樓價在2014年是跌還是升,係左丁山最近向朋友之中嘅地產專家提出嘅問題。睇報紙報導,地產股分析師、經濟師多數睇淡,睇跌一至二成,悲觀派甚至睇跌二至三成,專家看法有無實質支持呢?新樓盤成交似乎好暢旺噃,特別係啲市中心新盤,例如灣仔囍匯大把人搶住要,雖則係價錢非常貴,一個四百呎單位要一千萬元或以上,左丁山聽到都伸出條脷,但老友記W就買咗一間喎,有乜用途呀?相信係當酒店房用,久唔久因為有應酬至深夜,就索性在灣仔過夜,唔返屋企。
一位房屋委員聽見市建局啲樓咁好賣,特別搵人帶佢去考察嚇,佢在簽約揀樓現場,所見到嘅買樓人士,幾乎全部係銀髮一族,似係已經上岸之人,走來買個細單位做乜嘢?有關人士向佢報告:「灣仔係全港十八區最富裕嘅一區,大把隱形富翁住在灣仔,不少係買個細單位俾下一代做住宅嘅,或者係兩個老人家嚟住,貪方便兼懷戀少年時光在灣仔長大吖嗎,現在住緊嘅大單位咪讓俾兒子新抱,或女兒女婿住囉。」
委員聽完,認為幾有道理,上到現場睇樓,真係似足酒店房一間,真正廚房欠奉並非一般家庭住宅,千零萬買間「鬧市中心酒店房」,香港人都願意付出,故此地產大好友L對左丁山及委員講:「我成日話香港房屋有鋼性需求,隱形富翁之多,簡直數唔曬,80後買唔起樓,父母就同佢交首期五至六成,等啲仔女供得起樓。我要向啲40後、50後父母致敬,有此原因,我繼續睇好樓市,今年香港就業人數創新高,逼近380萬,家庭收入中位數繼續向上爬,加薪幅度亦有4%至5%,我敢膽話美國一定唔加息,唔好聽財政司司長出口術,唯一負面因素只係SSD、BSD、DSD啫。」呢三D辣招確係辣到啲中產換樓客眼淚水都飆埋出嚟,佢地最恨梁振英之處,並非冇普選,而係買樓先付DSD,慢慢等退稅,加埋金管局嚴限銀行按揭貸款上限,就令到一啲較高收入中產夫婦往往欠缺嗰百零萬做唔到按揭。委員有朋友嘅下一代夫婦兩人皆在投行工作,每月家庭收入近30萬,住八百幾呎樓,生咗一子一女,請咗兩個菲傭,太太話屋內住咗六個大人細路,太擠逼嘞,成日話要換間千二、千三呎,但就因為兩人雖有現金流嚟供樓,但一時之間唔夠現金交五成至六成首期及印花稅,咪日日鬧梁振英囉。