ZKIZ Archives


共過患難陳宛蔚打動錢國偉之路

1 : GS(14)@2016-10-27 06:02:39

俗語有云「一物治一物」,放喺錢國偉同老婆陳宛蔚身上就最適合不過。參加2007年港姐嘅陳宛蔚,只能入到24強,即係根本連上台嘅機會都冇,但就被無綫睇中咗,召去擔任錢國偉揸旗嘅綜藝節目《味分高下》其中一位「味之天使」雜果賓治。自此,令陳宛蔚同錢國偉結下緣份……錢國偉話晒係金牌監製,做親啲節目同電影又收得,佢本身又喜愛夜蒲,自然多女埋身。不過自從陳宛蔚埋身之後,錢國偉都開始收心養性。話說2012年錢國偉開拍電影《喜愛夜蒲2》,更屬意樣子甜美又好身材嘅苟芸慧擔正,點知有傳陳宛蔚疑不滿苟姑娘成日黐住錢國偉,陳宛蔚向男友大發雷霆,更有人見到佢哋兩個喺餐廳為此吵大鑊,錢國偉為安撫女友、平息其怒火,所以就算套戲已經開拍咗,但錢國偉都仍然嗌易角,換上連詩雅。唯當時錢國偉同陳宛蔚都否認「拖友」關係,但有傳陳宛蔚開始做「跟得女友」,出出入入都跟到實。另一次係大台節目《五覺大戰》特別篇,錢國偉拉大隊去新加坡拍外景,點知錢國偉被拍到獲36E身材嘅白雲餵食雪糕,令陳宛蔚醋意大爆發,不單止將男友錢國偉同牽涉其中嘅白雲鬧爆,更連幫拖解釋嘅白雲男友都被爆埋一份。明明錢國偉有咁多「選擇」,點解要忍讓陳宛蔚呢個特級野蠻女友呢?好簡單,因為佢哋共過患難。回少少帶,錢國偉喺2010中捲入陳志雲涉貪案(新聞連結: http://bit.ly/2dSqCkV),當年錢國偉辭職兼落難,但陳宛蔚對佢不離不棄,錢國偉一直記喺心,所以就算陳宛蔚點野蠻都好,佢都好忍讓。




來源: http://hk.apple.nextmedia.com/entertainment/art/20161027/19813397
PermaLink: https://articles.zkiz.com/?id=313682

Next Page

ZKIZ Archives @ 2019