中環在線：彤叔潮look波鞋會股東 李華華
2008-12-03 AppleDaily
潮人配潮鞋，唔少後生仔屋企梗有一兩對潮款波鞋傍身，新世界發展（017）主席鄭裕彤噚日出席一年一度股東會，除咗西裝打呔配西褲呢個正常過正常嘅Look之外，佢仲腳踏花旗國一剔牌波鞋，黑身、黃邊配白底，非常搶眼。
自己買定有人送？
彤叔一到股東會場，行路健步如飛，進出開會場地加埋去廁所都非常敏捷，唔講都估唔到佢老人家已經年過80。睇番一剔牌嘅香港網頁，對鞋原來公開發售都未夠3 個禮拜，公價承惠港紙699銀，價錢相宜。據介紹，對鞋嘅特點係鞋身輕巧，加強前掌推進力，可以提升速度表現。啲網上討論區仲話，呢個系列嘅鞋舒適好着，鞋身透氣，唔怪得彤叔行得特別快，又特別開心啦。華華最想知道係，呢對新款波鞋究竟係彤叔自己買，定係邊位有心人送贈o架呢？
代言運動股有市場
國務院總理溫家寶喺四川地震災後，着住一對灰色NEW記波鞋跑遍災區山頭，宣傳效果仲好過畀幾億真銀簽個代言人。華華認為，祖國波鞋商再嚟香港上市，不如直接搵大孖沙入股兼做埋代言人，着住對波鞋走嚟走去，認購反應應該唔錯。
新年快到，問彤叔有乜新年願望，佢話希望股票起番晒，唔好咁多人失業，個個平平安安啦！大老闆咁講，新世界員工可以安心過年啦！