ZKIZ Archives


梁佩瑚爆港姐黑幕陳法蓉違規講大話

1 : GS(14)@2016-09-09 05:36:48

■梁佩瑚擔任有線節目嘉賓,大爆黑幕。



有線節目《娛樂熱辣辣》的「絕密真相」邀請89年港姐季軍梁佩瑚擔任嘉賓,大爆當年選美黑幕,自揭與她同屆冠軍陳法蓉違例拍攝周刊封面,事後還當眾落淚扮委屈!梁佩瑚不諱言當年選美規矩嚴厲,不准佳麗私下接受傳媒訪問,她說:「當時有周刊搵我影封面唔敢應承,對方仲游說我話陳法蓉都拍咗,我話冇可能,點知後來真係見到佢做封面。」梁佩瑚記得當時保母拿着周刊大興問罪之師,陳法蓉自辯說是參選前為模特兒公司拍的舊相,還激動落淚表現委屈。梁佩瑚笑說:「點知畀我哋發現佢崩左嘅手指甲,同佢所謂舊相上嘅指甲一樣咁崩囉,估唔到可以咁複雜!」



■梁佩瑚(左三)揭陳法蓉(右二)參選違規接受周刊訪問。資料圖片

■(左起)楊玉梅與施綺蓮及吳綺莉同屆,她稱當年選美大開眼界。資料圖片


匿廁所打給男友

重提當年舊事,問梁佩瑚可擔心陳法蓉會嬲?她昨日透過短訊說:「只係講曾經感受過嘅故事,唔係乜嘢黑幕。同佢冇心病,而家又唔係細路咯,就快50歲,怕乜佢嬲呀,唔會啦!」節目中,梁佩瑚透露當年保母手上有一本操行簿,記錄佳麗操行供評判查閱,她爆自己經常匿廁所和男友講電話,所以操行麻麻,她解釋:「我唔係壞分子,係百厭箒,所以我成日講笑,如果有黑幕我就攞第一嘞。」對法蓉違規仍得冠軍,可有不甘心?梁佩瑚說:「冇㗎,我都冇諗過攞獎,大家睇番當年啲帶,我300度近視都冇戴隱形眼鏡,上台走錯晒位,攞第三都好開心。」記者曾致電陳法蓉,但未獲回覆。


亞姐倒痕粉打交

此外,亞姐方面原來也有操行簿,而操行最差的是90年楊玉梅那一屆!身在內地的楊玉梅接受電話訪問時透露:「同我同屆參選嘅有吳綺莉、施綺蓮、陳寶蓮等,我哋嗰屆好精采㗎!有佳麗用鉸剪剪爛其他佳麗嘅衫,等佢出唔到場,又有人倒痕粉落人哋件衫度,等佢當眾出醜,仲有人打交,真係大開眼界!」採訪:嵐山




來源: http://hk.apple.nextmedia.com/entertainment/art/20160909/19764818
PermaLink: https://articles.zkiz.com/?id=308345

陳法蓉反擊梁佩瑚搞事

1 : GS(14)@2016-09-14 05:52:13

資料圖片



89年港姐季軍梁佩瑚日前接受有線訪問爆選美黑幕,指當年同屆冠軍陳法蓉違例為周刊影封面,事後又扮委屈解釋是舊相,她在節目說:「點知畀我哋發現佢崩咗嘅手指甲,同佢所謂舊相上嘅指甲一樣咁崩囉!」陳法蓉昨在微博反擊:「吃不到的葡萄是酸的。天下本無事,奈何多庸人自擾。唉……」而梁佩瑚則以短訊回覆本報:「冇回應!中秋節快樂!」採訪:皓騫




來源: http://hk.apple.nextmedia.com/entertainment/art/20160914/19769895
PermaLink: https://articles.zkiz.com/?id=309053

港姐黑幕事件護陳法蓉蔡少芬駁梁佩瑚 不知所謂

1 : GS(14)@2016-09-17 17:33:01

■蔡少芬(右)為老友陳法蓉(左)護航,直言要「錫番同支持佢」。資料圖片



梁佩瑚早前在有線節目爆當年選港姐黑幕,暗指同屆陳法蓉(Monica)疑違規為雜誌影相又扮委屈。事後陳法蓉在微博神回﹕「吃不到的葡萄是酸的。天下本無事,奈何多庸人自擾。唉……」好姊妹蔡少芬(Ada)和洪欣聯手抗梁,Ada在微博寫道:「四個字──不知所謂!」



■梁佩瑚早前指陳法蓉當年選美時違規為雜誌影相。資料圖片

■明日是蔡少芬的43歲生日,古仔(右)和張智霖為她預祝。

■DaDa前晚輕露性感,以黑色露肩長裙現身首映禮。


再講冇意思

前晚Ada與古天樂、張智霖、陳靜(DaDa)、盧海鵬、蔡潔等在旺角出席電影《S風暴》首映,Ada否認生氣,她說:「唔係好嬲,嗰日我喺北京宣傳,瞓醒一開微博見到阿Mon咁講,覺得好不知所謂,唔使理,知足常樂。」Ada表示有見過梁佩瑚,但不認識,強調是對事不對人,她說:「我嘅心態係開心就得,成件事好無奈,已經係20幾年前嘅嘢,都好奇怪,講出嚟冇意思,最緊要唔好傷害人,我都係想錫番阿Mon同支持佢。」問會否了解真相?Ada坦言:「唔會特別問。」


收壽包慶生

Ada明天43歲牛一,前晚大會送壽包預祝,Ada透露正日會與家人慶祝,她說:「老公唔係浪漫嘅人,但今年生日想要一樣嘢,要訂嘅,唔知得唔得到。」是否想生多個BB?她笑說:「唔會搵自己嚟辛苦。」
DaDa自從奪得金像獎最佳女配角後,成為電影界搶手貨,最近自己有份參演的新戲《S風暴》和《此情此刻》同期上映,前晚她收起性感,穿上露肩黑色長裙現身。而在戲中與盧海鵬有不少對手戲的蔡潔則獲男友王宗堯到場支持,兩人十指緊扣任影,大晒甜蜜。古天樂早前與古巨基合唱《當年情》,古仔直言好感激張國榮當年一手提攜兩人,特別唱此曲悼念對方。問有沒有機會現場演繹?他認真地說:「唔好搞呢啲,錄歌已經好破天荒。」在旁的張智霖則抵死搭訕道:「我都好想同古仔合作,下次演唱會搵佢做嘉賓。」採訪:張俊銘攝影:沈健程




來源: http://hk.apple.nextmedia.com/entertainment/art/20160916/19771923
PermaLink: https://articles.zkiz.com/?id=309380

選美恩怨告一段落陳法蓉話梁佩瑚道歉

1 : GS(14)@2016-09-30 08:09:04

■陳法蓉早前在西藏拍劇時患上高山症,有死過翻生感覺。



陳法蓉、李姿敏、呂良偉夫婦及多位應屆港姐、港男,前晚在尖沙嘴出席微笑行動慈善籌款活動開幕禮。陳法蓉接受訪問時表示,早前在西藏開工時遇上高山症,情況危急至停工,目前仍未康復,她說:「再去西藏拍劇時心理壓力好大,真係好驚死咗喺上面。劇組安排咗隨團醫生,又專登為我跳拍同刪減戲份。」



■陳法蓉前晚解釋朱潔儀和梁佩瑚的選美「指控」。資料圖片

■李姿敏三心兩意,想在澳洲,又想在峇里舉行沙灘婚宴。

■李姿敏與準夫婿賀賢年齡相差24載,現仍未決定大婚日子。資料圖片


寸朱潔儀冇根據

被問到早前遭同屆港姐季軍梁佩瑚開名指選美時違規,私下影雜誌封面時,陳法蓉說:「新聞報道時我喺西藏已經病發,廿幾年前嘅嘢,我唔敢講每樣嘢我都記得好清楚,但兩個星期前梁佩瑚就透過一位我好尊重嘅前輩轉發訊息畀我,話其實內容裏面都係人哋講佢知,帶畀我好多麻煩,要同我講聲對唔住,仲話個訊息係可以公開嘅。我的確同梁佩瑚係冇來往,佢亦冇我電話,要透過人哋先搵到我聯絡,覺得佢都有誠意道歉,件事已經告一段落。」同時間另一位前港姐朱潔儀亦爆陳法蓉選美時食煙,被保母發現即嫁禍到別人身上,陳法蓉表示有看過報道,但所講的人九成以上都無名無姓沒有根據,所以沒有必要為無中生有的事情作回應,她說:「我唔會係隊支煙畀人哋嗰個,你哋應該問番朱潔儀,唔係人哋講就係真㗎嘛。」


李姿敏嫁練馬師

另外,前港姐亞軍、28歲的李姿敏日前公佈明年下嫁52歲澳洲籍練馬師賀賢,她昨晚戴着訂婚鑽戒到場,透露是在日本旅行時求婚。李姿敏說:「未定日子,自己三心兩意,又想澳洲又想峇里搞沙灘婚宴,最想係搞個露天婚宴,然後返香港擺酒。」她又透露跟未婚夫曾分手兩年後復合,婚後有計劃生育小朋友。採訪:卓寶花攝影:沈健程




來源: http://hk.apple.nextmedia.com/entertainment/art/20160930/19785838
PermaLink: https://articles.zkiz.com/?id=310732

陳法蓉 梁佩瑚 爆27年恩怨 朱潔儀再揭港姐情仇

1 : GS(14)@2016-10-05 05:32:09

2016-09-21 EW
近日港姐新聞仲好睇過無綫的連續劇!

繼今屆冠軍馮盈盈於網上爆粗,上屆冠軍麥明詩與男友林作鬧分手後,連幾位二十多年前的港姐亦忽然被翻舊帳!

話說89年港姐季軍梁佩瑚,早前大爆同屆冠軍陳法蓉係大話精,引發陳法蓉與好姊妹蔡少芬及洪欣接連「開火」反擊。

日前一位前港姐再向本刊爆料,指當年陳、梁還發生爭衫事件,又指亞軍朱潔儀和「最上鏡小姐」翁慧德亦「唔妥」陳法蓉。本刊致電朱潔儀查詢,她直指當年佳麗間常明爭暗鬥,還大爆曾遭佳麗陷害。

一班女人齊齊爆seed,恩怨情仇真人騷,真係成地都係花生殼呀!

與梁佩瑚玩撞衫

梁佩瑚早前接受有線電視訪問,大爆27年前同屆港姐冠軍陳法蓉,在參選港姐期間,曾私下替雜誌影相,被揭犯下港姐規條後,先講大話掩飾,繼而扮委屈落淚。

訪問播出後,引起軒然大波,被指是大話精的陳法蓉先在微博還擊,指有人「吃不到的葡萄是酸的。天下本無事,奈何多庸人自擾。唉‥‥‥」其好姊妹洪欣亦po文力撐:「這種人,是活得太無聊,想借別人來宣傳自己吧。」陳的另一位好姊妹蔡少芬也po文說:「四個字,不知所謂!」幾位平時謹言慎行的女人,在網上你一言、我一語,隔空開火。

本刊獲一位前港姐爆料,指陳法蓉與梁佩瑚多年來一直有心病,當年一次「撞衫」事件,更令二人積怨加深。「佢哋當年已經唔係咁啱key㗎啦,阿Bel﹙梁佩瑚暱稱﹚心直口快,有嗰句講嗰句,阿Mon﹙陳法蓉暱稱﹚就好勝,乜都鍾意鬥。有次阿Bel着咗條紅色裙出嚟,阿Mon見到猛讚靚,點知阿Mon之後去日本買咗條一色一樣嘅裙,仲要着住出席公開活動,阿Bel知道後咪嬲爆囉!」

與翁慧德面左左

這位前港姐繼續爆料,指除了梁佩瑚公開「唔妥」陳法蓉,同屆的最上鏡小姐翁慧德和亞軍朱潔儀亦與陳法蓉不咬弦。「阿Mon係冠軍,好自然有種氣焰,Wanda﹙翁慧德洋名﹚都頂佢唔順,兩人喺鏡頭前可以笑晒口,好似好friend咁,但鏡頭後就馬上黑面。阿Mon同Donna(朱潔儀洋名)嘅關係亦唔好得去邊,佢哋兩個當選後,被分派到劇組,90年Donna同萬梓良、周海媚等拍攝台慶劇《笑傲在明天》,據知阿Mon知道後,曾經打電話畀Donna,話係自己冇時間接拍,個角色先『彈』咗畀Donna,Donna只係執佢二攤演出,激到Donna紮紮跳。

「仲有單㗎,話說阿Mon同Donna都有髮型贊助,有次Donna 搵髮型師Mark Kim剪頭髮,點知阿Mon收到風又打畀Donna,話:『你(朱潔儀)呢啲乖乖女唔啱佢(Mark Kim)』,Donna一頭霧水,最後發現原來阿Mon鍾意Mark Kim,驚Donna同佢爭。」

朱潔儀被勸退選

本刊致電朱潔儀求證,她只淡淡的說:「嘩!都過咗咁多年,邊記得咁清楚,況且我都唔係記仇嘅人。」但她就自爆參選期間曾遭其他佳麗欺負。

「參加選美活動,預咗佳麗之間會互相競爭,同埋有是非。不過有啲佳麗嘅行為好過份,記得入咗決賽,有幾個佳麗打畀我,話三甲一早內定晒,勸我退選,無謂嘥時間,我梗係唔信啦!又有次喺綵排期間嘅休息時間,有個佳麗食食吓煙,突然叫我幫佢揸住支煙喎,好彩我冇接咋,轉個頭啲評判就出現喺我哋面前,如果我幫佢揸住支煙,真係水洗都唔清呀!不過,所有嘢已成過去,大家既然有緣相識,與其嗌交,不如得閒坐低飲吓茶好過啦!」

本刊亦曾就以上傳聞聯絡陳法蓉和梁佩瑚,陳法蓉助手表示不會再就事件回應,而梁佩瑚則至截稿前仍未回覆。

各自各精采

89年港姐在27年後,人氣突然回升,其實多年來各人都不時有現身社交圈派對,各自都有自己的小天地。

冠軍 陳法蓉49歲

曾與倪震、許晉亨及商人朱明拍拖的她,感情依然未有着落,今年七月卸任慧妍雅集會長一職,到西藏拉薩拍攝電影《駐藏大臣》。

亞軍 朱潔儀49歲

仍是單身的她,水墨油畫樣樣皆精,又不時應邀到各地參與畫展,多年來積極參與慈善活動和社交圈派對,生活悠閒。

季軍 梁佩瑚46歲

當年星路平平,直到2001年轉型做才女,推出超過50本著作。今年四月突然在三亞閃電下嫁蒙古商人郭雲飛,成為人妻。

撰文☆名人組 設計☆蔡宛真
PermaLink: https://articles.zkiz.com/?id=311028

【馮仁昭四圍超】梁佩瑚撐小冰冇問題

1 : GS(14)@2016-12-09 00:03:51

梁佩瑚同甄詠珊噚日喺九龍灣為網絡電影《血戰銅鑼灣2》宣傳。梁佩瑚多年前係慧妍會長,早前陳法蓉同梁小冰為制服起爭執,梁佩瑚話:「我有send訊息畀小冰,佢話佢係烈女,我係才女,叫我乖乖坐埋一邊,佢自己頂。」梁佩瑚直認同陳法蓉一向冇聯絡,並覺得小冰為人好真好直。冇着外套係咪有欠團隊性?梁佩瑚話:「我睇相有見到慧妍logo,冇問題。」撰文:馮仁昭




來源: http://hk.apple.nextmedia.com/entertainment/art/20161208/19858249
PermaLink: https://articles.zkiz.com/?id=318787

梁佩瑚孖老公睇水彩筆

1 : GS(14)@2017-01-26 18:22:19

■梁佩瑚前日與老公在中環逛文具店。



現年46歲的前港姐季軍梁佩瑚,離開娛樂圈多年,曾營商擔任時裝公司公關及市場推廣,98年再去讀法律,並先後考取香港大學專業進修學院法律研究文憑、香港大學法律系法學專業證書及倫敦大學法律系學士。一直單身的梁佩瑚,去年4月與拍拖不足半年蒙古富商郭雲飛閃婚,日前有指二人行街鬧交後,忽然和好兼當街錫錫。前日下午約5時,本報記者又發現到梁佩瑚與老公在中環逛街,去了一間街坊文具店睇水彩筆,其間梁佩瑚不停問老公意見。礙於文具店面積不大,老公替她選定後便先站在門外等,梁佩瑚付款後即走出門大叫「老公!」絕對見少一秒都空虛,當見到老公後即一個箭步跑前會合,認真sweet。採訪、攝影:羅德光




來源: http://hk.apple.nextmedia.com/entertainment/art/20170126/19908709
PermaLink: https://articles.zkiz.com/?id=324289

梁佩瑚才氣逼人棄影讀法律寫作導演瓣瓣掂

1 : GS(14)@2017-01-26 18:22:19

46歲港姐出身嘅梁佩瑚,除咗美貌,原來佢都真係周身刀,名副其實嘅美?與智慧並重。1989年,梁佩瑚參與香港小姐,當年參選時自稱擁有「心形嘴」奪得季軍,同屆嘅港姐冠、亞軍分別係陳法蓉同朱潔儀。梁佩瑚之後仲代表香港參加世界大學小姐競選,並得到「魅力小姐大獎」。其後佢就加入咗無綫,但作品並不多,最為人熟識嘅相信係處境劇《同居三人組》嘅程安珮。93年離開無綫,轉投永盛娛樂,向影壇發展,但梁佩瑚突然又棄影從商,擔任時裝公司公關同市場推廣。直至98年,仲走咗去讀法律,先後考取香港大學專業進修學院法律研究文憑、香港大學法律系法學專業證書同倫敦大學法律系學士。除咗修讀法律,佢仲有修讀過珠寶設計課程,以及鑽研繪畫中國水墨畫同書法。2001年,佢仲做埋才女,做埋作家,推出愛情小說,首本著作為《遺落在天涯海角的心》,當年佢仲接受過傳媒訪問,話一直都冇諗過自己會做作家,因為佢從小最憎就係作文,成日唔知點樣落筆寫文,但o依家佢就好醉心於寫作,佢話因為自己愛幻想,好多浪漫情節都好難喺現實生活發生,喺小說裏面出現就最好不過喇!目前梁佩瑚嘅著作已經超過六十本。前年佢仲做埋導演,替胞弟焯皓嘅新歌《My Lady》嘅MV做埋導演,仲請咗陸詩韻做女主角添!




來源: http://hk.apple.nextmedia.com/entertainment/art/20170126/19909547
PermaLink: https://articles.zkiz.com/?id=324292

曾因被恐嚇報警梁佩瑚放棄追究了事

1 : GS(14)@2017-01-26 18:22:19

46歲港身出身嘅梁佩瑚多年來都係新聞人物,仲多次因報警上報。佢喺2001年曾經因為接到神秘男子嘅恐嚇電話喺好友陳淑蘭陪同下報警,呢事件有指係梁佩瑚同男朋友嘅錢銀轇轕,而隔咗冇耐佢就發聲明過放棄追究事件。不過之後就有一位姓郭嘅男子登報澄清指自己最近牽涉一單金錢糾紛,仲附調事件同佢無關並拖欠梁小姐任何款項,仲話同對方保持良好關係咁話。此外,喺2013年梁佩瑚仲聲稱被一名男子詐騙而報警。梁佩瑚當時解釋就係其唱片公司為梁焯皓請一個位一次性的計劃經理,當時梁佩瑚更指該名經理曾經問公司拎錢作宣傳費,不過就冇去找數,損失六位數字,最後惟有報警。




來源: http://hk.apple.nextmedia.com/entertainment/art/20170126/19909548
PermaLink: https://articles.zkiz.com/?id=324293

Next Page

ZKIZ Archives @ 2019