|
||||||
|
冰雖然無色無味又平平無奇，但不論是茶餐廳的凍奶茶或日本餐廳的魚生拼盤，均無冰不行，而香港食用冰粒界的龍頭，是和古典音樂家同名的蕭邦。其現任掌舵人蕭永斌，把父親蕭邦留下的家庭式生雪公司，轉型成以製造食用冰粒及冰雕為主的企業，年營業額過億元，近年更轉戰食品業，賣大閘蟹及韓國食品。 蕭邦雖然已是冰粒及冰雕生意的一哥，但冰始終是季節性行業，蕭永斌嘆道：「賺夏天貼冬天，我冬天真係無做，好得閒。」最慘是車隊員工流失，「運輸業收入計佣，冬天無做自然走晒。」故他經常尋找新發展，試過引入韓國街頭小食燒魷魚，又連續兩年投了維園年宵鋪王來賣小食，近年集中火力賣大閘蟹和韓國食品。 他自認是大閘蟹愛好者，食遍港九之餘，更會到太湖試蟹，「好多人為賺錢，餵蟹食激素，等佢生得快同爆膏，但蟹會無味，佢就教人點醋食，等人唔知蟹唔靚。」唔抵得無良商人能賺得盤滿滿，他決定自己落場賣埋一份，「我蟹唔會爆膏，不過唔使點醋食，食完個口係甘香o架。」 但賣蟹四年未賺過錢，「我第一年就九龍城租個靚鋪，人流係好旺呀，但全部目不斜視咁行過隔籬老字號。」一氣之下，他免費送蟹，「人多到要警察維持秩序，派我幾十萬。但第二年，食過人返買啦，都蝕，但蝕少一半。」去年開始在百佳擺檔，終於平手離場，他希望今年有錢賺，「做百佳唔係人人做到，因為供應商要運蟹到全港九，而冷藏車營運成本好高。」而他要運冰粒到全港九，運蟹只是順便。 蕭邦小資料 掌舵人：蕭永斌（約50歲）已婚育有一子一女 1979年：蕭邦成立蕭邦生雪公司，生產及銷售冰磚 80-90年代：長子蕭永斌入公司，從台灣引入製冰粒機；到哈爾濱學冰雕後兼營冰雕生意 00年：蕭邦過身 04及05年：分別以三十五及四十五萬元投得維園年宵鋪王，並以韓式燒魷魚作賣點 06年：代理萬頃牌大閘蟹 08年：代理韓式拉麵及烏冬等食品 10年：開設食品雜貨店揀手貨；於寶琳百佳經營韓式熟食檔韓賞味 百佳好拍檔 為了更加擅用運輸車隊，蕭永斌還代理了大量韓國蔬菜和冷凍食品回港出售，「日本食品太多人做，韓國相對少，但同韓國人做生意都幾難，佢唔睬你就唔睬你，一都唔客氣。」所以他在韓國成立採購部，聘請當地人，望大家同聲同氣易溝通，自己則一年去五、六次視察業務。 這些韓國貨又是在百佳上架，人人話和大超市合作不易，但他笑說：「其實一都唔難，最緊要有責任感同願意配合人速銷。」換言之，是當百佳打算劈價和對手爭客時，無錢賺都要配合，「好似佢話要速銷大閘蟹，我就推優惠買一隻公送兩隻，大出血呀！」 雖然現時大閘蟹和韓國食品這兩門生意都要蝕本，但蕭永斌認為做生意有挑戰才有動力，「冰係祖業，阿爺戰前大陸已經做冰，父親七九年落香港後繼續做，雖然我係長子一定要繼承，但如果只係做同一樣，我真係無興趣。」 引入冰粒機 蕭永斌經常說蕭邦是一盤「小生意」，但入其倉庫，只見逾千包冰堆得像山一樣高，他笑說：「以前茶餐廳多數用大冰磚，再鑿碎沖凍飲，我本來都係賣冰磚，八十年代我先台灣引入製冰粒機，冰粒勝在方便生，雖然最初因為貴十倍無人買，但我俾餐廳免費試用，用過之後就番唔到轉頭，其實唔使請人鑿冰，條數差唔多。」最初每天製五噸冰粒，現在升至五百噸，「個系統要投資過百萬，但由水變成冰粒兼包裝，只須五至八分鐘。」 儘管他不願透露任何營運數據，惟業內人士指蕭邦掌控冰粒市場半壁江山：「以食用冰來講，佢係獨大，競爭對手好似德保咁越來越細。佢每年營業額肯定以億元計，毛利應該有三成。」 向蕭邦取冰的皇上皇集團主席謝炳順說：「佢價錢可能同其他人差唔多，但勝在車隊強，永無甩底。」事實上，蕭永斌相當落本培養車隊，有六十部冷藏車，廿四小時供應冰粒給港九食肆。一個跟車員工的月薪也有一萬八千元，有員工說：「老細對伙記好好，有人搬貨受傷，佢第一時間自己開車送佢入醫院；出街食飯撞到老細，佢一定會幫你埋單。」 哈爾濱學冰雕 除了冰粒外，蕭邦亦為婚宴、酒店提供冰雕，更曾經供應了一座冰磚給葉玉卿作為拍裸照的道具，及幫福特汽車雕了一輛冰車。這些冰雕不少出自蕭永斌之手，他表示最快二十分鐘可完成一座半人高的冰雕，訪問當日，他即席示範，用電鋸把冰磚鋸出一隻天鵝雛形之後，再用冰刀修飾，半小時內雕好一隻昂首天鵝，他謙稱：「好耐無做了，好粗糙。」 他的冰雕技術學自哈爾濱，「辛苦到唔想再提，真係好凍，南方人好難適應當地天氣，而且雕冰好費力氣。」孤身學藝，幾度想放棄，「實會諗，呢係人之常情。」撐下去全為一口氣，「當時應該係九十年代初，大師父雕一座冰雕要收五百蚊加工費，而我賣俾佢舊冰磚只係五十蚊！佢咁好賺，不如等我。」捱了一個冬天後，學成回港，有人笑他不夠精美，他認：「人係藝術品，我係商品，但每件賣一百三十蚊！」生意源源不絕，平均一天要雕十五座，聖誕節時更達三十座。現在他已甚少出手，全交給徒弟，有員工結婚，才會親自雕一對天鵝作賀禮。 由低做起親力親為 蕭永斌不單止會雕冰雕，就連運冰時，他也落手落腳和員工一齊搬，「我自己唔識點教人呀？」他十多歲便入公司幫忙，「我內地出世，來到香港讀中學，但逢假期就入公司幫手，中五畢業後全職入去做。」 父親要他由低做起，每日擔擔抬抬，送貨兼見識世面，「試過同爸爸一齊運冰磚去漁檔，個漁檔老細坐埋一邊玩十三張，我睇住佢個伙記秤條斤幾重『魚倉』魚俾人，收個客一百蚊但找九百蚊。」從此他知道做老細要親力親為。 居於大埔淺月灣的他，每天早上六時到達油塘辦公室，「我第一個返公司開門。」從不放假，他笑指是遺傳，「我父親七十歲都仲返公司，直至十年前過身。」享年七十三歲。他甚少陪家人，「仔女一個美國，一個讀港大，唔使我陪。至於老婆，如果我成日陪佢，搞到生意失敗，只會牛衣對泣，倒不如生意興隆，各有各玩。」 |
||||||