ZKIZ Archives


【人狗兩團圓】一個為「美」甘去蹈火海的人 果欄賣溫情

1 : GS(14)@2016-09-17 17:52:54

睇見甘生一副「有美萬事足」嘅樣,隔住個芒都覺得冧!



「貨同錢都唔係大問題呀!我係驚隻狗啫,因為始終都係一條命嚟o架嘛」9月4號,油麻地果欄一場歷史之嚟最嚴重嘅火災,燒毀超過20個欄檔,呢場三級火,差啲就令果欄檔主甘先生同佢嘅愛犬美美陰陽相隔。當日甘生受訪時嘅呢句說話,感動到唔少人,大家都緊張埋一份。好好彩,美美最後都冇穿冇爛,由甘生抱出火場。



肥嘟嘟嘅美美喺油麻地果欄受盡萬千寵愛

美美的媽媽Bobo(右)都係由甘生領養(圖片由被訪者提供)

果欄嘅狗BB當咗美美係媽媽,睇吓美美個樣幾無奈(圖片由被訪者提供)

美美,一隻喺果欄長大,典型又普通嘅唐狗女。十幾年前,美美嘅前主人突然唔做果欄生意,而將美美遺棄。當時甘生見到美美喺果欄游離浪蕩,冇人理佢,唔忍心美美成為流浪狗,結果就收養咗美美,仲一養就養咗十幾年,甘生話:「美美已經係我哋一家人嚟o架,我哋舖頭有張全家幅,美美企喺頭位o架!」。肥嘟嘟嘅美美,唔只係甘生一家人嘅心肝寶貝,喺油麻地果欄入面,其他欄主同送貨工人都同樣咁錫美美!「美美係行到邊都有人餵嘢畀佢食o架!即係好似狗融入咗喺我哋果欄裏面一樣。」甘生一邊摸住美美個頭,一邊笑住講。



充滿愛心嘅甘生,不時都會暫養一啲未揾到主人嘅狗BB(圖片由被訪者提供)

甘生的一張全家幅,盡顯美美喺甘家嘅地位!(圖片由被訪者提供)

果欄有唔少流浪貓貓,甘生同其他欄主都會輪流餵佢哋

果欄人畀外界嘅感覺係「茶瓜送飯,好人有限。」但原來粗魯嘅外表,卻懷住善良嘅心。除咗美美,果欄仲有唔少流浪貓貓,果欄人不但唔會將佢哋趕盡殺絕,甘生仲聯同幾位欄主輪流餵佢哋,等佢哋唔洗餓死。「其實大家見到我哋啲貓貓狗狗,就好似見到果欄嘅朋友,呢度仲有人情味,呢啲就係香港以前嗰代嘅人情味,守望相助。」



甘生的欄檔就正正喺火場對面

點解美美咁肥?呢張相解釋晒佢

除咗食,美美最鍾意就係瞓

甘生又覺得唐狗一心只跟住主人,好乖,比好多番狗好好多。仲希望大家唔好買寵物,支持領養:「我哋去買嘅時候,咪助長佢哋(繁殖者)配更多、配更多好得意嘅(寵物)出嚟,咁你有冇諗過你養呢隻係成功嘅配種,但係有幾多唔成功而畀人唔要?」「可以不愛,但不要傷害」,油麻地果欄做到,唔知大家又做唔做到呢?採訪:植詠珊(Cathy)攝影:馮峰、Neo導演、剪接:Roy編審:懷鈺




來源: http://hk.apple.nextmedia.com/entertainment/art/20160917/19773103
PermaLink: https://articles.zkiz.com/?id=309465

Next Page

ZKIZ Archives @ 2019