ZKIZ Archives


范太不想青政二人做議員:炒熱港獨利梁連任

1 : GS(14)@2016-10-24 03:18:15

■范徐麗泰昨批評青政兩人宣誓態度兒戲。



【本報訊】全國人大常委范徐麗泰再向青年新政梁頌恆、游蕙禎開火,除炮轟兩人兒戲,更直言自己不想梁、游兩人成為立法會議員,她更揚言若再炒熱港獨議題,只會令北京選擇信任的人做下屆特首,而特首梁振英正是北京信任人選,暗示有關爭議變相幫梁連任。前議員湯家驊及時事評論員林和立皆認為,港獨問題激化確會增加梁連任機會。記者:呂浩然范太昨接受商台訪問,再向青年新政梁頌恆、游蕙禎開火,批評兩人用兒戲態度對待莊嚴宣誓,「結果達到乜呢?就是破壞,不斷咁破壞」,指兩人將港人原有東西「一樣一樣咁粉碎」,「香港社會仲有乜剩?」又批評兩人拒絕反省,「以為自己就係啱晒嘅」,直言若青政有一天能執政,「(青政)佢哋就係最封建、最獨權(裁)嘅人」,表明「呢啲咁嘅人,我真係冇辦法,我個人真係好唔想佢成為立法會議員」。


稱中央信得過梁特

范太更揚言港獨議題若越炒越熱,會有利梁振英連任,因中央傾向找信得過的人,而「梁振英特首自從佔中之後,中央就覺得佢係信得過嘅」,她亦失笑稱:「講出嚟都冇人信,冇佔中呢,中央就未必對梁振英咁欣賞,有咗佔中呢就特別欣賞。」對於建制派議員要求立法會主席梁君彥押後青政兩人宣誓的議程,曾任立會主席的范太形容是無辦法中辦法,另一前立法會主席曾鈺成昨日也表明贊成押後兩人宣誓,也避免主席一旦讓兩人宣誓後,「最後法院裁決話佢當日已經失咗資格,就變咗你俾佢宣誓呢件事就越權」。身在台灣的梁頌恆反駁范太指,他還未開始議員工作,「就梗係未(對香港)有好處」,反問「邊個非法唔畀我做嘢呢?」自言青政執政「點都好過而家班港共政權」。對於范太指中央覺得梁振英「信得過」,梁頌恆指這正是香港問題所在,「就係有一班人從來都冇將香港人利益擺喺第一位」。隨香港大律師公會訪京的湯家驊形容,今次與京官見面後令他「有少少心淡」,因今次京官對特首選舉問題「絕口不提」,顯得「非常小心」,故認同港獨問題再炒熱、民主派再擺出「無得傾」、「港獨自決係至高無上」的態度,只會令北京「無可奈何」,梁振英連任機會「牌面好咗」。熟悉中國事務的林和立亦覺得范太的說法「合乎邏輯」,指梁振英以司法覆核處理議員宣誓是利用港獨議題「搞局」,估計若最終青政兩人失去議席,引起其支持者很大反彈,就算兩人參與補選亦未必能全部當選,屆時又再觸發激烈事件,令梁振英有機會「表演」,透過激化矛盾去增加連任機會。




來源: http://hk.apple.nextmedia.com/news/art/20161023/19809666
PermaLink: https://articles.zkiz.com/?id=313216

Next Page

ZKIZ Archives @ 2019