ZKIZ Archives


全齋婚宴 左丁山

2011-10-23  AD

永豐金融集團研究部主管涂國彬有富貴白頭之喜,十月十五日在山光道馬會青雲閣擺咗十八圍,招待親友,肥仔涂乃 近年冒起來之財經股壇評論員,在所有電台電視,好多報紙都會見到佢講股。肥仔涂勝在口齒伶俐,出口成章,絕不咬螺絲,左丁山識佢之時,佢話係中大新亞書院 經濟系 2000年產品,故此略識之無咁話,幾謙噃,但十年之間就能成名,成為股壇名嘴之一,唔係咁易嘅,除咗勤力之外,仲要有啲天份。
呢晚佢迎 娶林家小姐明賢( Anita),出席婚宴嘅有 Quince及成班國泰公關部要員,先知道新娘子喺幾個月前轉咗工,由總商會轉咗去國泰公關部, Q姐仲話:「我啱啱簽咗佢過試用期!」新郎新娘如何認識呢?呢晚嘅司儀竟然係林超榮,嘩,唔通重金禮聘?肥仔涂( Mark To)在股場搵錢容易呀?結婚相片與 video去倫敦海德公園及市中心拍攝,已所費不菲啦!唔係,林超榮爆內幕:「阿 Mark在中大讀書時,竟然走嚟黎文卓與我合辦嘅編劇訓練班學編劇,係我地學生。今日先知道, Mark仔早有先見之明,知道畢業後要做財經演員,所以跟足我地學編劇,學寫古仔,作嘢先!今日大家見到佢對住鏡頭咁純熟,我地有啲功勞㗎!新娘本是信報 記者, Mark仔當時在信報做編輯,你地知啦,記者交稿,編輯話要改改改,改到好夜先至收工,跟住去宵夜。男編輯追女記者,好易嘅咋!」

 

林超榮最叻搞氣氛,講笑話,有佢做司儀,婚宴變成大 party,不少人俾佢捉上台爆肚講幾句,陸叔上台話:「涂仔當年做記者,追住我扑咪,扑親我個嘴!」 Q姐上台話:「 Anita好細心㗎,今日做新娘,驚我地唔識嚟馬會,居然仲留低手機號碼俾我地搵佢, Mark哥你有福咯!」新夫人咁細心,唔怪得涂仔平時猛咁打電話報告行蹤,滴酒不飲,跟新娘入咗天主教,又跟太太食齋。是晚婚宴菜式別具一格,乃是全齋 宴,據講呢個要求令馬會大廚辛苦咗好耐,度咗三個月先至可以拍板,席珍有上海素鵝、酥炸荔茸蘋果盤、金杯如意翡翠花、椰皇燉蟲草花、蛋白炒翅……。全部婚 宴賓客一齊食齋,左丁山都係第一次!

PermaLink: https://articles.zkiz.com/?id=28840

Next Page

ZKIZ Archives @ 2019