星二代集中地關禮傑囡超甜 林俊賢囡超索
1 :
GS(14)@2016-09-02 05:49:43前晚中環Dior唇膏活動真係星光閃閃，星二代雲雲，包括應該係最索嘅關禮傑女兒關楓馨，仲有林俊賢女林鈺洧、鄭丹瑞女兒鄭瑤、湯鎮業女兒湯愛嘉，以及何超鳳女兒何鍶珩等等等等。五位美女跟番大會dresscode，以黑、紅或白色現身，一身成熟打扮，林鈺洧更加係高人一等，鄭瑤同關楓馨就嬌小可人，何鍶珩就高貴成熟，湯愛嘉輪廓似足英俊老竇，各有各靚。關楓馨啱啱喺英國大學畢業，之後計劃去澳洲working holiday一年，呢排都會出吓活動接job：「電視、電影同做模特兒都可以試下，不過唔會叫爹哋搭路，要靠自己，爹哋媽咪都好支持我。」至於會否接受拍親熱戲？關楓馨就話：「未諗到咁遠，如果有親熱錫嘴，都會問爹哋媽咪，始終係屋企人，男友都要問，佢都好支持我喺呢行發展，佢唔會呷醋，佢明白係工作。」林俊賢個女林鈺洧就透露會專注模特兒發展，都會考慮拍戲：「要學好做戲，不過未搵到老師，唔會搵爹哋，佢忙緊喺大陸做生意，亦都唔會特別搵佢介紹工作畀我。0依家工作量都OK，會想喺香港做模特兒工作，等香港成功先出去發展，自己最鍾意係Victoria's Secret天使模特兒Candice，自己就冇咁嘅身材做到，因為鍾意食嘢，惟有每個禮拜做多啲運動keep住身材。」
來源:
http://hk.apple.nextmedia.com/entertainment/art/20160902/19757102