|
||||||
|
o依家啲分析員 真係好勤力！上個禮拜美銀美林就特登上去廈門同福建，走勻25間超級市場，搵中國綠色（904）其中一隻主要產品「玉米乳」，但係就發現周圍都無得賣。美 林之後好有「吉士」咁出咗份報告，質疑公司啲數係咪有問題。搞到中綠股價連跌兩日，大大話話唔見咗15%呀，陰功！ 雖然公司之後出通告澄清，話轉咗啲「玉米乳」去航空公司同餐廳度賣，但係股價表現都o依然無咩起色，似乎大家信美林多過信公司喎！如果華華係中綠嘅主席孫少鋒嘅話，見美林個分析員搵「玉米乳」搵得咁辛苦，就梗係即刻寄一箱請佢飲啦，再同佢坐低好好哋溝通吓！ 傳聞中綠想批股 不過，中綠都唔係蹺埋手咩都唔做o架。冧唔掂美林，咪冧過第二間囉！公司啱啱喺星期一、二請咗幾間證券行嘅分析員，上去廈門實地考察。華華睇番啲報告，份份都唱好。其中，中銀國際就幫中綠護航，針對美林份報告內容逐點反駁。 中 銀話搭廈門航空去公司總部嗰陣，喺飛機上面真係見到有「玉米乳」提供，可以問空姐拎番杯嚟飲，力證公司無講大話！之後，中綠又帶分析員去同分銷商傾偈，兼 且帶佢哋去超市視察。中銀話，雖然喺家樂福同物美呢啲連鎖超市，的確無「玉米乳」賣，但係喺一啲士多仔（mon-and-pop stores）就見到有喎，個包裝上面仲印有中綠嘅舊代言人陳好添，擺明係上年年中嘅舊貨，唔係裝出嚟o架！不過，大半年前嘅舊貨都仲賣緊，銷情就真 係…… 上個星期初，有口痕友就同華華講，傳聞話中綠想批股。不過，被美林咁樣玩一玩，華華覺得，就算中綠真係想批股，都好難做得成！唔知今次成班證券商走出嚟唱好中綠，同呢單傳聞有無關係呢呵？ 李華華 |
||||||