📖 ZKIZ Archives

搬屋麻煩，搬電訊服務更麻煩。本刊接連收到投訴，有讀者搬屋前已獲電訊盈科確認可於新居繼續使用服務，惟客戶付二千元搬遷費後，電盈卻突指「唔夠線」，投訴人無法使用服務，欲取消合約反要被罰錢，經本刊介入後，電盈才願意無償終止合約。

麥小姐一直幫襯電訊盈科旗下固網電話、網上行寬頻及nowTV收費電視三項服務，今年一月她準備搬入大坑豪宅「名門」，並向電盈查詢搬遷服務細節，當時職員確認麥小姐可於新居使用舊有服務，更向事主收取每項服務六百八十元，總數約二千元搬遷費，又安排師傅負責搬遷工程。

惟二月師傅上門檢查後卻稱未能安裝，多番交涉後電盈指名門機樓沒有足夠電線位，麥小姐只能從電話、寬頻及nowTV中保留一個服務，但又明言麥不可取消所有服務，否則會被罰款，麥怒斥電盈離譜：「如果話有penalty，我覺得唔fair，因為係佢一直提供唔到服務俾我先。」問題就此膠着，麥小姐搬進新居後被迫與世隔絕。

跟進：收錢後賴無線位

記者與事主一同致電電盈客戶熱線，客戶經理解釋名門的指定網絡商是「和記電訊」，電盈須向和記及名門「拎線」始可提供服務，麥即反駁電盈若早知無足夠電線位，為何承諾可搬遷所有服務兼收取二千元，對方則支吾以對：「要入咗application嗰時先知唔批（電線位）。」不過，記者以客人身份致電電盈客服詢問可否將固網電話、寬頻及nowTV同時搬遷至名門時，對方仍爽快回覆「無問題」，並無提到有機會「拎唔到線」。名門管理處職員則踢爆，近月收到不少住戶反映，無法安裝網上行寬頻服務，估計是和記租借電線位予其他電訊商「可能都借得七七八八」，又指名門早已批准電盈「可以藏線入嚟，只係佢冇做呢個工程。」

個案二村屋安裝無了期

電盈收足搬遷費，最後卻無法提供服務，原來並非個別例子。鄭先生為方便養狗，去年十一月遷居元朗八鄉水盞田村村屋，事前電盈同樣確認新居有網絡覆蓋兼派員上門裝寬頻，但花上三個月都未能成功安裝，「電盈話自己嘅總線唔夠用……約咗四次都係答我裝唔到。」雖然電盈無法提供服務三個月，投訴人鄭先生卻要每月交足二百六十八元月費，電盈自知理虧，上月借出便攜式無線路由器（pocket wifi）予鄭補償，但下載速度只有7.2MB，更經常斷線，十分不便。客服職員曾解釋要設立新電箱始能解決問題，但一直無回答工程何時進行，鄭大呻無奈：「喺村屋地方都無得選擇，附近都只用緊電盈，我無嘢可以做到。」

專家話：無服務仍收費抵打

對於鄭先生的個案，香港資訊科技商會榮譽會長方保僑直斥電盈離譜，「呢啲就抵打啦，交月費直頭冇可能，依家係電盈裝咗幾個月都未入到去上網。」他表示新界地區要開新電箱相對困難，因涉及挖路所需程序較多，但電盈有責任盡早與客人協商解決。至於名門個案，方保僑相信電盈為省成本故沒有自行鋪線，但向和記租線卻有較多掣肘，他估計和記出租的電線位有限，「電盈好難幫你租三條線」，故電盈要求麥小姐只可保留其中一種服務，客人難以追究。他表示通訊局有指引規定電訊商之間須「網絡互連」，即不能拒絕對方「過路」，但實際運作仍要視乎雙方協定。大律師陸偉雄認為事件屬合約糾紛，供應商未能提供服務或構成毀約，但建議雙方協商解決問題，「你扣多我錢就要俾番我，或者多提供番幾多個月嘅服務俾我。」他又指若事主因有關問題衍生其他費用，如租借其他上網工具，可向電盈索償，但須證明費用是合理及必須，例如提供多次未能連線的畫面和有關單據。通訊辦過去兩年接獲有關客戶遷址的投訴個案共一百三十宗，根據香港通訊業聯會發出的《電訊服務合約業界實務守則》，服務供應商應合理地盡力在客戶擬搬遷至的處所提供服務，如無法於該地址提供服務，客戶有權選擇在原址使用服務或終止合約，但終止服務的費用不會包括剩餘合約期的任何月費。

回應：願不收費終止合約

電盈回覆本刊，因只能於麥小姐單位租一對線路，只能提供有限服務，但決定取消所有合約兼不收取任何行政費用。至於鄭先生個案，收費是經事主同意，現等待事主與該地段業主商討工程許可證，然後安排鋪線。 （陳君沛、李詠珊）

壹判官

收咗搬遷費又提供唔到服務，仲夠膽罰人錢，焗客人照交月費，點計都應該先賠償客人啦！劣劣劣劣（五個劣為最嚴重）

可能就如特首梁振英所說的土地問題，香港的樓價真的貴到得人驚。根據《全球生活報告：城市指南》去年十月的研究，探討全球最受歡迎的三十一個居住城市，香港繼續保持住宅價格全球最高的地位。不少沒有首期「上車」，又或負擔不起高昂租金的年輕人，為了有私人空間，迫於無奈會選擇環境惡劣的舊樓劏房。悲哀的是，市區不少甩皮甩骨的劏房，租金隨時也要五六千元。對於大多數沒有父蔭的年輕人來說，住豪宅簡直是天方夜譚，想也不敢想的事情。不過，現在機會來了，因為赤柱有豪宅竟然變成劏房。本刊發現，一個位於赤柱東頭灣道、只有三座大廈的低密度豪宅屋苑，去年下旬開始大改造。原本是一梯兩伙，單位面積二千多呎，瘋狂劏成每層二十多個房間的這個豪宅劏房屋苑，標榜有無敵大海景，兼有公共空間和泳池，現時房間月租最平四千元，可能比市區舊樓劏房更便宜。不過，這裡的房間十分「蚊型」，只有六十至八十呎，而且位置偏遠。抵不抵住，真是見仁見智。

一個Facebook專頁上，表明在赤柱東頭灣道二號，有大量六十至八十平方呎的海景套房出租。東頭灣道是赤柱的傳統豪宅地段，為何會有劏房出租呢？上週記者佯裝租客到上址睇房。這裡原來是一個低密度豪宅屋苑，共有三座大廈，「第一座裝修緊，第二和第三座共有一百四十四間房，已經租咗一半出去o架啦。」接待記者的男職員說。

每層劏二十間房

這屋苑樓高三層，每層樓都劏成二十多個房間，十分誇張。男職員帶記者去到其中一間房，「呢間係大房，八十呎，可以望到個海o架。」職員又說大約六成半房間都有海景。房間裝修新淨，設有「蚊型」洗手間和浴室，肥人轉身會有困難。不過，房間竟然沒有衣櫃，「因為房間面積較細，無位放置衣櫃。我哋會提供衣架俾客人，衣服掛喺側邊。」職員又說，房間不會提供毛巾和牙刷等日用品，「（毛巾）要自己帶的，樓下有洗衣同乾衣機，每次收三十蚊。（牙膏牙刷都係自備？）係，要自己買。只係床單同枕頭，每星期會替客人更換清洗一次。」

月租最平四千

租金多少呢？「五千蚊一個月，最少租一個月，如果簽一年（合約）就有八折，即係四千元一個月。（要否交按金？）短租按金二千蚊，一年就四千蚊。」哇，最平四千蚊一個月，計上去租金比不少市區唐樓劏房還便宜。不過，這裡是山長水遠的赤柱，交通費和時間成本仍未計算在內。其後，職員帶記者看細房，「呢間房六十呎，都一樣是五千元，因為現在做一個特別推廣活動，全部房間都是五千蚊月租，（雜費會全包？）水電煤費用全包嘅。」屋苑提供另一福利，是設有一班免費穿梭巴士來回銅鑼灣，換言之想慳就每日只能出入市區一轉。如想乘坐其他交通工具，則可步行約五分鐘到赤柱市集，就有巴士站。「坐巴士去銅鑼灣或中環，唔塞車四十分鐘就到，坐小巴去銅鑼灣仲快，二十分鐘就到。」由於這裡原是豪宅屋苑，所以設有泳池，但暫時未開放使用。而天台全日開放，租客可隨時上去看海景。不過，有住客說天台夜晚很多蚊，最好不要去。

屋苑設施免費用

最特別的，是地下的公共空間，感覺有點似大學宿舍或外國青年旅社，「客人二十四小時都可嚟呢度。有桌球、籃球機、雪櫃同微波爐。遲些會好似廚房咁，有一個電磁爐，可以煮嘢食。」此外，還有電腦供租客上網和提供Wi-Fi，「所有設施都係免費。」這裡的租客有本地人和外國人。住了三個月的港男Darren，覺得五千元租到有海景的住所，十分超值，「因為有海景，好似千萬豪宅。」他說這裡最大的賣點是有海景，但不是每間房都有，「我間房好彩有，如果你叫我住間冇海景嘅，就唔太吸引。我覺得入嚟赤柱住，就係想一瞓醒就望到海景。」

跟劏房是兩回事

這裡的房間，跟劏房有何分別呢？「出面嘅劏房會大啲，呢度呎價較貴，但有公共空間，以及呢度新裝修，所以感覺還可以。但新淨只係暫時，因為係新裝修。」Darren又覺得這裡跟舊樓劏房是兩回事，不可以作比較，「如果喜歡去海灘，住呢度就超值，因為行一陣就到。」但他承認赤柱較偏遠，「去九龍區會遠一點，去新界更加遠，食嘢方面選擇唔多。」他慶幸自己主要在港島區活動，所以影響不大。另外，這裡每到夜晚，地下大堂都會好熱鬧，「有時我哋一大班人喺度飲酒傾偈。（是否很易認識朋友？）都會，尤其係外國人，好容易做朋友，而且大家背景唔同，對大家都會好奇，就好似大學宿舍嘅感覺。」而專門寫blog的女租客Sonia，亦覺得這裡價錢合理，所以搬進來，「因為呢度環境，與我以前嘅居所相似，都夠靜，以及呢度係一個洋化小社區。」她認為住這裡好過住唐樓劏房，因為夠新淨，「整幢建築物係新嘅，以及呢度住嘅人唔太複雜，可能複雜只係我唔知道，哈哈哈。到殘舊咗，投資者又唔肯投資翻新嘅話，就會好似外邊劏房嘅感覺。」

女住客批房太細

而她最不滿的，是房間太細，「真係超細，我覺得有啲虐待嘅感覺。（有什麼設施要添加？）我認為房間要大啲，讓客人可以擺放衣服。既然預咗租客長租一個月或一年，就會當呢度係屋企。」她的房間沒有海景，「間房咁細，就算有海景又點，赤柱監獄都可能有海景啦，哈哈哈。」她又認為，廉價住豪宅要付出代價，「我覺得無論交通費，又或往來時間，代價都好大。另外我認為，住慣深水埗或旺角，你會好享受樓下就有糖水和雲吞麵食，但呢度係冇嘅。」所以住這裡，她覺得對工作會有影響，「如果喺港島返工還可以，九龍區上班就唔得啦。」另外，社交都會少了，「所以我已跟朋友提早講再見，哈哈哈。」

原是一梯兩伙

本刊翻查資料，發現這個豪宅劏房屋苑本來叫「步雲軒」，是裕景興業有限公司旗下收租物業，而裕景興業的背後老闆是陳永栽，是來自菲律賓的富豪，在香港有多個物業投資。附近地產代理表示，「步雲軒」之前是一梯兩伙，單位面積由二千一百至二千二百多平方呎。而根據一些樓宇租售網站資料顯示，上址單位當時月租，租金大約九萬元，絕對是豪宅級數。以一幢樓有六伙計，月租總收入約五十萬元左右，但並不容易全部租出。裕景興業由去年七月開始，多次向屋宇署入紙，申請在「步雲軒」進行小型工程，包括加建非承重牆，加建或改建排水渠和洗手盆等工程，明顯是將豪宅改成劏房。現時一層被劏開二十多間房，全幢樓就可有七十多間房出租，以每戶五千元計，每月總租金收入約三十七萬元，雖然比原本少，但全數租出機會很高，不用像以前那樣經常空置。

發展商增建被拒

另外，裕景興業早前向政府申請放寬地積比，希望在原址增建一幢住宅，後因外界反對而撤回申請。不過，發展商之後提新方案再闖關，將項目層數由八層削減至四層高，維持提供十二伙。將豪宅變成劏房，的確十分罕見。但不願上鏡的赤柱地產代理麥小姐批評，此舉會令到赤柱人流變得複雜，「幾千蚊就租到一間豪宅劏房，話唔定會幾個男人夾錢租一間，用嚟做炮房，好過租時鐘酒店啦。」無論如何，市場總算是提供了多一個選擇，想又便宜又有赤柱海景房，年輕人還是有機會的。

撰文：程志康攝影：韋平、田俊[email protected]

國家主席習近平發很多「中國夢」。其中一個，是大搞代表「改革開放」的深圳前海。不過眾所周知，前海開荒六年，發展依然龜速。結果一雙有形之手，伸落香港 搶客。近月前海掟出銀彈攻勢，「利誘」香港後生仔北上創業。不單針對香港樓瘋，提出只要千多元人仔，就可租住前海五百呎單位；更提供高達二百萬元人仔津貼，幾乎只要出示香港身份證就可以成功申請。由於主力硬撬香港初創公司，與補貼不多的大埔科學園正面對撼，不少IT人已申請北上。創科局局長楊偉雄亦配合「國策」，轉而大力推廣前海，立法會議員莫乃光炮轟：「冇見過有政府會叫人去第二度發展，Donald Trump（特朗普）都唔會啦，簡直匪夷所思。」

前海要發展，阿爺身邊的「牛鬼蛇神」通通現形。多個「大孖沙」如誠哥、四叔，都沒在前海有大型投資。最俾面的，當然是689隔籬的「梁粉」鄭家純。上年中前海搞「港貨城」招標，結果周大福（1929）順利投得，投資額三億多元人民幣，於去年十二月火速開業。不過，本刊到這個「港貨城」視察，發現不少商鋪都「拍烏蠅」，雖然有莎莎、美心及余仁生等二十多間香港品牌進駐，但佔地二十萬平方呎的商場，眼見顧客不足三十人！美食廣場人流十分稀少，附近商鋪員工都在休息，不少廚師在「呆企」，廚藝無用武之地，就在大門口的麥當勞亦幾乎零顧客。在深圳居住的楊小姐，第一次與友人來光顧這「港貨中心」，她直指未必再來：「東西又貴、又不齊全，這次都是跟朋友來，下次都不會考慮！」

前海變錢海

找港企發展前海，簡單來說，就是搵香港人做開荒牛。上年在香港科學園、創立「家務幫」app的吳宇森（Sam），獲新加坡商人投資一百萬元坡幣（約557萬港元）入股，算是近年成功的港產Apps之一。近月Sam不斷收到電郵，邀請參加前海講座，令他心郁郁：「有啲係交流會，有啲係招商活動。我都覺得香港做極都係得七百萬人，上到嚟多啲機會，未嘗唔係一件好事。」其後他到前海參觀，一開始尋找天使基金資料，已發現種類比香港多：「有好多option都可以搵到，資料比較易拎到。」最吸引他北上的原因，莫過於一個「錢」字：「喺香港科學園，下下都要填form申請，但前海就係一筆過俾，簡單好多！」前海的銀彈攻勢，包括：最高二百萬元人仔津貼，另有三厘低息貸款、上限二百萬；十二個月office免租金，兼且提供五百呎獨立房間；前海又經常舉行創業大賽，獎金達到一百二十萬港元；而最正是，附近屋苑「龍海家園」有七百七十多個單位留給香港人租住，由三百五十呎至五百呎不等，月租只是千一元；不單平過香港多多聲，亦一樣平過深圳其他私樓！

「政府逼港人離開」

相較之下，香港科學園可謂相形見絀：資助最盡三十萬、無住屋津貼、知名度最高的比賽ICT Award，不設獎金。Sam坦言：「我諗邊一間公司都好，最缺乏嘅都係錢。就好似我加入科學園嘅計劃，資助限額只有三十萬元，每一次都要準備晒資料等佢批，起碼兩、三個月先拎到。每個星期起碼用一日嚟搞呢啲admin嘢，係好麻煩！」他的拍檔Gary愈說愈勞氣：「講真一年得三十萬請得咩人？當請個有經驗嘅，一個月要兩萬，兩年都要四十八萬啦，一請人已經無晒！」他續指：「香港聽落好似好多資助，但好似工貿署個發展支援基金，話就話三至四個月審批，但最少九個月先有結果，同埋做醫療研究嘅優先。講真研究到點醫寨卡病毒，都唔使貪你嗰少少錢！」Sam坦言完成科學園十八個月培育計劃，「claim」足三十萬後，就立即遷出，決定北上：「之後租科學園office已無特別優惠，租金同出面差唔多。大埔又唔係特別近市區，所以搬出嚟好過。」

服務人員瞓緊覺

不過，為「錢」北上開荒，收成有排等。記者由深圳灣口岸出發，打算乘搭來往前海夢工場的穿梭巴士，發現早上只有兩班車出發，錯過了就要自行搭的士，頗為不便。到達夢工場，人流不算多，園區建築物平均只有三層，多用作手機應用程式開發，但只有一半房間有員工上班。到了午膳時間，只有約二十名員工出外用膳，連7-ELEVEN便利店亦未見有人出入。由前海當局設立的資訊中心，等到二時，才有一名園區職員上班；行上前詢問有關港人創業的資訊，他竟答：「上網都有了，自己去看吧。」而在櫃枱後的辦公室，隱約看見有員工在午睡。夢工場旁有一處銀行區，港人熟悉的恒生、中信銀行都找得到，但一樣是──無人。

「發展比想像慢好多」

在香港開餐廳的Wing，就因為業主的超平租金吸引，上年與三位友人投資過百萬元人民幣，在前海夢工場旁開設西餐廳。她不諱言：「速度係比想像慢好多。」翻開餐廳的菜牌，午市套餐平均要五十多元，單碟更要七、八十元人民幣，價錢與香港相若。她指客人消費能力不低，但人流卻是一大問題，餐廳提供150個座位，但從未坐滿過，Wing指：「呢邊食飯時間係兩個鐘，所以係鬆動啲。同埋呢邊嘅人見到要等就會走。」除了人流外，Wing還要遷就客人口味：「呢度好多四川人，佢哋鍾意食辣，我哋要調校番。同埋佢哋始終都鍾意用筷子食飯，覺得食西餐好滯，一個禮拜食三餐已經好俾面！」她直言在港一天的營業額，在這裡要做三至四天才能做到。

轟政府無視問題

現時Wing的餐廳每個月都蝕錢，她仍信前景比在香港好，但未解決的困難仍然不少：「呢度發展真係好慢！無論係新進駐嘅餐廳，或者客增長都好慢！去到夜晚都係得十枱八枱客，到八點後基本上已經無人！」她指這區很難做到區外客，現時惟有寄望長遠發展：「翻本期一定長咗，（驚唔驚回唔到本？）都無得驚，唔做都做咗！」近月創新科技局局長楊偉雄不斷推廣前海，上週五又有前海深港創新中心來港招商，馬不停蹄。立法會資訊科技界議員莫乃光直指：「本地政策一定係鼓勵啲人留在本地發展，好似特朗普、希拉莉咁，點會同你講，你要去加拿大發展，嗰度好好，簡直係匪夷所思。」他補充，過往政府對初創企業，都是「俾嚿錢養肥佢，養肥咗就叫佢去第二度發展」，缺乏高瞻遠矚：「係咪應該增撥資源去做市場推廣、購買多啲本地公司產品同服務？唔係下下谷大公司，大公司又將產品外判俾細公司，剝削細公司盈利。」IT界人普遍指，創科局對本地創業資金及人力支援不足，本刊曾就此向局方查詢。創科局以書面回應指，「自成立以來，香港的創科生態系統已得到明顯的改善」，並細數過往香港創科的成績，未有直接回應問題。

撰文：梁延宇攝影：關永浩[email protected]