走啦死老嘢，阻住個地球轉

李澤鉅攬住個正印

2017-07-27 NM

昔日的長實、和黃經過重組後，改名為長江實業地產（1113）以及長和（1），上個禮拜，公司又宣布改名，把長江實業地產改為長江實業集團，其實此舉睇得出李澤鉅「識嘢」，攬住個正印。

觀乎李嘉誠創業之路，做塑膠花廠的誠哥最初在西環士美菲路開檔，一九五○年尚未有規模時，公司只以商業登記為長江塑膠廠，於一九六四年十月二日才成立第一間有限公司，那時李澤鉅剛出世兩個月，仍為廠佬的誠哥把公司命名為「長江實業有限公司」，英文是Cheung Kong Industrial Company Limited；及至一九七二年，此公司的中文名改為「長江工業有限公司」，何解？因為要讓路給做地產的「長江實業」於一九七二年上市，可見「長江實業」才是誠哥的金漆招牌，即將接棒的長子李澤鉅又焉不懂要揸實個「招牌」，延續李家傳奇，即使公司英文名改為CK Asset Holdings Limited，中文名仍以「長江實業集團有限公司」，正所謂正印即係正印！

作大波萍？

發叔過身，生前對他最大「整蠱」的非簡炳墀莫屬，簡Sir當年爆料，發叔有位紅顏知己一齊炒樓，但又唔記得人家個全名——余紅萍（Ada Yu），遂以鄉下人繪形繪聲作花名——大波萍作稱呼，終找到余小姐玉照，簡Sir，你似乎誇張咗啲喎。

中環寸嘴啲錢都唔知點使？

工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。

利物浦球隊嚟香港，銀行佬請我哋VIP出席球星簽名活動，咪去Sky 100睇吓有咩souvenir攞，跟住踩去Ritz Carlton酒店上面個Caviar Bar，搵啲魚子醬啷吓口，如果唔係，啲錢都唔知點使？本少爺貴為國際金融白紙扇及食評家嘅混合體，又冇紅包收，又冇車馬費，冇錢又點掂？我都好敬重《壹》仔可以捱咗咁耐，只不過我想喺度講吓有錢佬啲衰格嘢，講吓啲庸官，點樣講咗當做咗，嗌完口號過日子，位位都去睇劏房，然後哽咽，無嚟新意。

好似陳茂波個assumption咁，以為世界好香港就一定好，就去微調香港經濟增長預測；去Caviar Bar同靚女侍應傾都知，仲邊有強國人嘅高端消費吖？我就係攝強國人嘅空檔去歎吓，因為香港人消費已經冇面咗好耐，曾幾何時，喺食肆、酒樓、奢侈品商鋪，唔識講普通話反而是被歧視的一群！

醒大家一招，國泰頭等機艙六個位，但只係準備一客魚子醬，一上機就要第一時間order，first come first serveo架！成盒攞返屋企都抵啦！

乜春春魚子醬

正所謂女人唔補好易老，男人唔補就好易冇，今年已五十六歲的周凱旋都好識保養，喺中環千挑萬選魚子醬，呢啲被捧為「Black Gold」的天價食材可以滋養皮膚，返老還童咁啦。好似「樓上」位中環寸嘴都去歎番吓，頂級嗰隻Caviar Beluga，30克盛惠$5,800；估計有300粒咁上下，即係成廿蚊一粒，真係乜春春呀？大家不妨睇吓個餐牌見識吓。

PermaLink: https://articles.zkiz.com/?id=256019

📖 ZKIZ Archives

Random Tags

走啦死老嘢，阻住個地球轉

李澤鉅攬住個正印