ZKIZ Archives


操盤手札記:無息收就勢係假

1 : GS(14)@2018-01-08 00:50:35

呢期最hit,非Bitcoin莫屬!Bitcoin價格喺11月29日突破10,000美元,12月17日突破20,000美元,今年以嚟升幅近20倍!Bitcoin狂升,惹嚟丹麥央行行長Lars Rohde力斥係致命嘅賭博,但南非央行前官員Eugene Etsebeth則力撐有條件成為數碼黃金!
Cryptocurrency(加密貨幣)一副挑戰Fiat currency(法定貨幣)嘅架勢,央行界當然關注,投資界亦議論紛紛,David Webb就形容係龐氏騙局!客觀嚟睇,Fiat currency嘅面值有政府擔保,亦有利息;Cryptocurrency則靠嚴控供應嚟支撐面值,無擔保,亦無處理利率問題。Crypto係擺脫政府嘅交易媒介,呢個既係賣點亦係弱點。咩合理價、目標價,難以用基本因素同技術分析,齋講供求。一枚Bitcoin買到4手匯豐控股(005)有凸,我寧願買匯控,話晒有5厘息。升幅係差好多,但穩陣好多!美國稅改行將落實,經濟增長料將加速,副產品係通脹。聯儲局開晒口,明年再加息3次。不過,美國加息唔係純粹經濟原因,喺政治上係打金融消耗戰!加息引導全球資金流向自己,其他國家為咗留住資金,被逼跟隨加息,玩唔起就會被玩死。美國上周加息後,中國隨即出手,明顯係擔心走資。美國今個加息周期由2015年12月起步,累計加息5次,合共1.25厘。雖然香港銀行體系資金充裕,未有跟隨,但港元同美元掛鈎,息率偏低會引發套息活動,估計拖到明年中就要跟隨,否則港元會捱沽,流向美元同人民幣。喺加息周期,要特別留意上市公司嘅現金流,宜揀淨現金公司或派高息公司,避開孭重債公司。各行各業中,有加息話事權嘅銀行業可以睇高一線,具美國業務嘅匯控更加秤先啲。匯控7月至今喺70元至80元區間上落接近半年,橫行走勢屬於靜極思動現象,橫行時間越長,後向動力越大,值得期待。割柑人本欄逢周四刊出



來源: https://hk.finance.appledaily.co ... e/20171221/20251429
PermaLink: https://articles.zkiz.com/?id=346381

Next Page

ZKIZ Archives @ 2019