ZKIZ Archives


90後孖仔畫動畫劇情最重要

2016-07-14  NM

即使生於不同年代,動畫都陪伴大家成長。今年26歲的孖仔Alex和Zenith從小便受廸士尼、數碼暴龍、機動戰士及Pixar出品等卡通動畫所薰陶,他們更一同修讀創意媒體(creative media),由「睇」動畫到「造」動畫。畢業後,2人成立RedPill studio,接動畫製作工作,他們表示有再靚的畫面,也要一個好故事來配合,他們希望可以將香港文化融入其中,目標讓香港動畫踏上國際舞台。

Alex和Zenith最近參加了「第三屆動畫支援計劃」,希望透過動畫帶出廚餘的問題,呼籲大家珍惜食物。他們的影片《媽媽你在哪?》講述雞媽媽及兩個孩子的故事,當中用了香港動畫少用的3D模擬2D風格,令人印象深刻。哥哥Alex表示:「我哋想試多啲唔同風格嘅表達手法,帶畀大家多啲視覺衝擊。」他們希望日後的動畫可以加入更多香港元素,善用這些本土獨特的素材創作。

節奏太慢重新設計

Zenith負責角色設計及導演,Alex則負責分鏡、打燈及氣氛,2人異口同聲說好故事才是製作動畫的重點。Alex表示:「製作《媽媽你在哪?》呢條片暫時係最難忘,除咗會有funding畀我哋拍片外,仲會有業界人士畀意見我哋,例如我哋想主角去好多唔同地方逐步搵媽媽,但過咗first cut後,大家覺得節奏太慢,要重新設計。於是我哋就諗加飛車同追逐位,令劇情緊湊啲。」製作《媽媽你在哪?》令他們明白到編劇的重要性,「今次令我哋明白到,大家喺編劇劇情方面比較弱,日後除咗練習多啲外,都會搵人幫手編劇,聽多啲意見。 」此外,此計劃還助他們建立知識產權、參加展覽,認識到很多合作伙伴,幫助很大。Alex和Zenith修讀城市大學創意媒體,他倆笑說當初並沒有刻意選擇這條路,Alex說:「雖然我哋鍾意動畫同音樂,但喺爸爸嘅影響下,喺Jupas揀科時,我揀咗應用科學、理科嘅科目,諗住易入啲,點知一齊派咗CM副學士。」

有千個掣要記

他們現時的創作以3D動畫為主,因從小已特別偏愛這類卡通,「細個睇《反斗奇兵》已經覺得啲動畫好靚,另外對Avita嘅視覺效果都好有興趣,好想了解多啲。入學時,發覺學動畫同睇動畫有好大距離,用一個製作程式,有幾千個掣要記住點用,又要搵code搵program,真係唔係咁易。」13年畢業後,Alex及Zenith分別從事動畫師及商場佈置設計的工作,Zenith覺得工作重複並沒有發揮空間,他們想趁年輕嘗試創業,15年便與兩位朋友一同成立了RedPill studio。Alex表示,廸士尼動畫對他們的影響頗大,「動畫最受青少年同小朋友歡迎,幫助小朋友建立價值觀,廸士尼動畫好多都黑白分明,所以我哋想用動畫,透過唔同嘅角色,用輕鬆手法教小朋友正義、分辨是非黑白嘅價值觀。」

看電影學編劇

他們強調製作動畫不只着重製作技術,動畫亦是一齣戲,故導演及編劇能力都很重要,他們會看很多電影、廣告、漫畫及動畫作參考,Zenith說:「最近睇咗韓國嘅電影《逆權大狀》,覺得好好睇!我哋咩戲都會睇,有時會迫自己睇。做動畫要識點樣去講故事,要睇好多戲,學編劇、剪接、畫面顏色、呈現方式等技巧。」因朋友圈內多屬於傳播媒介,人脈較廣,他們經朋友介紹下,接的工作包括《2016奧運宣傳片》、《Suzuki SW1 Turntable》、曹震豪 《Get Away》 MV、第三屆香港藝穗民化節《Crazy Toyy》預告片、產品介紹片及一些公司內部宣傳片等。「我哋第一次接job,係媒氣公司嘅宣傳片,唔係好識同人接洽,又唔識個工作程序係點,試過未finalize已經send咗個final version嘅file畀客;又試過接其他job,個客要求改咗20至30次圖,而家會就project規模同性質,一早同客講定只可以改幾多次同埋set個期限。 」現時他們每月約接1至2單工作,視乎規模大小而定,每單賺$25,000至$50,000不等。

鬧交好無謂

兄弟難免會吵架吧?Alex和Zenith均表示:「咁大個人都唔會點鬧交,學生時就有,但嗌完又咩都做唔到,好無謂。而家一有唔同意見,好似角色死唔死好、點樣死、有咩技能等設計問題,我哋都會理性討論。比起同朋友討論,我哋明白對方多啲、有默契啲,同埋講嘢較直接,慳番好多時間!」他們希望將來可以造原創動畫及找投資者,將香港動畫帶往國際。

開業成本:

資金:$100,000器材:$25,000

總投資:$125,000

每月開資:

租金:$0(Home office) 人工:$20,000(老闆2人)營業額:$300,000

盈利:$100,000

RedPill studiohttp://www.redpillstudio.hk

撰文:霍芷晴攝影:劉宇軒(部分圖片由被訪者提供)

PermaLink: https://articles.zkiz.com/?id=205467

Next Page

ZKIZ Archives @ 2019