ZKIZ Archives


塑身天后專訪鄭多燕:我一日食六餐

2014-01-09  NM

韓國塑身天后鄭多燕訪港,將健康舞FigureRobics熱潮升溫,連賀歲片都要搵盧海鵬跳埋一份。紅遍亞洲的鄭多燕,逗留五天但全程工作,冇疲態亦冇黑面,表現相當親民,同其他韓星相比,零架子又專業。粉絲影相簽名有求必應,表情多多,完全唔似47歲兼育有一仔一女的媽媽,跳起舞上來仲相當有活力。見到佢身形,再望望自己,後生接近廿年的我,真係自愧不如。以為要狂節食狂做運動至keep得到?鄭多燕說:「我一日食足六餐!」比健康舞更值得參考喎!

壹:如何保持身形咁fit?

鄭:我一日食六餐,但每餐分量要少,唔俾自己有肚餓感覺。平時我六點起身,先食乳酪、麥皮,之後為家人準備早餐、做家務,返工前已經要食第二次早餐,通常是煎魚及細細碗白飯。中午食一餐,晚上六點收工前再食少少,回家後會吃兩次晚餐。另外就要不停運動,我在公司會跳舞,回家後又要打理四隻狗及打掃家居,冇得休息同追劇,但就因為不停郁動,令身體不會積聚脂肪。

壹:減肥最痛苦是哪階段?

鄭:戒口一定最辛苦,家人可以自由食,自己卻得個睇字,好慘!減肥前最鍾意食芝士蛋糕,而家每星期只有一日可以放縱自己,有時都會偷食。以前飲食習慣好唔健康,愛食香口食物,仲試過煮牛油紫菜湯飯,好油膩。而家知道要注重健康,習慣多食蔬菜生果,屋企儲埋好多健康料理的食譜。來到香港,最想食菜心及無花果,最好可以買返韓國!

壹:滿意自己身形嗎?鄭:相當滿意!雖然我唔高,但全身都好平均,三圍維持34、24、35左右,體重大約49至51公斤,食飽後就會肥啲囉!我覺得自己好健康,而且充滿力量。唔擔心有一日體重反彈,因為我會不斷提醒自己,要專心做運動,絕對唔可以放棄。壹:如何設計FigureRobics的動作?鄭:舞步設計最緊要簡單,讓人容易上手,男女老幼都可以跟住一齊跳。通常我都會自己嘗試郁動,感覺一下動作可以操練哪一部分肌肉。當初設計時,經常會出錯,例如設計出唔適合女性做或對身形線條冇幫助的操肌動作。每一節舞步都是由基本開始,之後才逐步加強,做運動最緊要唔可以勉強自己,亦唔好太急進。

壹:有不少新冒起的競爭對手,怕不怕被取代?鄭:我做運動唔為宣揚自己,所以冇所謂。其實每日都有新面孔加入,我覺得只要順其自然,做好自己便OK。2014年,我設計了一套新舞步,主要針對成日坐的OL,可以減腰,而且令屁股更高更挺,下身線條更靚,希望吸引更多人一齊跳FigureRobics。韓國唔興爆肌男,要有肌肉得來slim先好睇,所以近來多咗男士學習。壹:有冇興趣加入娛樂圈?鄭:在香港有咁多人認得我,覺得相當榮幸,但我應該唔會入娛樂圈了。我冇演藝界才能,唱唔到高音,亦未參與過任何綜藝節目,只曾經在電視劇中客串扮演健身教練。今次來港拍了萬寧廣告,經驗相當有趣,印象深刻。萬寧貓手短腳短,做唔到我的動作,出來的效果好趣怪,不過都相當好玩。

親自示範新動作操籮四式

鄭多燕親身示範2014年新動作,這套動作主要可以鍛鍊下身,令臀部看起來更高翹,OL們要做啦!
 
PermaLink: https://articles.zkiz.com/?id=87849

【一晚萬二蚊】昆凌坐月地點曝光 一日食六餐

1 : GS(14)@2015-07-20 08:36:47

台灣《蘋果》接獲讀者獨家爆料,本月10日剖腹生女嘅周杰倫太太昆凌現身在台北璽悅金山產後護理之家調理中,估計佢應該係住貴賓房,每晚費用需一萬二千元新台幣。該月子中心門禁森嚴,進出大門需有專人指引,入住嘅家屬會有特製手帶,車輛出入需要scan條手帶,並且有指定車位,電梯都係需要用手帶scan過先可以去到指定樓層。餐單方面呢,據了解昆凌喺月子中心一天食六餐。六餐裡面包括三次主餐、三次點心,菜式有牛肉炒時蔬、紅棗魚片、麻油雞等,仲有五穀糙米飯。餐後有白木耳蓮子湯等甜品。咁當然如果周生周太唔滿意個menu,可以自己準備啦。





來源: http://hk.apple.nextmedia.com/entertainment/art/20150719/19224422
PermaLink: https://articles.zkiz.com/?id=291415

Next Page

ZKIZ Archives @ 2019