ZKIZ Archives


「女拳」當道開館教減肥劈脂

2014-04-10  NM
 
 

 

韓國美魔女鄭多燕,教跳舞減肥出曬位,近期獲萬寧邀請拍廣告,又來港開show,「錢」途無限。其「拍檔」、萬寧貓的主人包耀明(Sam),原來也一樣靠「減肥」賺錢。

被貓貓冧到陀陀擰的Sam,其實man爆。他身形健碩,曾當過拳手,只是搵朝唔得晚。三年前他決定自立門戶,在灣仔開設泰拳館Muaythai Station,把泰拳混合健身。其收取的學費,較市場貴一至三成,務求趕絕「打爛仔交」的男客。現時客路,都是以減肥為主的女性,連場內賣的拳套、短褲,都是粉紅色的!月賺四萬多元;為保持乾淨整潔,Sam說:「呢度個廁所好乾淨,我親手洗o架﹗」

記者心目中,泰拳館應充滿陽剛味(亦即臭味),一班拳手咬牙切齒,拳拳到肉。但推門走進Muaythai Station,換來的是高了八度的喘氣聲,還有一片香汗淋漓。一般拳館燈光黑暗,令拳手忘掉日與夜去練習,但這裡燈火通明,一塊塊的落地大鏡子,照著學員身形,似在警告:「你好快啲減肥啦!」

這裡的確是女人天下。老闆Sam雖是空手道黑帶二段,過去亦曾去過泰國學習泰拳,拿過不少獎項,打起上來拳拳到肉;但他的客人,主要都是想減去肥肉的女性,所以他與學員對靶、單對單練習時,都會放下狠勁。雖然用上與以往一樣的招式,卻唸著不同的對白:「夏天就到啦!踢埋呢腳,唔好懶!」女學員聽罷,亦出盡九牛二虎之力,狠狠地將最後一腳踢完。

「呢個動作日日做,拜拜肉好快拜拜﹗」另一位教練龍師兄說。Sam向記者講解:「教男學員,會教佢哋打對方邊啲位會最傷最痛。教女學員,你就話邊啲動作最修身最消脂。其實,大家學嘅動作都係一樣。」

熱身:捉正女客心理

這裡的女客,由OL、金髮少女到師奶都有;上週二放工時間,十五人的班上,又來了六個「新女」。課堂開始時,先由另一位教練龍師兄帶領她們做拉手、壓腿、大字馬拉筋熱身等動作,做足二十分鐘,Sam解釋:「熱身運動做得足,無咁易受傷,減肥先會事半功倍。」學員們聽到「點曬頭」,再按指示各自對沙包練習,有的練踢沙包、有的練出拳,其間教練會逐一上前觀察學員姿勢是否正確,「你仲差幾下呀,唔好偷懶做埋佢!」龍師兄說。在附近上班的OL Charlotte脫下套裝,換上貼身運動衫,她對記者說:「呢度唔單只教泰拳,佢逼我哋做push up,玩咗幾個月,feel到自己啲肉實咗。我都知無可能話瘦就瘦,要持之以恆囉!」Sam指曾有女學員玩足八個月,每星期玩四日,由一百七十磅減至一百三十磅,他乘機叮囑一眾女士們:「唔好以為個個得呀,人哋夠勤力!同埋節制一下自己啲飲食啦。」Sam坦言,打拳這一行龍蛇混雜,他當初希望走中高檔路線,故選址灣仔謝斐道,離政府大樓不遠,亦多辦公室。本來也做男客,怎知在附近下班趕來的女客更多,於是逐漸轉型。他甚至放膽加價;現定價七百八十元四堂,比坊間拳館貴一至三成,就是要隔絕「打仔」,令女士玩得放心。Sam說:「有啲人打拳只想發洩,顯示嚇自己力度。呢度收得貴,佢哋自然唔嚟玩。」他指以往做健身教練的經驗,令他知道OL入場與否,會視「現場環境」為重要因素,反而不介意收費「貴少少」。

上場:溫柔的接觸

拳館每日最旺的時間是放工後,由七時到十時半,分別有三個上堂時間,每堂七十五分鐘。然而,這裡中午十二時便開門,讓不用上班的客人,可彈性上堂,疏導繁忙時間的客人兼吸新客。Sam開業時買了幾部健身器材,如跑步機及TRX(懸吊式阻力訓練),就利用這些空閒時間,開設「一對一」的健身堂,為想減肥的女士作私人訓練,每一小時的堂收費五至七百元。現時愈來愈多人想私人授課,已佔總收入兩成。在保險公司任職的Sarah,就一次過買了五千三百多元的套票,六個月內須上完四十八堂。她平均每個星期都會上三次堂,「坦白講,呢度啲教練冇咁push,唔會成日sell單!就算貴,至少我覺得佢哋好有心機,教到足,每堂最少有三round單對單同教練練習,唔會hea。」能否留住女客,Sam認為保持教練與學生的良好關係最為重要。他會儘量記住每個客人的名字,記者跟他吃飯,Sam選擇在拳館對面的餐廳,並特意選能看到拳館窗口的座位,望著裡面正在學習的客人,Sam隨口也能說出她們的名字。Sam亦會因客人的需要而因材施教:「個客想減磅、想練線條定想打比賽,一定要知,以對症下藥!例如個客想減手臂,會安排佢做多啲出拳動作。」現時,拳館的三位教練,清一色都是男性,但記者觀察,他們說話都很斯文。「對住女學生,上堂要講嚇笑,唔可以咁嚴肅!有時候連拳帶都要幫學生綁,仲要教埋學生放洗衣袋。如果捲埋其他衫一齊洗,會好易爛!」

賽後:不硬銷課程

Sam曾當過兩年拳手,出賽十多場,近一半獲勝。不過,做拳手,幾乎零收入,連開飯都成問題。Sam因為經濟壓力,向現實低頭,「出嚟搵工,買咗本《Face》,一睇,見California請教練喎,咪轉行囉。」幾年的教練生涯,雖然搵到錢,但良心卻「過意不去」,「我哋話就話做健身教練,但由朝到晚都要開會,兩個鐘開一次,講咩嘢?仲有咩講呀,咪叫你跑數囉!」Sam無奈說。當年健身教練的底薪只有六千元,其他收入,要靠推銷客人上私人教練堂,「曾有同事氹客人借財仔,搞到啲客要債務重組,咁又何必呢?我唔會咁做。不過為咗有多啲生意,唯有多啲約客上嚟上堂。上曬啲堂,就可以快啲叫客人renew contract!」

三年前,儲夠錢的Sam 決定開一間自己的拳館,但拳館競爭大,Sam亦笑稱:「依家拳館多過便利店!」當過健身教練的他明白,現代人做運動,個個目標為本,主要想修身、減肥,於是另闢財源客源。他亦沿用舊公司的商業模式,如推出套票等,讓客人提前消費,「無辦法啦,月尾都要交租。」但他強調絕不會硬銷,「我唔想sell一次就無咗個客,而家係自己生意,同客人嘅關係要更加長遠﹗」

出盡「冧女」招,Sam雖屬堂堂大男人,但認為教女客並不困難;另兩位教練亦笑言,比起教拳拳到肉的男客,教女客更為輕鬆,唯獨是「儀容」上,原來有一大要求,「我喺泰國學師時,識咗個師傅,曾邀請佢來港任教,但佢個樣……太惡,嚇怕學生。而且佢老人家要求好高,有時未出拳,淨係望嚇個學生,對方已經嚇到腳軟!」Sam惟有請對方返回泰國。教女客,始終靚仔較有著數!

開業資料(3/10)

租金:$105,000*裝修:$500,000入貨:$50,000雜費:$20,000總投資:$675,000*二按一上

營業資料(3/14)

營業額:$225,000租金:$75,000^人工:$70,000#入貨:$25,000雜費:$10,000盈利:$45,000^ 曾搬拳館# 三位教練人工

PermaLink: https://articles.zkiz.com/?id=95587

Next Page

ZKIZ Archives @ 2019