ZKIZ Archives


【馮仁昭四圍超】張繼聰打喪屍各司其職吳家麗萬梓良談情

1 : GS(14)@2017-06-22 07:42:37

萬梓良(萬子)同吳家麗日前喺觀塘宣傳新片《今晚打喪屍》,吳家麗直認全因萬子先會接拍呢部電影,另一個原因就係因為自己係喪屍片迷。不過佢同萬子主要係講上一代嘅感情戲,追跑打喪屍就留畀一班後生演員張繼聰、白只、王敏奕、顏卓靈等負責。吳家麗笑話身邊朋友都問可唔可以客串演喪屍,因為香港太耐冇呢類題材。戲中萬梓良和吳家麗都各自有抒發情感嘅戲份,吳家麗有場戲要感懷身世不停喊,當導演嗌cut後,佢依然失控繼續喊,當時萬子在場,即刻上前搭住佢膊頭安慰,吳家麗話:「當刻好投入角色,個情感一路抒發出嚟,點知導演嗌停,我啲情緒都未抒發完,所以要時間再爆發吓。」下個月就踏入60歲嘅萬子,近年受糖尿病困擾,佢話兩年前開始用咗九個月時間同意志,堅持自己早午晚親自煎中藥,第二年身體有明顯好轉,能夠完成拍攝工作,佢話自己都開心。



■《今晚打喪屍》已接獲歐美三個影展嘅邀請,認真巴閉。

■張繼聰喺片中追打喪屍,少啲精力都唔掂。

■吳家麗坦言因為自己係喪屍片迷,加上因為萬子先接拍《今》片。

參加三影展

電影於去年7月開拍,正值盛夏,萬子笑話最辛苦其實係特技化妝:「當時天氣好熱,所以成日要用風筒吹住啲汗,唔係會影響個妝,我個妝要化個半鐘。」另外,《今晚打喪屍》已接獲歐美三個影展邀請,包括紐約亞洲電影節閉幕日電影、西班牙錫切斯奇幻電影節、瑞士納沙泰爾國際奇幻影展,而吳家麗已落實會同導演盧煒麟一齊飛紐約同各地電影人交流。撰文:馮仁昭場地提供:TOWARD Studio




來源: http://hk.apple.nextmedia.com/entertainment/art/20170621/20062768
PermaLink: https://articles.zkiz.com/?id=336232

Next Page

ZKIZ Archives @ 2019