ZKIZ Archives


湯文亮﹕細價股只合年輕人玩

1 : GS(14)@2017-06-29 08:04:24

【明報專訊】星期二細價股出現股災,有多隻細價股下跌超過五成,有幾隻細價股下跌超過九成,其實,細價股在過去一段時間一直下跌,星期二當日只不過是加快速度,以「翠如BB股」聯旺(8217)為例,已經由26元下跌至10元,當日再跌至1.06元,得番幾個巴仙,真係喊都無謂。

轉身要快 輸了可再來過

有記者問我對細價股睇法,我話一向沒有參與細價股買賣,所以不能夠表示任何意見,投資細價股的人都知道,細價股買賣行莊家制,做莊的唔托住隻股票,股價一定會下跌,莊家要托市就一定要用錢,如果莊家資金不足,唯有抵押那些股票,由那時候開始,話事人已經由莊家轉移到銀主,倘若莊家到期未能還款,銀主就會斬倉,細價股股價就會急跌,當日就是出現這種情况,但同一時間有咁多隻細價股爆煲,就比較少見。

至於投資細價股的股民,見到股價急跌,正是放就輸實,唔放就死實,正如李華在《弔古戰場文》所說「降矣哉,終身夷狄,戰矣哉,暴骨沙礫!」炒賣細價股,就好似埋身肉搏,老實說,真的是不太適合上年紀的人,年輕人有的是時間,輸完又嚟賭過。

今次細價股股災,對股市影響很輕微,恒指只不過跌了30幾點,資深股票投資者絕大多數不會出現問題,年輕人就不敢說,如果年輕人炒賣股票,細價股一定是他們的首選,貪其快上快落,而且他們是非常有信心,認為在股票下跌之前可以預先放掉手上細價股,但今次股災來得快而狠,根本沒有時間走避,不少年輕投資者中伏,在細價股爆煲之前,David Webb在上月中提出警告,但又有幾多年輕投資者會聽?他們反而會質疑Webb的說法。

謝國忠捉到鹿不懂脫角

在細價股爆煲之後,我有多少替摩根士丹利前首席經濟師謝國忠不值,如果他說香港樓價衰足20年當日,同時預測細價股爆煲,今日就揚名立萬,我相信再沒有人夠膽質疑他的香港樓市衰足20年說法,捉到鹿都唔識脫角,無話可說。

紀惠集團行政總裁

[湯文亮 敢說亮話]


來源: http://www.mpfinance.com/fin/dai ... 8552&issue=20170629
PermaLink: https://articles.zkiz.com/?id=337090

Next Page

ZKIZ Archives @ 2019