中環在線：超人、賭王輪流唱淡簡文樂金句慰股民 李華華
2008-10-27 AppleDaily
金 融海嘯，人心不穩，幾位大孖沙都由唱好轉晒口風，輪流唱淡，當中只有啱啱攞完大紫荊勳章嘅彤叔鄭裕彤最積極，話會繼續投資。唔少上市公司更自爆負債，話有 銀行水喉射住，講到尾都係想安撫股民。不過，安撫股民嘅方法都有好多種，好似冠軍科技（092）同看通集團（1059）上個禮拜五公佈業績，兩間公司嘅主 席簡文樂就搞搞新意思，隨通告附上有關金融海嘯嘅名人雋語，希望幫一班小股東安然度過呢一場海嘯。
借蓋茨把口
篤信佛學嘅簡文樂，可能眼見呢次金融海嘯搞到經營環境迅速惡化，唔少投資者損手爛腳，所以發揮我佛慈悲心腸，搜集咗幾位經濟學家、分析師同企業老闆對金融海嘯嘅言論，喺通告最尾列晒出嚟，警惕自己同小股東，有啲都幾發人深省o架。
簡文樂劈頭引用聯儲局主席伯南克嘅評論，話金融海嘯未解決，即使歐美聯手救市，但喺信貸緊縮下，全球經濟增長仍面對嚴重威脅。又引用大鱷索羅斯話：「我從沒見過像這樣的境況，亦將不會看到同樣的境況。」
危機嚴重係人都知，究竟要點樣應付呢？作為IT人嘅簡主席，引用埋微軟前主席蓋茨嘅說話，「增加創意和投資是應付當前危機的答案。」
李華華