ZKIZ Archives


追隨誠哥著狗仔衫

2015-05-07  NM
 
 

 

誠哥與已故富婆小甜甜共通之處,係有錢又慳「自己」;誠哥鍾意打golf,早排佢搵秘書訂運動服,品牌係由小甜甜以安寧控股收歸返來的SWANK做代理嘅,名為Black & White,唔係做開奶茶嗰隻黑白淡奶品牌喎,係來自日本嘅男士運動服品牌;鋪頭入面啲口痕友就話:「以誠哥嘅財富,都係『粗粗哋』揀呢個中價品牌喎。」這則消息,在球會內嘅波友之間流傳,間接令呢個狗仔做商標嘅服裝品牌,倍添名氣。葉維義插爆法官

週二臨截稿前,惠理基金創辦人葉維義突然打俾小宗,話有嘢要爆,不過唔係爆料,係火爆。原來佢睇到七十三歲老人家施教仁,因唔想拎綜援,用報細十一年嘅假身份證做保安單案,早前被判入獄四個月,之後申請覆核刑期,點知都係維持原判。葉維義火滾道:「我做過律師、讀過法律,但法律不外乎人情。我聽原訟法官講,唔咁判,怕所有九十歲嘅人都出嚟做嘢。我知法律係要有警嚇作用,但係咪咁多九十歲嘅人出嚟做嘢先?我覺得呢個阿伯係個好榜樣喎,佢用假身份證係唔啱,但佢盡忠職守,拎埋警方嘉許信。點知法官又話嘉許信唔可以用嚟求情,因為警方唔知阿伯用假身份證,根本唔合邏輯,阿伯係因為佢嘅行為而獲讚賞,唔係因為佢用咩身份而獲讚賞o架嘛。我真係頂呢個法官唔順,好唔公平!」爆完一輪,葉維義仲話會帶頭捐錢俾施教仁太太,希望改善到佢哋嘅家庭環境。做善事,小宗一定撐。

應驗《大時代》劇情

上週重播的《大時代》,劇情講到股市大起大落,有個trader頂唔住,心臟病發猝死交易所內。估唔到,呢段劇情應驗喺2015港股大時代之下。九十年代叱咤金融市場,專做財務按揭和放款生意嘅佐治陳,可能因近排市況激盪,加上佢係多隻細價股嘅玩家,只有五十多歲的他前週突然因心臟病發猝死,身邊朋友莫不萬般唏噓。以往金匡企業嘅羅兆輝、新中港嘅徐展堂都同佢交過手,呢幾位前世債仔,可能也無想過咁早喺天堂同佐治陳相聚!

高盛一buy再buy

今年初,壞消息多到接唔住嘅滙豐,股價跌到六十幾蚊,冇乜行會睇好,然而美資大行高盛,繼三月頭出完一份「Buy」報告後,四月頭再彈一份又係「Buy」嘅;內容冇乜亮點,不過提到墨西哥、巴西業務有待重組,齋睇report難有動力Buy,不過貴為花旗大行,點會唔掌握到佢知你唔知嘅料?本週揭盅。原來高盛獲滙豐聘請,幫手出售巴西業務;有生意做,又點會唔睇好呢?

中環寸嘴

工廈大王楊耀松長子,是各大有名食肆之VIP,喜歡研究已故及城中有錢佬對食之喜好,強調「貴」唔等如識食,自詡分享食經乃是提升讀者之水平。

踢陸羽山頭

上個禮拜朝早走去陸羽,諗住走上二樓搵格房仔同個老友過吓料,吖,激到我扯晒火,嗰三間房仔明明冇人坐,個侍仔竟然話俾人訂晒位,望吓個鐘,朝早十點半,哈,冇房喎!我頂籠咪坐到十二點就起錨,你慌我霸住張枱阻你做生意咩,條友真係×弟!呢啲就係陸羽嘅「山頭主義」啦。嗱,好多普通嘅有錢佬死守一層,我唔係普通嘅有錢佬,所以層層都去吓,自我阿爺嗰代已經喺陸羽打躉,二樓有個侍仔阿榮,三樓又有個阿潤招呼過我老豆,所謂人無三代富,今鋪我都算保持唔到,咁冇飛士,我死鬼老豆都俾陸羽以前報紙檔佬寸過,佢見對面間便利店又送紙巾又送膠袋,梗係變陣幫襯便利店,點知有日賣晒,死死哋去報紙檔買,條友回敬一句:「冇啦,啲報紙俾有錢佬買晒!」不過,好漢不吃眼前虧,唔坐二樓,我咪撤退去有利陣地,落地下飲,貪嗰度樓底高呀,坐埋喺雪茄林被隊冧前面嗰格。出嚟搵嘢食嘅,明槍易擋,暗箭難防,容乜易喺我嗰鍋鷓鴣燕窩粥加料,整啲人肉燕窩我歎,到時我就白鱔上沙灘,唔死一身潺,再整碗白肺菜乾湯,潤番條喉嚨就算鬼數!

金牙大狀講嘢

撕裂香港「五‧一黃金周」首日訪港內地旅客增加兩成四。咭片‧蘇錦樑話單日數字唔作得準,千祈唔好袋住先。不過,復活及清明假期內地旅客下降一成四,佢同入境處處長陳國基就唔係咁講啦。當時佢哋即刻唱雙簧,話反水貨客示威滋擾旅客,嚇走晒佢哋。啲人嚟唔嚟香港,原因多籮籮;可能同反水貨示威有關,但亦可能係受紙水影響,冇人百分百知道「真正原因」究竟係乜。乜都無限上綱,社會有乜辦法唔撕裂?如果遲吓數字繼續上升,咭片‧蘇係咪要撲出嚟領功,話係政府宣傳推廣使得,先?

PermaLink: https://articles.zkiz.com/?id=143656

大劉係Hermès粉絲子華神格仔衫爆搶衫潮

1 : GS(14)@2016-10-11 08:11:52

香港人每次行山,可能都會留意住附近會唔會有一個着黑色衫褲跑到實嘅男人,因為呢個人好可能就係「發哥」周潤發,事關佢每次行山,都係同一個造型,風雨不改。其實唔只發哥,好多大人物都好少換造型,培養咗個招牌look:喬布斯(Steve Jobs):蘋果創辦人喬布斯個一套黑色衫配牛仔褲真係好經典,喬布斯喺佢授權嘅傳記講過,呢個招牌造型係出自日本設計師三宅一生,佢當時仲打算當做員工制服o添!但員工唔肯咁着,所以喬布斯就拎嚟喺發佈會着。朱克伯格(Mark Zuckerberg):同樣鍾意一款行走天下嘅,仲有facebook創辦人朱克伯格,佢選擇嘅就係牛仔褲襯灰色短袖T恤。至於點解要係固定造型呢?佢就好瀟灑咁講過,唔想浪費精神時間喺服飾上面,寧願花時間去諗點樣改善社會。黃子華:子華神一把口好煞食,舉手投足只係一個動作,都精采到足以令觀眾由心笑出嚟,試問咁樣仲邊個在意佢嘅衣著呢?佢喺09年同佘詩曼合作嘅大台劇《絕代商驕》,就係以一個造型打天下,一件白色T恤外加一件紅黑格仔衫,有時仲多件好似垃圾膠嘅黑漆漆外套,睇落有啲hea,但唔係講笑,當年真係有唔少人上網問子華神件紅黑格仔衫邊到有得買。老夫子:要數屋企有好多同款衫嘅人,一定要講老夫子!雖然老夫子係漫畫人物,得一套造型好合情合理,不過咁,老夫子其實係會換衫o架,曾經有一話畫過佢屋企衣櫃,裏面都係擺滿個黃黑色招牌衫,解開咗老夫子日日都着同一款衫呢個秘密。劉鑾雄:「大劉」劉鑾雄鍾意法國名牌Hermès唔係咩秘密,多年來無論係身邊女伴、仔女同媽媽,都係用Hermès嚟裝身。而大劉自己就鍾情藍色,無論係以前個款短恤T恤,定係近排嘅長袖樽領衫,都係以藍色做主,絕對係位「大藍人」。




來源: http://hk.apple.nextmedia.com/entertainment/art/20161011/19796775
PermaLink: https://articles.zkiz.com/?id=311539

Next Page

ZKIZ Archives @ 2019