ZKIZ Archives


棒球四子表揚智叔摑完再教喊

1 : GS(14)@2016-09-02 05:49:48

【熱血點五步】熱血勵志電影《點五步》昨日票房已衝破200萬元,相對一部小成本製作電影已算難得。棒球跟足球一樣,要靠團隊合作,前日一班《點》片沙燕隊成員二叠手岑珈其(陳強)、捕手柯煒林(牛屎)、三叠手黃定謙(力王)及隊長兼外野手黃焯璘(班長)接受訪問,談到片中難忘場面,他們都不約而同想起飾演教練的廖啟智幾場戲。陳強表示有場講述隊員邊跑邊唱「鬼叫你窮呀,頂硬上……」的戲份,令智叔大怒要掌摑各人,他說:「原本智叔係借位,試咗之後,導演覺得假,要真打。我第一個被打,真係好痛,點知打到第5個嗰陣,聽到智叔講『你閃呀,你閃』。終於要由頭打過,我同班長都一日打咗兩巴。」



■岑珈其(左)因為有隊友怕被打,令他們要受智叔兩巴掌。

■廖啟智在《點》片起指導作用,引領新演員入戲在片末一場大爆發。

■一班《點》片小演員跟監製柯星沛前晚到旺角謝票。

拍沖涼戲捱鬧


牛屎和力王同樣認為贏波那場喊戲最感人,牛屎說:「嗰場智叔見我哋喊唔出,佢捉咗我哋圍咗個圈話『你哋諗吓,無論作為沙燕隊隊員,或者呢套戲嘅演員,做呢個角色都十幾日,你諗番個角色帶畀你哋乜嘢,你自自然就會喊』,之後就好型咁走開。跟住一班演員就自發喺度討論,唔使幾耐班大男孩已經喊到收唔到聲。」黃定謙話現場氣氛令你好自然投入,他說:「嗰場喊戲拍到第二次嘅時候,本來喊唔出,忽然智叔喺場邊大叫『沙燕隊,你哋贏咗嘞』,即刻又喊到出嚟。」反而班長的遭遇比較特別,他說:「出浴嗰場戲,畀班隊友話我着底褲沖涼,之後成班人衝入嚟除咗我條褲。」班長因為那場戲被家人鬧:「屋企人睇完套戲,返到屋企畀媽咪鬧『衰仔邊個畀你拍啲咁嘅嘢』。」採訪:何永寧攝影:葉君海




來源: http://hk.apple.nextmedia.com/entertainment/art/20160902/19756936
PermaLink: https://articles.zkiz.com/?id=307214

Next Page

ZKIZ Archives @ 2019