王傾掂,Sandy(余詠珊)已經插手,仲薦咗佢老公Herman入去無綫睇音樂部門。」知情者說。

跟出跟入

代何麗全打骰綜藝科的余詠珊,上場後不下一次孭晒鑊,又借自己勢力捧老公的星煥國際藝人,公器私用,偏偏擦得掂老細,令同樣遇上資金問題的何哲圖入到無綫,做唱片部「星夢娛樂」行政總裁。「Sandy擦得殼王好掂,加上志偉又睇佢,佢成日有機會跟住殼王坐私人飛機出去做嘢,近水樓台,阿叻都冇佢咁貼身!」對阿叻曾推薦入無綫一事,文滌回應避忌。「我跟咗叻哥十三年,佢一路都好幫我,佢叫我去邊我都會去,但呢件事(入無綫)我無聽佢講過!就算係,依家無綫咁多人,你叫我玩政治我唔識,我都未必做得嚟!」

親疏有別

大公司權力遊戲,唔係你死就我亡,實力和牙力亦不一定成正比,雖然阿叻同陳國強曾合作做生意,但比起埋身幫殼王打仗兼識擦的余詠珊,始終較離身。埋身實戰余詠珊做過無綫,又去過亞視、有線電視,是資深電視人;12年經曾志偉介紹認識殼王後,回巢無綫擔任綜藝科總監,去年再薦老公何哲圖入無綫成立「星夢娛樂」,兩公婆打橫行。

財技拍檔陳百祥曾與志偉阿倫合資創立Star East捧新人,包括陳文媛、李蘢怡、EO2等,Star East上市後賣盤易手,阿叻再與殼王、張承勷、曾志偉、王晶等,集資組成「漢傳媒集團」,之後「漢傳媒」多次易主並改名「潮藝娛樂」,而殼王、王晶、志偉等亦先後唔玩,現時「潮藝娛樂」旗下藝人只有狄易達、蔚雨芯及浸大Carol。
PermaLink: https://articles.zkiz.com/?id=89775

Next Page

ZKIZ Archives @ 2019