ZKIZ Archives


加埋200歲3個中佬搞startup跑在最前線

2016-12-22  NM

影帝劉青雲得獎時曾感謝太太:「每次我揸住太空船,你總有辦法令我安全返回地球。」郭藹明為愛情不做航天工程師,浪漫得賺人熱淚。然而,同樣由美國回流的航天工程師趙國安(Daniel),在愛情路上卻得不到美滿結局。他醉心研究導致與太太離異,並於六十多歲時,展開了他的startup之路。Daniel一○年創立天域媒體科技,把多年來製造火箭的心得,轉移成一套全球獨有的「4D」音響技術,成為科學園中做得最尖端的高齡人士。今個月,他與兩個老友拍檔王文煥(Clarence)、即中原地產創辦人王文彥的細佬,以及謝瑞麟(0417)前CEO阮偉權(Elliott),舉辦了全球首個發布會暨電影試映會,標誌着成功的第一步。三人加埋已近二百歲,但Daniel在發布會後,緊接着第二天搞會展展覽,抽空訪問後又半跑趕到灣仔開會。不累嗎?正由同事幫忙set頭的Daniel,眉開眼笑回應:「哈哈!我覺得自己仲係好後生,好似啱啱大學畢業咁,好興奮咁做唔停!」不用戴上假髮,年輕之態霎時重現在他身上;原來臨老創業是男人的保養品,比拉面皮更有效!

電影試映會在銅鑼灣時代廣場舉行,這套電影《Beyond Skyline》,將音效後期製作交給天域處理;《Beyond Skyline》由《阿凡達》及《2012》視效設計團隊製作;交得俾天域,證明已認同其技術。這天曾執導《異獸戰》的《Beyond Skyline》導演Liam O 'Donnell、及其他荷李活製片人等,都有來港出席。事實上,Daniel已到國際級「境界」,他研究的,是結合了信號還原的航天技術、心理聲學及現實增強技術(AR)。前者用於加強聲音從數據輸出後的準確度,後者牽涉腦部對哪種音頻特別敏感,從而「對症下藥」,發出相應聲波刺激。說實話,這些理論在記者眼中跟火星語一樣難明,但親身坐過戲院最前排、體驗過加入聲效的前後對比,感受到戲中木頭被火燒的細膩聲音及演員急速的呼吸節奏後,就知這一切並非吹水。按最貼近人們的理解,其技術就是令整個戲院所有位置也是「皇帝位」,觀眾不論置身哪裡,也能細膩地聽到並感受到電影中的情感細節,打破傳統戲院受座位及布局所限,不能實現三百六十度球形全方位環繞聲的限制。在這發布會上,三位自稱「爺輩」的創辦人滿場飛,喜悅之情拍得住自己家娶新抱。

Tech佬的浪漫

「我認為我(前任)太太踢走咗我,係佢選擇得啱!」會後回到他們的基地科學園,六十九歲的Daniel,反而回顧起前塵往事。香港出世的他,在五十多年前跟家人移居美國,半生的大事也於此地發生:在加州大學長灘分校的機械工程系畢業、與同樣來自香港的太太結婚,以及後來加入美國太空總署工作。回想跟火箭為伴的日子,他指做實驗時,要經常不見天日地模擬太空環境,一個電話後隨時要跟家人闊別數天,已是等閒事。熱愛尖端科技的他雖懂得疲中作樂,卻苦了身邊人。「嗰陣太太話做醫生都可以輪更瞓覺,但做火箭嗰部分,係你負責就得你最了解,一緊張就要返去,無得假手於人。」一個火箭project,原來可以長達十年!四十多歲時,Daniel太空總署的上司,指已無大型火箭計劃讓他跟進,勸他離開,他這才開始萌起實踐心中夢想的念頭。熱愛歌劇及古典音樂的Daniel,認為傳統的音響設備有缺陷,一直沒能給他置身現場的感覺,因此決定自己動手做。為了能跟硬件供應商及技術人員更緊密接觸,他選擇回來香港。「喺美國你向工廠訂貨,一個星期後收到算快到叫人感動o架啦!但喺香港,可以隨時返珠江三角洲睇廠,方便好多。」離開火箭實驗室,再走進聲效研究室,這次還要是離美國12,708公里遠的香港,另一半終於再也忍不住。「當時老婆話我返實驗室仲多過喺屋企,叫我返咗去香港唔使再返嚟啦。」笑嘻嘻地形容自己被「炒」的他,指二人關係仍很好,「仲係好朋友嚟o架,離婚係大家着眼點唔同,佢睇重嘅係家庭生活,而我唔係。」

中佬間的友情

時時把投資金額稱為「買餸錢」的Daniel,已投放數千萬落此盤計劃中,如真的用來買餸恐怕可以餐餐吃九大簋;但他卻草草以快餐或三文治等為三餐。十多年來在美國、香港及內地來回穿梭的Daniel更以實驗室為家、酒店為居,直到最近才正式在大圍築起名為「休息」的地方。「其實真係辛苦過整火箭,嗰陣唔使搵人去介紹我支火箭得唔得,又唔使計住開發要使幾多錢。」一個成功男人背後,不一定要有個女人去支撐,換了中佬去做也成事,而同是六十歲的王文煥(Clarence)及阮偉權(Elliott),七年前與Daniel認識成為好友,正正擔當起這重要角色。「Daniel鍾意聽歌劇,我咩都聽、京劇呀紅線女等等都鍾意,而Elliott就聽爵士樂嘅,就係認同部機得所以先加入。」身形較強壯的Clarence,攤開手輕鬆地道出。原先從事銀行及地產業、投資超過數百萬的他,已忘卻了實際金額,卻怎樣也忘不了一路走來的苦樂。在常人眼中,航天科技知識應用在音響設備上,就像科幻片內容一樣難捉摸,用三小時去解釋也不如以三分鐘聆聽有效,但在起初時慘遭傳統膽機發燒友所鄙棄。

接受不了數碼味

「試過拎部機去俾膽機發燒友試聽,點知佢哋一連接我哋部機時就專登將音量收細,話怕會燒壞佢哋嘅器材喎。」Clarence說道。身為發明者的Daniel加把口說:「係啊!聽慣膽機嗰班開頭話呢啲聲太通透太乾淨,太『數碼味』接受唔到。」別人笑他們太瘋癲,但他們沒笑別人看不穿,反而把恤衫衣袖摺起,抬着黑黑實實的器材走遍中港兩地戲院,尋找知音人。「而家杭州、北京及廣州都有戲院安裝咗,後來北京嗰邊有自己做問卷調查,發覺有百分之六十嘅觀眾認同音質好咗。」除了內地院線,於荷李活供播放及投票奧斯卡候選影片的重量級影院Dick Clark Screening Room也安裝了他們的心血,而荷李活科幻電影《Skyline》更願意採用他們的技術作音效後製,令他們三人找到了發展出路,確立了技術定位。「荷李活呢班人係技術最尖端嘅一群,佢哋正正要求夠現場感,所以好鍾意呢個技術。」Daniel自豪地說。Elliott是三人中最遲加入天域,原來在他來前,此公司連網站也未有,可謂精於技術但盲於推廣。「以前我認為自己係技術公司,我搞技術又使咩用網站?有料人哋就自然會知,但原來唔係。」Daniel結果找上了投資者之一、做開商業諮詢的Elliott來幫手,終於完整了此間公司的四肢,成為了科學園裡的高齡鐵三角,更誤打誤撞勝出了去年科學園搞的startup比賽。

與後生的火花

「我哋嗰日仲好似大鄉里咁,喺科學園個牌前影相留念,諗住參加過就算。」Elliott笑指當日只是被臨時拉夫去一同講解此技術,卻意外地被一班後生仔包圍。三人回想當天經過,仰天大笑,以「震驚」二字來形容。「嗰陣一行入去,嘩!全部都係後生,著晒青青綠綠上衫同牛仔褲,啲波鞋又有花紋,直情鬼火咁型啊!」俾他們嚇親,年輕的也傻眼,但就算無「關愛座」,後者已表現得極尊重前輩。「佢哋好好,主動幫我哋搬嘢,仲同我哋講good luck,哈哈!」Daniel指此役後,他開始與科學園其他的後生仔交流技術心得,沒輩分之分。開口埋口也說「不要睇小後生仔」的Daniel,說多年來唯一的遺憾是無兒無女,而未來想做的,是把這研發心血傳授給跟他沒血緣關係的有為青年。「我從未諗過退休,因我覺得一退休就係等死。不過我始終要搵到班人去接手我嘅技術,同我一齊努力。」看着辦公室外的燦爛陽光,他笑說十多年沒放假的生活雖不算苦,但如果能回夏威夷曬吓太陽就最好。看來tech佬的心願,遠比他研發的技術簡單!

撰文:黃綺敏攝影:梁正平、關永浩攝錄:廖健昌[email protected]

PermaLink: https://articles.zkiz.com/?id=230357

4大女主角加埋159歲無綫狂拍續集

1 : GS(14)@2016-10-29 13:20:32

加一個字破壞一套戲名?無綫係專家。簡單加個數目字/「再」字,如《使徒行者2》、《再創世紀》,已經搞掂。睇無綫劇,就好似永劫輪迴咁,同一個劇,一係翻拍,一係開續集,而開續集嗰啲,大多數都唔係原班人馬,《學警》系列都已經算係比較「一脈相承」,《潛行狙擊》唔算,因為已經由《學警》變成Laughing哥嘅故仔。《溏心風暴》系列呢,第一同第二輯故仔完全唔同,但卡士又差唔多,但角色性情大變,又關係複雜,第一輯係親人第二輯變情侶嗰種,睇到傻。不得不提,當然仲有四位女主角加埋百幾歲嘅《深宮計》,梅小青回歸之作(《溏心》係佢老公劉家豪得意之作),四大女角平均年齡40歲:35歲劉心悠、31歲周秀娜、42歲陳煒同51歲羅霖,又係食《宮心計》條水。男主角呢?回巢幫拖嘅馬浚偉、大台力捧嘅蕭正楠,同埋成日俾監製迫佢扮cute或超齡MK嘅馬國明。至於麥明詩都有份拍嘅《使徒行者2》,冇爆seed哥林峯,又冇釘姐佘詩曼。林峯係因為同無綫約滿,激嬲方丈,所以《使徒》電影版都唔預佢;至於釘姐,聽聞係因為佢開個價太高,所以即使有得拍電影版,劇集版續集依然被飛。冇釘姐,但有余詠珊愛將黃翠如,仲有麥明詩,而卓Sir苗僑偉同歡喜哥許紹雄都喺度,加入咗宣萱、周柏豪同大奸角陳豪。港視回巢嘅蘇萬聰將會擔任監製,取代第一輯嘅文偉鴻。留意番,呢套劇係前傳,仲係同愛奇藝簽署合作協議,中港合拍。而另一套中港合拍劇,將會係依家重播緊嘅香港人經典劇《創世紀》續集——《再創世紀》。幕前幕後班底唔同晒,套劇集拍好剪好後,擺上騰訊首播,就連首曝光嘅宣傳片,都係簡體字。無綫董事局加入咗幾多「紅色背景」人士,大家心照。中國梅鐸兼無綫大股東黎瑞剛,冇耐之前先被委任為大台副主席,依家更加坐正,做埋早排邵氏兄弟主席兼非執董,仲搵埋安樂影片前高層兼大陸編劇姜偉幫手。今年8月,行政長官和行政會議批准TVB申請,准許黎瑞剛、陳國強、許濤同李寶安以《廣播條例》下「不符合持牌資格人士」之身份,對TVB行使或繼續行使控制。咁《使徒2》仲敢唔敢講黑警?




來源: http://hk.apple.nextmedia.com/entertainment/art/20161029/19816014
PermaLink: https://articles.zkiz.com/?id=313993

【天氣涼了】30cm拉絲芝士煲仔飯 加埋餐肉真係夾?

1 : GS(14)@2016-11-10 08:03:50

中西合壁的芝士煲仔飯,拉絲呃Like一流。



這家開業超過廿年的茶餐廳,每逢秋冬都有煲仔飯供應,除了北菇滑雞、豉汁排骨、鹹魚肉餅等傳統口味,亦有用上芝士的fusion口味。第二代負責人李耀榮(Ray)指,芝士煲仔飯的念頭源於近期大熱的芝士撈飯,決定作大膽嘗試,看看芝士與煲仔飯究竟能擦出甚麼火花。



邪惡芝士煲仔飯($68)有雞肉、牛肉、午餐肉三款口味,全部都有洋葱和粟米作配料,並配上較煙韌的水牛芝士和濃味的車打芝士。煲仔飯即叫即做,落單起要等約20分鐘,師傅先將粟米和洋葱略煮,然後再放肉,滾起後再放兩種芝士冚蓋稍焗,最後鋪上炸煙肉絲。由於加入水牛芝士,拉絲效果非常明顯,不過將芝士加入煲仔飯,難免令人有保留,我們找來兩位記者試食,看看芝士和煲仔飯是否匹配。記者Marcus:「煲仔飯最大特色就是旁邊有飯焦,飯焦與煙韌和香的芝士同吃,味道很匹配,比想像中好吃。」記者Red:「我覺得牛肉芝士煲仔飯不太匹配,反而平日吃到的窩蛋牛肉飯會好吃點。雞和餐肉比較匹配一點。」有人認為必須配上臘味、肉餅才稱得上煲仔飯,也有人認為在傳統中加入創新無傷大雅,但口味始終因人而異,不過可以肯定,這款芝士煲仔飯用來打卡呃like,絕對是一流!榮記茶餐室慈雲山毓華里12號地下記者:李煒汯攝影:陳健邦


位於慈雲山的榮記茶餐室開業至今廿二年。

第二代負責人李耀榮(Ray)指,芝士煲仔飯的念頭源於近期大熱的芝士撈飯。

邪惡芝士煲仔飯($68)有雞肉(左)、牛肉(右)、午餐肉(上)三款口味。


每款都有洋蔥和粟米作配料,並配上水牛和車打芝士。

由於加入水牛芝士,拉絲效果非常明顯。



來源: http://hk.apple.nextmedia.com/su ... t/20161110/19828672
PermaLink: https://articles.zkiz.com/?id=314937

大台《宮心計2》10大女角歲數加埋超過450歲

1 : GS(14)@2017-01-19 08:08:03

大台古裝劇《宮心計2深宮計》昨日舉行記者會,呢套劇真係不得了,剩係講cast都夠晒吸引,米雪、謝雪心、康華、陳煒、張慧儀、張文慈、羅霖,全部都係熟女!大台今次仲係同大陸騰訊企鵝影業合作,劉家豪話呢個係「實力非凡」嘅平台,因為點擊率夠高咁話。其實《深》劇都係翻炒以前《宮心計》條水,將劇名啲字換下次序,玩吓同音字咁。雖然係用熟女做主角,不過都有胡定欣、劉心悠、周秀娜呢啲新臉孔俾大家睇吓嘅。無綫助理總經理杜之克話,《深》劇想拍到唐朝嘅氣氛,有綺麗嘅感覺。不過,套劇嘅服飾就有啲出事喇。啲娘娘同宮女全部都「封胸」,馬浚偉件龍袍又奄列加茄汁,果然「綺麗」。「老土嘢」點止咁少!馬國明同黃心穎嘅緋聞o依家傳得咁hit,梗係要擺佢哋上枱啦。馬浚偉話要賜婚俾馬國明,黃心穎就即刻衝出嚟撓實馬明。唔知做馬明妃子嘅周秀娜係咪「呷醋」,影合照嗰陣企到離行離迾。劉家豪回巢大台拍《深》劇,佢話好高興能夠同騰訊企鵝影視合作,又用唔鹹唔淡普通話講「肯定合作愉快」,梅小青聽到都話「嘩!普通話!」全場人拍仲拍晒手o添。劉家豪繼續話,騰訊企鵝影業係一個實力非凡嘅平台,佢哋嘅點擊率唔係億億聲,唔係十億十億聲,係百億百億聲;仲問演員們「所以你哋係咪真係要奮不顧身,不過唔需要粉身碎骨,做到最好?」梅小青仲和應「係,好好好!」真係夫唱婦隨。講到尾,大台都係要同大陸接軌搵出路,話晒上面有成百億點擊喎!香港市場咁細又可足掛齒呢?唔知遲下大台啲劇會唔會好似myTV SUPER播嘅《無間道》咁講普通話,各位觀眾就要醒水為接軌做準備喇!




來源: http://hk.apple.nextmedia.com/entertainment/art/20170119/19902001
PermaLink: https://articles.zkiz.com/?id=323248

【圖解新聞】特朗普政府勁多白人土豪加埋身家$437億

1 : GS(14)@2017-01-21 03:36:36

美國新一屆內閣特別有錢,因為候任總統特朗普本身就是超級富豪外,還有兩位身家超過10億美元(78億港元)的億萬富豪加盟,儼如巨富俱樂部。特朗普的內閣除了夠「土豪」外,還有何特色,與前兩任總統的內閣又有何不同?圖解新聞為你拆解。回顧特朗普人生70年的重要時刻,手機版請看:http://bit.ly/trump-preview




來源: http://hk.apple.nextmedia.com/international/art/20170120/19903416
PermaLink: https://articles.zkiz.com/?id=323383

【國民美食】瑞典臭魚罐頭 記者:坑渠榴槤鹹魚臭腳味加埋一齊

1 : GS(14)@2017-10-15 15:55:39

瑞典臭魚罐頭Surströmming,被譽為世界最臭食物。



盛產於瑞典北部的瑞典臭魚罐頭Surströmming,被譽為世界最臭食物。臭名遠播,可不是自吹自擂的,日本人最近以儀器測量不同臭味食物,以Au為「發酵異味指數」單位量度,瑞典臭魚臭味指數有8070 AU,名列各大臭味食物榜首。不少人也頂不住的臭豆腐,也只是420 AU,臭魚指數足足是臭豆腐的二十倍。



臭魚原名翻譯是鹽醃鯡魚,是瑞典傳統料理,據聞是古代瑞典人以發酵防止食物腐化的方法。現代工場製作臭魚已用機器代勞,方法大致一樣──先將活捉的鯡魚去除頭和內臟,切成魚片後抹上鹽巴,再泡進鹽水醃漬一至兩個月,最後放進罐中發酵成臭魚。其濃烈異味,則是由發酵過程中產生的厭氧細菌「Haloanaerobium」而來。臭到被視為是「生化武器」的臭魚,據聞本地人禁止在室內開罐頭臭魚,如果在酒店開罐,分分鐘要疏散住客;本地人吃臭魚也只會在戶外吃。



瑞典臭魚臭味指數達8070 AU,名列各大臭味食物榜首。

一場來到瑞典,當然要找幾位勇士試試這萬惡劣食。

對於這國民食品,瑞典人有這番見解:「吃臭魚就像喝威士忌,第一次試時味道一定不討好,但當你試了十次以上,便開始品嚐到它的美味。根據傳統,我們會以麵包、脆餅、烚薯、紅洋葱,再加點酸忌廉來配臭魚吃。」一場來到瑞典,當然要試試這萬惡劣食,更要帶回香港跟好同事開心share。想知道臭魚到底有多臭,去片啦!



我吃過臭魚,覺得根本是榴槤、坑渠、臭腳、垃圾味的混合加強版,不得不配服瑞典人的勇氣。

帶回公司開罐,勇者同事以罐頭刀開了小孔,臭味即噴射式傾湧而出,嚇得幾位同事尖叫跑走。

記者:王秋婷攝影:潘志恆、許先煜2017果籽繼續認真知味。識買惜用。行以求知。好事多為。重修舊好。緊貼果籽報道,即like:http://fb.me/AS.AppleDaily




來源: http://hk.apple.nextmedia.com/su ... t/20171009/20176497
PermaLink: https://articles.zkiz.com/?id=342617

Next Page

ZKIZ Archives @ 2019