指黎明金句勁過炒家App
1 :
GS(14)@2017-02-06 07:25:20■阿喱（左）指黎明猶如藝術家，好多事情不作計算。 資料圖片
【本報訊】張家豐（阿喱）2009年加入黎明旗下東亞唱片製作，2014年完成電影拍攝工作後，選擇祼辭，「咩都試過晒，唱片、演唱會、電影都做理，工作咗都4至5年，覺得自己滑咗啞，希望創業好耐，想捱苦。」他嘆謂，若果永遠站在員工角度，永遠不會明白老闆在想甚麼，故此把心一橫出走。記者問：「跟咗黎生咁多年，乜真係冇感情㗎咩？」阿喱回答話，同黎明感情好好，現時仲保持聯絡同見面，記得當年向黎明提出辭職創業想法時，黎明彈返句金句畀佢，「努力，兄弟就一世。」好多年前傳阿喱用紅酒冧掂黎明，阿喱就話其實當年因為一個電台節目同黎明相識，就係網上廣播劇《Last Order Cafe》，今時今日YouTube仲有留底，因緣際會，黎明用高薪將阿喱挖走擔任總經理。
總經理頭銜看似犀利，但阿喱強調東亞唱片製作員工並不多，更似是一個家庭式運作公司，而擔任總經理一職的他只是小角色，不過跟黎明工作則福利多多，「成日都有白松露、紅酒，車位免費，咖啡靚。」在社交媒體尚未流行前，大家認識的黎明是四大天王，facebook廣泛應用後，大家發現明蝠俠原來可以咁搞笑，去年大型戶外演唱會事故，大家認識黎天王親力親為，以及危機處理能力。阿喱稱，大家眼中黎明慢條斯理，實質上動作快過火箭；外表好冷酷，實質上好有趣；金句多多，卻是一位真正的藝術家，「好多事情唔去計算，諗到做咩就去做咩，如果要賺錢就唔會去搞咁多嘢。」至於黎明金句，阿喱聽唔少，他形容黎明犀利過李白，「連李白作詩都冇咁渾然天成，天才嘅嘢係度唔到㗎，如果你太過計算，反而做唔到佢嗰啲金句。」但他亦分析，黎明金句不少是將九句說話，濃縮成兩句說話，得到奇妙爆趣效果。
「黎明有好多嘢係從心出發，出心為藝人好。」阿喱敬仰黎明，談到老闆有沒有值得改進之處，他答得巧妙，說黎明每天都向前衝，根本沒有時間後悔過去的事情，「但佢太辛苦，長命工夫長命做，同埋可以好多嘢一齊做，唔使攬上身，要信任團隊，放手畀團隊，要畀佢哋犯錯，要畀佢哋呼吸成長。」阿喱憶述，同黎明工作上鬧過交，而且會據理力爭，「係有少少冇大冇細」，討論熱烈時，阿喱更會夾雜粗口，但黎明氣上心頭，會否同樣粗口多多？阿喱陰笑：「我聽唔到有」，不過很多時候，黎明猶如金句，即使是阿喱，也不是事事理解，「藝術嘅嘢，冇乜準則，即係冇乜對與錯，但如果嗰刻冇人明黎明，佢會唔開心。」
來源:
http://hk.apple.nextmedia.com/financeestate/art/20170206/19919165