傳戀已婚超級富二代助脫貧周秀娜：抗拒已婚人士
1 :
GS(14)@2016-03-05 01:24:41■周秀娜以D奶和長腿成為宅男女神，近日傳她被超級富二代私有化，昨日受訪時直認有人追。資料圖片
30歲宅男女神周秀娜，當年憑樣靚身材正，有胸又有腦火速彈出。娜姐近年事業得意，愛情原來都有着落，近日爆出她秘交已婚超級富二代，去年買豪宅送家人，又掟銀彈搞生意，果然成功脫貧。娜姐昨日直認有人追，不計較對方家底背景，但她強調抗拒已婚追求者，做朋友就可以。
宅男女神周秀娜自三年前回復單身，接受訪問時都自嘲dry爆恨拍拖，希望工作辛勞時有男方借出膊頭，近日就爆出娜姐暗交新歡，對方是已婚超級富二代，兩人在私人聚會認識，秘交一年，為了保護這段戀情，他們多於北京私竇密會。而昨日有雜誌指這位超級富二代錫到娜姐燶，更提到過去一年工作量不多，今年初只有網劇《美女公寓》，及與鄭伊健合演的電影《iGirl夢情人》等，但娜姐獲超級富二代教路，傳授投資心得令她吸金有法，去年豪掟千萬給家人置業中半山翠麗軒豪宅，自己也低調搬入豪宅，另外她又花八位數字搞內衣店，預告三年後把生意上巿，由僆模忽然變生意人。
■近日出遊澳洲，娜姐大讚當地環境好，有意在當地置業。互聯網圖片
■周秀娜與家人感情好，跟幼弟更不時相約外出，買樓也以父母為先。攝影：畢紹基
「唔會公開男友」
記者昨日聯絡娜姐，求證她是否覓得筍盤新歡，她透過WhatsApp直認有人追：「而家有人追。」是傳聞中的超級富二代？她續說：「係咪富二代，唔知呀，唔會一嚟就咁問人哋，同埋都唔會理啦，朋友啱咪一齊囉，唔知呀，如果將來有男友嘅話，未必會公開，因為我覺得要睇吓另外一半想唔想嘅，要尊重嘅。」有傳新歡是有婦之夫，娜姐說：「不過已婚人士我就抗拒啦，做朋友就OK。」娜姐坦承有裙下之臣，但她卻否認拍拖：「而家仲係單身呀，唔……結識朋友，或將來有男朋友，唔會睇人背景，一嚟唔會係呢樣嘢做標準先。」問到忽然暴發，娜姐輕鬆解畫財來有方心得：「自己都有啲其他投資嘅，不過呢方面我唔算係好清晰，爹哋有幫我睇，我有搵一個投資經理，可能有啲乜嘢啱嘅，佢都會掟畀我睇，暫時都係幫屋企人置業先，自己就未睇得啱。」近年受訪，娜姐都強調正物色安樂窩，她昨再說：「或者再睇吓啦，要睇啱個價，再低啲時買。」
■娜姐（中）去年豪擲八位數字開店賣bra，自己更做生招牌。
■娜姐近年工作不多，但與鄭伊健則合作無間，再次合演的《iGirl夢情人》將上映。
心儀澳洲置業
娜姐近日出埠到澳洲後，對當地環境讚不絕口，她不排除在外地置業：「我成日周圍去，都有諗過喺其他地方置業，都唔錯吖，好似之前去澳洲，嗰度又唔錯，又幾舒服喎，得閒都會留意其他地方嘅物業，可能因為周圍去，都會留意吓其他國家。」採訪：李真珍
來源:
http://hk.apple.nextmedia.com/entertainment/art/20160304/19515202