|
||||||
|
「最靚仔 CEO」卸任了！瑞安房地產（272）噚日喺公佈業績日突然宣佈，羅康瑞由即日起唔再兼任行政總裁，淨係做集團主席，而執行董事兼董事總經理李進港將會接 佢棒做CEO。董事會話，o依家係適當時機將主席同CEO嘅職責明確區分，令董事會經營管理同業務日常管理上，確保權力同授權分佈均衡云云。 搵李進港接棒 照 字面解讀，似乎係羅康瑞部署退休wor！但當事人話，件事並唔係咁嘅，仲話「我退休唔得o架！」佢話，查實o依家內地好多樓市調控措施，令到佢好鬼多嘢 做，再講，佢係個唔可以退休嗰種人嚟o架，連放假都唔係好得。「我返工好似放假咁，所以，我冇放假囉！」而根據呢個最新分工架構，羅生今後只會專注於領導 董事會制訂戰略方案，而阿進港就會負責日常管理同營運！ 其實羅生話唔做CEO，華華又唔係好意外，事關舊年年頭佢接受黨報訪問嗰陣，已講明搵緊CEO接班人，仲希望1年內成事，咁點解會揀到49歲嘅進港呢？佢話問過公司好多經理級同事，九成以上都係揀進港，所以，佢咪就揀進港囉！ 點都好啦，華華相信至Happy嘅應該係羅生個「最美麗港姐」老婆朱玲玲，因為就算唔退休唔放假，今後羅生點都有多啲時間陪佢啩！ 李華華 |
||||||