ZKIZ Archives


茵媺陀第3胎陳豪:會畀老婆副偈唞吓

1 : GS(14)@2015-11-02 00:08:26

【三年抱三】■索爆人妻陳茵媺生完第二胎八個月,昨又宣佈第三度懷孕,三年抱三,生產力相當驚人。



陳豪近日不但開行turbo工作頴銀,原來更開行turbo跟老婆陳茵媺(Aimee)造人。今年2月才為陳豪生下二仔Nathan的Aimee,昨日又宣佈懷孕三個半月,三年抱三,雙陳生產力可謂極度驚人。Aimee昨日谷咪上陣出席活動,腰肢圓潤。至於三度一擊即中的陳豪,昨被讚勁力十足時鬼馬地以「hehe」回應,並笑說:「生完三個之後會畀佢副偈唞唞㗎啦。」


陳浩民早前宣佈太太蔣麗莎第四度懷孕,還以為他五年抱四最勤力,但原來一山還有一山高!34歲陳茵媺跟44歲陳豪結婚才兩年多,已三度懷孕,前年12月產下大仔Aiden陳梓燁的Aimee,今年2月再誕下二仔Nathan陳浩鋒,原以為她月前約滿無綫後全力湊B,但原來她又準備生第三胎,三年抱三,生產力極度驚人。



【追B成功】■陳豪與陳茵媺認兩個未夠數,所以繼續造人,成功製造第三B。資料圖片

【谷出巨咪】■懷孕三個半月的陳茵媺昨谷咪上陣,腰肢顯得十分圓潤。

【友人扶實】■上落樓梯時均由前經理人嘉莉小心扶實。



「三個夠喇,四個太攰」


昨日Aimee穿上低胸晚裝襯五吋高踭鞋出席在九龍環球貿易廣場舉行的ASHOKA鑽飾品牌活動,身上佩戴過億鑽飾,閃爆全場,但最「爆」的,還是她宣佈第三度懷孕消息。Aimee昨上落台時均由前經理人嘉莉小心扶實,記者問她老公可有送她甚麼貴重禮物時,Aimee笑指兩個兒子,並大爆:「嚟緊就會有第三個!呢份係一份最大嘅禮物。有咗喇!三個半月!未知仔定女,仔女冇所謂,最緊要健康。」昨見Aimee腰肢圓潤,她指今次懷孕並非意外,自言跟老公都早已有共識生三個小朋友,並有預感今胎也是囝囝,她說:「因為阿Mo(陳豪)嗰邊都係三兄弟,我自己都有細佬,仔女都冇所謂,都係嗰句,好開心!」記者笑指她三年抱三豈非很辛苦時,Aimee則表現輕鬆說:「屋企已經有兩個小王子,加埋阿Mo有三個小王子,所以知道點照顧,多一個都冇問題。」三度懷孕的Aimee,不但不會推工作安胎,還揚言會繼續出席商場活動賺奶粉錢。Aimee今年8月舉家到蘇梅旅行,至上月到大馬與杜汶澤拍攝電影《開飯喇!》,當時又跑又拍通宵的她還未知道懷孕,直至拍攝完返港後才獲悉。問BB是否在蘇梅製造?Aimee表示未敢肯定,並說:「其實我同阿Mo係plan咗要三個小朋友,三個夠喇,四個太攰,而且我自己想繼續演戲。」



【狂影愛女】■陳茵媺父親昨日在活動上不停為愛女拍照。

【又係大馬】■陳茵媺前年在大馬拍攝劇集《單戀雙城》(左圖)時未知自己懷有第一胎身孕,豈料上月到大馬拍攝電影《開飯喇!》又是懵然不知懷有第三胎,還毫無顧忌喪跑(右圖)。



陳豪:多啲嚟密啲手


密密造密密生的陳豪,昨日透過WhatsApp回應本報說:「I'm rather happy to share this joyful news of ours to the public.(我很開心可以同大家分享喜訊)」記者笑指他「好勁」,陳豪即鬼馬回應「Hehe」,揚言會加倍努力搵奶粉錢。之後他再於電話分享喜悅說:「自己一直希望五年生三個小朋友,而家係快咗啲,比預期嚟早咗,但呢啲係上天賜畀我哋,多啲嚟密啲手囉!」問為何不讓老婆「副偈」唞唞時,他笑說:「趁佢後生快啲收工吖嘛,生完三個之後會畀佢副偈唞唞㗎啦。」今胎是否想生女?陳豪謂:「如果係女就固然好啦,但我同Aimee仔女都冇所謂。」採訪:譚倩宜、魯吉攝影:陳志嵐





來源: http://hk.apple.nextmedia.com/entertainment/art/20151031/19354522
PermaLink: https://articles.zkiz.com/?id=293679

Next Page

ZKIZ Archives @ 2019