操盤手札記：信股神吼比亞迪
1 :
GS(14)@2017-06-10 13:07:54好佬怕爛佬，爛佬怕潑婦，上市公司就怕沽空機構！舊年12月中至今，6個月內已有7隻港股被狙擊，包括輝山（6863）、全通（633）、宏橋（1378）、豐盛（607）、瑞聲（2018）、科通（400），以及最新中伏嘅敏華（1999）。沽空機構專揀市值過百億嘅民企落手，一來民企財務報表易有破綻；二來以市值計，一日跌幾成，賬面就縮水幾十億，可以短時間賺大錢！喺超級星期四前夕，港股高位整固，跌22點，收25974，二萬六關再次得而復失。港股市底仍強，後市若能企穩二萬六關，有望挑戰技術阻力位26155；短線支持位仍睇10天線，守穩則升勢仍在。超級星期四有英國大選、歐洲央行議息、美國FBI前局長國會作證，小心！今年以嚟，環球資金集中追捧科技股。美股方面，反映科技股走勢嘅納指累升16.57%，遠遠跑贏標指嘅8.51%及道指嘅6.95%升幅。至於港股，恒生資訊科技業指數更累升36.08%，大幅拋離恒指嘅18.06%升幅，當中騰訊（700）升幅高達44.27%！跟開科技股嘅，不難發現一個有趣現象，就係近年科技股愛上汽車！除咗Google、百度先後開發無人駕駛汽車，阿里巴巴亦夥拍吉利（175）搞汽車產業智能化；騰訊則入股電動車製造商NextEV、Future Mobility及Tesla。BAT全愛汽車！汽車股本來係強勢股，但近日受吉利、長汽（2333）5月銷量放緩拖累而掉頭，其實汽車股舊年銷量激增，喺提前消耗購買力之下，今年銷量放緩係意料中事。中國建投早前發佈報告指，儘管今年新能源汽車補貼比例下降，但長期嚟睇，汽車新能源化係大勢所趨。新能源汽車龍頭係比亞迪（1211），麥格理預期該公司新能源汽車銷售比重將由舊年嘅22%提升至2019年嘅51%。比亞迪係股神畢菲特現時手上唯一嘅中資股，信股神眼光，不妨留意吓。該股現價46.85元，走勢上，呈現區域突破及三角突破。割柑人本欄逢周四刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170608/20048018