ZKIZ Archives


【馮仁昭四圍超】華仔憶無綫恩師何家聯病逝

1 : GS(14)@2017-01-05 08:07:16

■何家聯當年曾經因為叫唔到劉德華續約而被調職。





無綫前高層何家聯前日因肺炎離世。曾同何家聯共事多年嘅舊同事曾醒明,噚日接受本報電話訪問時話:「今日下午收到消息,聽到佢噚日走咗,知道何生早幾年患鼻咽癌,入住東區醫院。」據知何家聯前日喺東區醫院離世,享年約80歲。消息指佢上月平安夜因肺炎併發症昏迷入院,延至前日不治。何家聯於五、六年前曾患鼻咽癌,醫好惡疾後去年初入住安老院,佢同太太育有一子,?家住喺美國。當年由佢一手簽約嘅五虎之一劉德華噚日受訪時話喺自己被雪藏期間,多得何家聯精神上支持:「佢把所有TVB啲藝人都當作仔女,最難忘嘅係佢因為冇成功說服我續約而被處分,我一直特別內疚。離開電視台後斷斷續續都有聯絡,近年就比較少,佢離開得太突然、太可惜,希望佢一路好走。」



■湯鎮業話當年五虎都有啲驚何家聯,因為佢為人比較嚴肅。資料圖片

「五虎都驚佢」

另一五虎成員湯鎮業接受電話訪問時話,當年五虎都有啲驚見佢:「80年代佢喺TVB管藝員部,所有約都係佢傾,佢係用家長式管教,都幾嚴肅,嗰時見佢都幾驚佢。」汪明荃喺電話話:「當年我入《歡樂今宵》大家做同事,一齊成長,佢做導演好叻,後來有段時間佢管藝員科,大家都溝通好好,佢離開公司後冇聯絡。」何家聯係香港第一代電視人,由麗的年代做起,初入行時任職製作部,之後加入無綫做攝影師,其後升至製作部總監,當年佢一手發掘簽下五虎劉德華、梁朝偉、黃日華、苗僑偉同湯鎮業。撰文:馮仁昭




來源: http://hk.apple.nextmedia.com/entertainment/art/20170104/19885365
PermaLink: https://articles.zkiz.com/?id=321371

Next Page

ZKIZ Archives @ 2019