單親爸創業絕處逢生阿囝令佢唔放棄
1 :
GS(14)@2017-06-23 01:34:378年前，Ocean Three只是一間在facebook經營網上速遞生蠔店，當時老闆何智聰只向本地供應商取貨，每朝早入機場分貨再送到客人府上，以平價吸客，但因為生意越做越大，被本港最大的供應商拒絕供貨。當年亦試過被大陸生意伙伴走數，損失百萬元，幾乎一鋪清袋，創立Ocean Three第一年，太太更因突發性心臟病離世，留下一歲的兒子Hayden，畢生積蓄被騙加上成為單親爸爸，阿聰心力交瘁，即使Hayden首次學懂叫爸爸，他亦感受不到當爸爸的喜悅，阿聰坦言想過放棄自己去拿綜緩度日，但他認為人生不應該這樣頹廢，更希望日後對兒子有個交待，便硬着頭皮去經營；在迎來第8個父親節，阿聰這次對着鏡頭，細訴這八年的崎嶇路。何智聰：大家好，我叫何智聰，8年前和拍檔創立了生蠔店Ocean Three，而家踏入第8年，已經開咗8間分店！雖然生意叫上咗軌道，但其實最初頭四年過得好辛苦，因為喺創業第一年，我心愛嘅太太仲因為心臟病離去，留低一歲大嘅Hayden同我相依為命。頭4年我係捱返嚟，個人冇晒成功感同滿足感，就算見到阿仔突然識行路，識得拋個波俾你玩，第一次叫爸爸，正常應該開心，但我冇呢種感覺。當我做生意時，贏咗啲獎項，開咗新舖，理應係有滿足感，但其實每一次我都好失落，當好多朋友嚟撐你，你做到一樣你認為係成功嘅事，其實係冇人同你分享，嗰種感覺好難受。專家話，小朋友頭4年冇乜記憶，所以我都避開阿仔，用工作麻醉自己，初期創業，人手唔夠，送貨、執貨、打電話搵客全部自己做，每日工作到凌晨1點，返到屋企係張床見到阿仔，錫佢一啖就要瞓，4年冇放過假。每朝凌晨五點會責醒，要睇吓網站有冇生意，怕出唔到糧畀同事，好怕交唔到租，好大壓力。呢段時間我有諗過放棄，親人離開，畢生積蓄冇咗，好多人會捱唔住，我每一日都有諗過放棄，但我同唔到個仔，同唔到太太交待。當初有諗過離開香港，去西藏流浪，但我諗人生係咪要咁樣？乜都唔做，去拎綜援，單親福利。就好似跑步咁，第一次跑5公里想放棄，同自己講，捱埋呢10分鐘，跑完再同自己講，捱多5分鐘，跑到冇氣先算，結果跑咗10公里。4年後生意好咗，終於有時間陪阿仔，但我冇用物質滿足佢，希望以身作則，話畀Hayden知，呢個世界冇好彩，要自己爭取先至有回報。記得細個，爺爺問我選擇食雲吞面定麥當奴，我知道麥當奴貴兩蚊，我好想食麥當奴都會話食雲吞面。因為我知爸媽好愛我，我唔想佢浪費金錢，而我都咁去教小朋友。好多人好奇怪，問點解唔俾啲好啲嘅生活佢。我想講，男仔可以窮養嘅，到咁大個送過一次禮物畀佢，我連生日禮物都冇買過畀佢，只係一次考試好好成績先送。而家佢見到份禮物會同朋友講，「呢份禮物」爸爸買畀我架。我想囝囝明白，社會上面咩叫競爭。我唔需要個仔讀書讀得好叻，我想畀佢知道，好多嘢要自己去爭取，好似最近去車會的聚會，夜晚10點先開始，我就叫埋阿仔去幫手，佢拎住光管同風扇吹住爸爸，企係度同我一齊開生蠔，當晚開咗二百幾隻生蠔，呢個過程幾辛苦，但想讓佢感受吓，呢個世界係公平嘅，努力先有回報。我會同佢講，如果你想去旅行，就要力洗十次碗。中秋節人哋一家大細出去玩蠟燭，我就帶阿仔去賣水果，我想佢知道，爸爸好努力工作，唔怕辛苦，讓細佬仔唔好怕面矇，學識招呼人，用身教佢點樂觀做人，阿仔唔一定要讀書好叻，我唔Care佢事業有幾大成就，要搵幾多錢，但我Care佢做唔做到佢想做的事，希望佢有冒險精神，夠膽完成自己夢想。轉眼間，Hayden已經8歲，望返轉頭，其實忘記咗有幾辛苦，係值得我捱嘅。我希望做到一個稱職嘅爸爸，成為佢嘅榜樣，所以我想趁呢個機會，同囝囝講，同父母講，終於有個交待啦。記者：陳新政 攝影：黃耀興
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170619/20060739