ZKIZ Archives


「畀佢聽《忘情森巴舞》」蘇志威錫住愛駒 臨衝線唔准打

1 : GS(14)@2016-10-10 00:43:58

■蘇志威如願養馬,經過三次抽籤終於申請做到馬主。



蘇志威自小愛動物,本身已養了三隻狗、兩隻貓,養馬更是他其中一個心願,他經過三次抽籤終於申請做到馬主,更用了七位數字在美國買心頭好。近日愛駒抵港,並住在沙田馬場,太太劉小慧更找師傅幫牠改名為「駿王」。蘇老闆日前入馬場探望愛駒:「我自己屬馬,覺得馬同我都有啲似,都係向前衝、勇往直前。」


特別鍾意小慧

蘇老闆十分愛錫駿王,拍攝當日,他不斷開心喊牠名字、面貼面十分親暱:「佢真係好有性,第一次見佢,佢眼神好友善,非常黏人,會主動錫我用個頭揩我,佢特別鍾意我老婆,食食吓嘢見到佢,會立即去錫,佢真係好得意,好乖。」其間他不時和駿王傾偈:「啲人可能覺得儍,同佢傾偈,佢真係好似識聽,係咁點頭㗎!而家佢得3歲,到4歲啦,我畀佢聽《忘情森巴舞》,畀佢接觸吓舞同快歌。」



■屬馬的蘇志威覺得自己和馬相似,都愛向前衝。

■蘇志威十分愛錫駿王,經常跟牠傾偈。

■細女蘇靖珺受到爸爸蘇志威愛動物的性格影響,亦有去雙魚河騎馬。


唔心急拉頭馬

問到蘇老闆做馬主,會否想快點「拉頭馬」,他表示:「冇乜所謂啦!唔使咁急出賽,又或者要拉頭馬,揀練馬師時同佢講到明臨近衝線,推吓佢算喇,唔好打佢,佢鍾意去就去啦!」對於近日有匹焦點馬「巴基之星」落後反敗為勝的勵志故事,蘇老闆笑言:「駿王好似巴基之星都唔錯,佢型到爆,每次出賽都咁爆。」蘇老闆愛動物的性格亦有遺傳給兩名女兒,其中細女蘇靖珺(Ina)特別愛騎馬:「佢得閒就會叫我帶佢去雙魚河騎馬,佢有學騎馬。而家有咗駿王,兩個女都經常去睇,星期日就會一齊去馬房。」採訪:王連連攝影:陳俊強髮型:Wilson Wong@Salon L服裝:Luxe Tuxedo Limited




來源: http://hk.apple.nextmedia.com/entertainment/art/20161008/19794425
PermaLink: https://articles.zkiz.com/?id=311200

Next Page

ZKIZ Archives @ 2019