|
||||||
|
在馬場碰到地產 Ｌ，少見也，周末係樓市買賣旺日，代理點都唔肯放假，要放，亦在周日，地產Ｌ話：「風頭火勢，SSD搞到成交量大跌，我啲夥計冇乜好做，我亦不妨入嚟馬場 蛇王吓。」左丁山笑佢：「都係你班代理麻煩，成日唱好樓市，唱高樓價，搞到太癲，逼住政府要出手！」地產Ｌ呼寃：「寃枉呀，大老爺，我地做代理嘅，頂多係 催化劑啫，有乜資格舞高弄低個樓市吖。零利率，高通脹，熱錢流入，供應少，先至係大因素。我地最緊要有數交，成交量多，少理樓價高低，當然，樓價高之時， 同係收一個佣，銀碼和味好多。你唔知o架嘞，樓價升得好高之時，我地驚住買家唔敢入市，就會唱淡，希望樓價調整，刺激交投；相反，到咗樓價好殘之時，例如 ○三、○四年，我地就搏命唱好，希望引多啲買家入市。好似股票經紀咁，不論牛市熊市，最緊要有波幅，先至有生意做吖嘛。」 代理唱好唱淡都係 為咗增加成交量啫，我地唔好太過重視，詩云山不在高，有仙則靈，對代理嚟講，價不在高，有成交最緊要。《蘋果日報》話保安局局長李少光不理政府調控樓市， 買入碧濤花園單位，為兒子着想云云。呢呢，沙田馬場對面，城門河畔就係碧濤花園，環境極佳，只係發展商名叫華懋，樓價特別相對便宜，你估李少光冇研究過 咩，廿四孝父親為兒子買樓，唔會用現金買啩？相信係為兒子交咗幾成首期，由個仔去供樓嘅啫，新一代大學畢業生，如果搵到份工，由父親代交四至五成首期兼支 付印花稅、佣金嘅話，應該供得起嘅，不過大前提就係有份工，有糧出先至得。
一位叫做有份好工嘅世姪參加年青行政人員派對， 認識咗兩位八十後女仔，傾咗三幾句啫，女仔就問佢：「你係產品經理呀，即係月入幾多呀？」世姪不虞有此一問，為之面紅耳熱，因為佢在華資公司工作，人工有 數得計，不比呢兩位女仔話係在大銀行做MT或Associate也。世姪話港女如此直率兼俗套，令佢怕怕，左丁山聽咗，都為之無話可說，係咁意勸佢：「不 如考銀行工啦！」世姪又問：「點考？」 |
||||||